Föför 2:2-22

²Iwe, a müttir fis eu ngüngü seni läng mi wewe ngeni ngüngün asepwäl mi pöchökül, a aurala unusen ewe imw ia we ra motfengen ie.

³Mürin ra küna chön mongö usun ekkei mi parasfeil, a feitiu won eman me eman ekewe aramas mi nom ikenan.

⁴Iwe, ir meinisin ra urela ren Ngünmifel o ra popuetä le kapas lon kapasen ekis usun Ngünmifel a amwelielier.

⁵A wor chon Juta mi niuokusiti Kot, ra nom lon Jerusalem, ra feito seni ekewe fanü meinisin won fanüfan.

⁶Lupwen ra rong ei ngüngü, eu mwichen aramas mi chomong ra chufengen. Ir meinisin ra rükö, pun eman me eman leir a rong än ekewe chon lükü kapas lon en me kapasen fanüan.

⁷Ra fokun mairü o weitifengeniir o ra apasa, “Ifa usun, ekei mwän meinisin mi kapas lon ekei sokun kapas, esap ir re Kalilea?

⁸Nge pwota chök pwe oukich meinisin sia rongorong ar kapas lon en me kapasen fanüach kewe sia uputiu lon?

⁹Sia feito seni Partia, Metia me Elam, seni Mesopotamia, Jutea me Kapatosia, seni Pontus me Asia,

¹⁰seni Frikia me Pamfilia, seni Isip me ekewe fanü lon Lipia arap ngeni Kirene. Ekoch me leich sia feito seni Rom,

¹¹kich chon Juta me chon lükün Israel mi etiwa ewe lamalamen chon Juta. Ekoch me leich sia pwal feito seni Kreta me Arapia, nge oukich meinisin sia rongorong ar kapas lon kapasen fanüach kewe usun ekewe mettoch mi amwarar Kot a föri.”

¹²Pokiten ar mairü me osukosuk ra aisfengen lefiler, “Epwe met wewen ei sokun lapalap?”

¹³Nge ekoch aramas ra takiri ekewe chon lükü Jesus o apasa, “Ekei aramas ra pulas.”

¹⁴Mürin Petrus a ütä fiti ekewe engol me eman soukünö o a popuetä le kapas leüömong ngeni ewe mwichen aramas, “Ämi pwii kana chon Juta me ämi meinisin mi imweimw lon Jerusalem, oupwe aüselingaei o mwüt ngeniei ai üpwe awewe ngenikemi wewen ei lapalap.

¹⁵Ekei aramas resap pulas usun oua ekieki. Ekärän chök kulok tiu lesosor.

¹⁶Nge iei usun met ewe soufos Sowel a kapas usun:

¹⁷‘Kot a apasa: Iei usun met üpwe föri lon ekewe ränin sopolan. Ngang üpwe tinato Ngüni won aramas meinisin. Nöümi mwän me fefin repwe osuni, nöümi alüal epwe wor künaer, ekewe chinlap mwän me leimi repwe soutatan.

¹⁸Pwal mwo nge nei chon angang mwän me fefin üpwe tinatiu Ngüni wor lon ekana rän, pwe repwe arongafeili ai kewe kapas.

¹⁹Üpwe awarato manaman seni läng o föri asisil won fanüfan. Epwe wor cha me ekkei me kuchu mi ötüöt usun ötüötün ekkei.

²⁰Akkar epwe rochola, nge maram epwe wiliti cha, mwen epwe war ränin ewe Samol, ewe rän mi lap o ling.

²¹Nge iö epwe köri iten ewe Samol epwe manau.’

²²“Ämi aramasen Israel, oupwe rong ekei kapas: Jesus seni Nasaret, eman aramas mi wor an pwüüng me ren Kot, usun a pwä ngenikemi ren ekewe tufich me manaman me asisil Kot a föri ren Jesus. Oua püsin silei usun ei, pun ra fis ikei lefilemi.