Hataholi Nadedenu nala Tutuin 2:8-38

⁸Tehuu talobee, de ita tamanene sala bisa ala kokolak lenik ita esa-esako nusan dedeꞌa heheli nala?

⁹Ita ia teme nusa Partia, Media, Elam. Mesopotamia, Yudea, Kapadokia, Pontus, Asia,

¹⁰Frigia, Pamfilia, Masir, leme Libia fo dekak no kota Kirene; hambu ita luma teme kota Roma mai boe;

¹¹hambu seluk fo leme pulu Kreta, ma luma leme nusa Arab mai. Ita luma hataholi Yahudi, ma hambu hataholi leme leo-leo feꞌe kala mai boe, fo ala maso anggama Yahudi so. Tehuu ita basa nggata tamanene hataholi la ia pake ita esa-esako dedeꞌan, laꞌeneu dedeꞌak inahuuk nalan seli, fo Manetualain Ana taon so! Wee! Ita heran talan seli.

¹²Basa sala bafa nala bemboo, de latatane aok esa no esa, lae, “Talobee de leo iak bae? Ndia sosoan hata ndia?”

¹³Tehuu hataholi feꞌe kala haumemee sala. Ala lae, “Wee, boso mbali sala. Te hataholi la sila ala mafuk lalan seli ndia!”

¹⁴Nai ndia, hambu Petrus no Yesus hataholi nadedenu kasanahulu esa feꞌe nala. Boe ma Petrus ana mata neu, de ana kokolak neu hataholi noꞌu kala fo lakahohombu lai ndia. Ana kokolak natingga nae, “Ina-ama, ma basa tolanoo nggalei. Ei hataholi Yahudi la, ma ei mana mai leo nai Yerusalem ia. Pasa neulalau ei ndiꞌidoo nala, fo mamanene au kokolang ia, te hambu dedeꞌa inahuuk fo au sangga afaꞌdan neu ei basa nggei.

¹⁵Ei boso mae hataholi la ia ala mafuk, te taa hambu hataholi ana mafuk nai fafai anak. Nakalenak hatematak ia bei fo liꞌu sio!

¹⁶Ei mamanene hataholi la ia, ala kokolak lenik ei esa-esako dedeꞌan. Teteꞌbe na leo iak: faik ndia, Manetualain ana nafaꞌda memak dedeꞌak ia, nenik Ndia mana kokolan Yoel nae,

¹⁷‘Manetualain ana kokolak nae, “Nai fai mateꞌen, Au sangga fee Au Dula Daleng neu basa hataholi, Ei ana touana nala ma ei ana inana nala, neu ko Au pake sala daꞌdik neu Au mana kokolang. Ei ana muli-solu nala, neu ko lita hata fo Au sangga atuꞌdu fee sala. Ma ei hataholi lasi nala, neu ko lalameꞌi hata fo Au sangga fee sala lita.

¹⁸Nandaa neu fai mateꞌen, Au fee Au Dula Daleng neu basa Au ana nggala. Au feen neu tou kala, ma Au boe oo feen neu ina kala. De neu ko ala kokolak hata fo Au afaꞌda sala so.

¹⁹Neu ko Manetualain Fain ana losa. Faik ndia bei tana mai, Tehuu, Au tao akahuluk tanda-tanda heran nai lalai lain. Tanda heran leo leꞌdo ana mate; ma bulak boe oo ana mbila leo daak. Au boe oo, sangga tao dedeꞌa inahuuk nai daebafok dae. Basa sila, nonook leo daak, haꞌi, ma haꞌi masu bubuak-bubuak ala hene lain leu. Neu ko losa Manetualain fai-fai inahuun ndia, na see ndia nanggou noke Manetualain tulu-falik, na sila ndia ala hambu lasoꞌda.’ ” Ndia ndia fo, Yoel nafaꞌdan so neme makahulun mai.

²²Na, tolanoo Israꞌel la ei! Pasa ei ndiꞌidoo nala, fo mamanene hata fo hatematak ia au sangga kokola kana. Manetualain ana tuꞌdu basa Yesus, fo hataholi Nasaret ndia. Ita bubuluk tae ndia teteꞌbes, huu ita tita so, fo Manetualain ana pake Yesus tao tanda-tanda heran, ma dedeꞌa inahuuk nalan seli. Ei boe oo bubuluk dedeꞌak ia so, huu Yesus ana tao tanda heran nala sila neu ei lalaꞌdan.

²³Tehuu ei tao misan, fo tungga dalak fo ei miu mbau-eꞌdo hataholi manggalau kala, de ala mbaku lisan neme ai ngganggek. Naa te, Manetualain ana bubuluk ndia, neme makahulun ele mai so, fo memak nandaa no Ndia duduꞌan.

²⁴Memak ei tao leondiak, losa Ana mate teteꞌbes. Tehuu, Manetualain tana nau, fo Yesus ana leo nakandoo nai hataholi mana mate kala mamanan. Huu ndia de Manetualain ana mboꞌi henin neme mamana hataholi mana mate kala mai, ma Ana tao nasoꞌda fali kana.

²⁵Makahulun ele, Mane Dauk ana sulak mema kana laꞌeneu Yeus ndia so, leo iak: ‘Au bubuluk Manetualain nok au taa-taa. Huu ndia de taa hambu esa boe fo ana bisa natuꞌda au, huu hambu Manetualain nok au taa-taa.

²⁶Huu ndia de au daleng namahoko; boe ma au koa-kio akandoo Ndia, ma kaꞌda au ndondoo ahani Manetualain.

²⁷Manetualain tana nau ela au samaneng, ana leo nakandoo nai hataholi mana mate kala mamanan. Ma Manetualain tana nau ela Ndia Hataholi Dale Malalaon mbombolan ana mbulu nai lates dale.

²⁸Manetualain natuꞌdu au dala soꞌdak teteꞌbes so. Huu ndia de, Au daleng namahoko nalan seli, te Manetualain sama-sama no au.’ Ndia fo Mane Dauk ana sula kana so.

²⁹Naah, basa tolanoo nggalei! Hatematak ia mboꞌi au, dei fo au kokolak manggaleꞌdok neu ei laꞌeneu ita Baꞌin Dauk ndia. Ana kokolak leondiak, tehuu tana natuꞌdu aoina hehelin. Huu ana mate so, de latoi henin so, ma ndia laten bei nai ia losa faik ia.

³⁰Mane Dauk ndia, ana daꞌdik neu Manetualain mana kokolan. Ma ana bubuluk nae Manetualain ana helu pake sumba-sook so, nae neu ko Dauk numbu-saꞌdun esa ana toꞌu palenda, ndia hataholi fo Manetualain ana tuꞌdu basan so, neme makahulun mai.

³¹Faik ndia Dauk ana suli dook mata neu. Ma ana nafaꞌda nakahuluk laꞌeneu Hataholi ndia, fo Manetualain ana tuꞌdu mema kana so. Neu ko Hataholi ndia ana mate, tehuu tana leo nakandoo nai hataholi mana mate kala mamanan, ma mbombolan tana mbulu nai lates dale, huu Manetualain ana tao nasoꞌda fali kana.

³²Hataholi fo Dauk ana sesei-sesei kana ndia so, ndia Yesus! Manetualain ana tao nasoꞌda fali kana neme Ndia mamaten mai. Saꞌdi ko ai basa nggai mita no ai mata deꞌe hehelin, Ndia nasoꞌda nasafali so.

³³Ma hatematak ia, Manetualain ana soꞌu nala Yesus, fo Ana toꞌu pangga madema manai lain nalan seli. Boe ma Ndia nanggatuuk nai Manetualain boboa konan, nai mamanak fo Manetualain ana sadia mema kana so. Ma Aman ana feen Dula Malalaon so, leo Manetualain ana helu basan, neme makahulun mai so. Huu Ana helu nae, Ana sangga fee Ndia Dula Dale Malalaon neu ita boe. De hatematak ia, hata fo ei mamanenen ma ei mitan ndia, na ndia Manetualain ana fee Ndia Dula Dalen mai.

³⁴Dauk mesa kana tana hene neni nusa soꞌdak neu, tehuu nafaꞌda nae, ‘Manetualain ana kokolak no au Lamatuang nae, “Manggatuuk muu Au boboa konang, neu mamanak fo Au sadia mema kana so,

³⁵losa Au tao O musu mala doꞌok neu O.’ ”

³⁶Huu ndia, de basa hataholi Israꞌel la musi ala bubuluk teꞌbe-teꞌbe, laꞌeneu Yesus ndia fo ei mbaku misan neme ai nggangge ndia lain, na ndia Yesus fo Manetualain ana tuꞌdu basan neme makahulun mai so. Ma Ndia boe oo, ana daꞌdik neu ita Lamatuan!”

³⁷Lamanene leondia, boe ma hataholi la ala fale dale nala tutik. De latane Petrus ma nonoo nadedenu feꞌe nala sila lae, “Kaꞌa sala aa! De ai musi tao hata bali?”

³⁸Boe ma Petrus nataa nae, “Ei esa-esako musi laꞌo ela basa ei sala-singgo nala, fo tungga falik Manetualain. Basa na ei musi moke fo hambu salanik, daꞌdik tanda nae, Manetualain ana koka heni ei sala-singgo nala so. Basa na, bei fo ei boe oo hambu Manetualain Dula Dale Malalaon.