Soukapwüng 4:1-12

¹Mürin än Ehut mäla, ekewe aramasen Israel ra pwal förisefäli mine a ngau me fän mesen ewe Samol mi Lapalap.

²Iei mine ewe Samol mi Lapalap a asechirela ngeni Japin ewe kingen Kanaan mi nemenem lon Hasor. Iwe, ewe samolun nöün mwichen sounfiu itan Sisera, a imweimw lon Haroset-hakoim.

³A wor ükükün tiupükü wän Sisera woken mi för seni mächä. Iwe, a fokun ariaföüü chon Israel lon ükükün rüe ier. Mürin, ekewe chon Israel ra siö ngeni ewe Samol mi Lapalap pwe epwe alisiir.

⁴Lon ena fansoun Tepora ewe soufos fefin pwülüen Lapitot a soukapwüngün Israel.

⁵Iwe, neminewe a soun momot fän efoch irä palm mi nom lefilen Rama me Petel won chukuchukutän ewe fanü Efraim. Iwe, ekewe aramasen Israel ra feito ren pwe epwe eäni ar kapwüng.

⁶Lon eu rän, Tepora a titi Parak nöün Apinoam we mwän seni Ketes mi nom lon Naftali. Iwe, a üreni Parak, “Ewe Samol mi Lapalap, ewe Koten Israel a allük ngonuk, ‘Kopwe feila o amwichafengeni ükükün engol ngeröü mwän seni ekewe ainangen Naftali me Sepulon o emwenirela ngeni ewe chuk Tapor.

⁷Üpwe panawu Sisera ewe samolun nöün Japin sounfiu. Epwe churuk me arun ewe chanpupu Kison fiti wan woken me nöün sounfiu. Iwe, üpwe föri met kopwe akufu ren.’”

⁸Mürin, Parak a üreni Tepora, “Are en kopwe etiei, üpwe feila. Nge are kosap etiei, üsap feila.”

⁹Iwe, Tepora a üra, “Üpwe fokun etuk. Nge ei sokun lapalap ka eäni, kosap ling ren, pun ewe Samol mi Lapalap epwe atolonga Sisera lepöün eman fefin.” Mürin, Tepora a ütä o eti Parak tori Ketes.

¹⁰Iwe, Parak a amwichato chon ewe ainangen Sepulon me Naftali lon Ketes, nge ükükün engol ngeröü mwän ra tapwela mürin, pwal Tepora a eti.

¹¹Nge Heper ewe re Ken a imwü seni chon Ken ekewe mwirimwirin Hopap semen pwülüen Moses. Iwe, a aüetä imwan imw mangaku arun ewe irä ook lon Sananim, arap ngeni Ketes.

¹²Iwe, lupwen Sisera a rongorong pwe Parak nöün Apinoam we mwän a feitä won ewe chuk Tapor,