Moimai di vegu 2:2-22

²Kamini minari maka oma odorori kukuroka yokoi aura tora baedo kana bi baesi ini amegamadi yava noibanu vata baeyo.

³Ma minari bi ita afiye kana fairo resi urafo resi amiye yokoi yokoi odorori ameyadi mina veyadi.

⁴Vima kikifa yaku mina vene tau di roaita vata baeyo dada gokai magamo kana ina vene bi gagani be vene di ago nigamadi.

⁵Mina ariri Jew vene bi Jerusalem ri amegamadi, gagani gagani tau noibanu kono tora noibanu vene kaere bi Sei rofu nivakegamadi.

⁶Mina kukuroka neideyadiri, bi amiye tau gade iniye egogo resi ini vima diyadi, adina bi ina vene iniye ini ago neinei dudu ago nigamadi mina neideyadi.

⁷Ina vene ini mokena forovai rei vau resi niyadi, “Gua mina vene bi Galilee vene, ba?

⁸Gokai resi bi una tau vakoi neidesifa uniye uni gagani ago neinei nidedi bi?

⁹Una bi Parthia vene, Media vene, Elam vene; ma Mesopotamia, Judea ma Cappadocia, Pontus ma Asia rofu vene;

¹⁰ma Phrygia ma Pamphylia, Egypt ma Libya gagani rautu rautu, Cyrene taoni atafu rofu vene. Ma una be bi Rome rofu vene,

¹¹ma be bi Jew vene ma be bi Jew vene de kaere bi Jew vene di Sei nivakena vegu usi didedi; ma una be bi Crete vene ma Arab vene—idu mina vene bi Sei yaku beika vegu buni reyo bi uniye uni ago neinei dudu nidedi ma neidesifa!”

¹²Tururu resi mokena forovai dudu iniye iniye nikaitegasa niyadi, “Mina ini adina bi beika?”

¹³Be yaku ina vene rofu ni moi ninika nigasa nigamadi, “Mina vene bi waini ruaka tau gade iriyadi!”

¹⁴Kamini Peter dadisi ini nifeidena vene 11 sa are resi ago ni tora resi mina amiye tau rofu niyo, “Judea vene ma ya kaere Jerusalem ri amededi vene, nai ago nigida neidefo gua yomina vegu vededi di adina rama iniye bi beika.

¹⁵Yomina vene bi waini de irisi ada forovai de reyadi, yi mokededi kana. Ari uveyori meda nemoko bi 9:00 maka dada.

¹⁶Idu mina vegu vededi bi Sei di ago niyo amiye Joel yaku ini sena niyo kana:

¹⁷‘Sei yaku nido ari boi koina nibigediri, bi yomakai regida: Amiye tau fafau nai Vima moi rausi regida. Yi rumana mida mida ma rema mida mida yaku Sei di ago niokugedi; yi godua vene yaku yaduka kana vegedi, ma yi ugava vene yaku bi yaduka vegedi.

¹⁸Ka nai moimai rei tavoi rededi rema ma rumana fafau mirona medari nai Vima rausi regida, ma ina vene yaku Sei di ago niokugedi.

¹⁹Oma odorori mokena vegu resi kono fafau ka rebe regida. Bi dava, ita ma iroka tora ogau nigo;

²⁰meda bi baesi mukuna nigo, ma eyo bi dava kana kaka nigo, mina bi Varika amiye di meda tora ma buni tora gade baesi okina kode.

²¹Ye kaere yaku Varika amiye di roka raka nigo bi moi vegu rigo.’

²²“Israel vene, mina ago neidefo: Sei yaku ya vene rofu Iesu Nazareth amiye nifeidesi mokena vegu ma rebe vegu ya vene di tobori ini vana dudu regamo, ye ya ka ya diba.