Mumutara Ŋic 4:1-12

¹Ehudu hâmome Israe ŋic jaŋe Wofuŋte maio wiac mamakâcne mocwâc heɋârembiŋ.

²Ehame Wofuŋzi Kanaaŋ ŋicwofuŋ Jabiŋ Hazoro haeo juwec ere meo râec‐jopawec. Â momorifâc‐ticne jaŋere micne Sisera e ine Harose‐Goim haeo juwec.

³E ʒikare keretac 900 aeŋzi bakicne focneha jara 20 Israe guru bâʒâic‐jopahuc ro waha âte ejarewecte Israe ŋic jaŋe Wofuŋzi bafic‐jopaocte kio wâwâsic ecnembiŋ.

⁴Ehame dameŋ ira Lapidoti ŋonâŋ‐ticne Debora e porofete ŋokac juhuc Israe ŋic jaŋerao mumutara gie bawec.

⁵E Eferaim tiki mâreŋko Rama â Bete hae ŋondeŋ‐jekicko hâmu moc e jahacne wase bakicne irec fuŋnao ŋejujec. Eme Israe ŋic jaŋe mumutara gie baocte ira fisihuc jumbiŋ.

⁶Eme e Abinoam ŋokâ‐ticne Baraki Naftali mâreŋko Kedesi haeo juwec e dâŋ râecnehuc hefârewec. Eme fisime âzâcnerâ muwec: “Israere Wofuŋ Anutu e ʒiŋuc mukac: ‘Go rarâ Naftali guruonec â Sebuloŋ guruonec ŋicfâcge 10 tauseŋ Taboro tikio hetumaŋ‐jopac.

⁷Eme no Jabiŋte momori guru micne‐jeŋic Sisera e momorifâc‐ticne â ʒikare keretac‐ticnehec fârepe fisiha Kisoŋ opâo bâfuacmu. E noni gore meo râepemu.’”

⁸Mume Barakizi Debora âzâcnerâ muwec: “Goki nohec razo mutec rapemu. Â goki nohec mi racmuo ine no wâc mi rapemu.”

⁹Eme ŋokaczi muwec: “No gohec rajâmbâŋkepemu. Mâc go hata rakomec i go gahacne mumuteŋ fuaocte mi rakomec. Wofuŋ e Sisera ŋokac mocte meo râeocmu.” Iŋuc murâ Debora e faharerâ Barakihec Kedesi haeo rapic.

¹⁰Eme Barakizi Sebuloŋ â Naftali guru Kedesi haeo raniŋte hefârec‐jopawec. Eme ŋic 10 tauseŋ jaŋe bâjâperâ fembiŋ. Â Debora e wâc ehec mâmâc rafewec.

¹¹Eme Keniŋic Hebere e Keniŋic guru gâcne Mose kimo‐ticne Hobabi ere ɋâricfâc behec‐joparâ rawec. Raku Kedesi hae heririŋ Za‐Ananim haeo boriŋfuŋko boze‐ticne bawec.

¹²Eme Abinoam ŋokâ‐ticne Baraki e biac Taboro tikio fejec, Sisera iŋuc âzâcnepie