HAHEMAORO TAUDIA 4:1-12

¹Ehud e mase murinai, Israel taudia ma e kara havara Iehova vairanai.

²Bena Iehova ese Iabin, Kanaan pavapavana, imana ai e atodia. Una tau na Hasoro Iohiana; ena tuari oreana biaguna na Sisera, Haroset-ha-goim ai e nohova tauna.

³Bena Israel taudia ese Iehova e tai henia, baine durudia eto. Badina be una tau ena auri kariotadia na sinahu taurahani-ta; laḡani ruahui lalodiai ia ese Israel taudia e hahisidia bada.

⁴Una negana ai peroveta hahinena ta, ladana Debora, Lapidoto adavana, ese Israel ai e hahemaorova.

⁵Ena kara be pamu auna ta, ladana Debora ena pamu auna, henunai e helaiva, Rama bona Betele padadiai, Efraim ororodia ai. Israel taudia na unua ela ia dekenai, baine hahemaoro henidia totona.

⁶Ia ese hereva e siaia, Barak Abinaom na Napatali hanuana ta amo e boiria: una hanua ladana na Kede. E hamaoroa, eto, Iehova, Israel Diravana, ese se haḡanimu a? Aola, emu tuari oreana na Taboro ororona ai ba haboudia: gerebu-ta bavabidia Napatali iduhuna amo bona Sebulun iduhuna amo.

⁷Bena lau ese Sisera, Iabin ena tuari oreana biaguna, mai ena kariota bona ena tuari taudia ida, baina koia, Kison sinavaina isena ai baine vasi; bona oi imamu ai baina atoa.

⁸Barak ese e haere henia, eto, Oi ba bamogu, vada bainala; a basio bamogu, lau na basinala.

⁹Hahine na eto, Momokani baina bamomu; ḡau tamona una dala amo ihanamomu basio davaria, badina be Iehova ese Sisera na hahine ta imana ai baine atoa. Bena Debora e tore isi, Barak ida Kede hanuana ela.

¹⁰Bena Barak ese Sebulun taudia bona Napatali taudia e boiridia, Kede hanuana baela. Tuari taudia gerebu-ta ia murinai e raka; bona Debora danu ia ida ela.

¹¹Hebere, tau Kene, ese Kene taudia, Mose ravana Hobab garana, edia amo vada e raka oho, ena kalaga na dauhai e haginia, Sanamim oak auna badibadinai, Kede hanuana badinai.

¹²Haida ese Sisera e hamaoroa, Barak Abinaom na Taboro ororona vada ela.