Hechos 2:2-22

²San nima owaltlatékuinki kan ilwikak, kemi ijkuak tlaxojpitsa se ejekatl chikaktik, iwa omonawaloti ijtik nochi n kali kan yejwah oewatokah.

³Ijkuakó okinmonextilijkeh sikimeh kemi nenépilteh milintokeh non omoxexelojkeh impah nochteh.

⁴Iwa nochteh okiselijkeh n Espíritu Santo, iwa opé tlajtoah ika tlatlamanteh tlájtolteh. Iwa okijtoayah tlan n Espíritu Santo okinmiliaya makijtokah.

⁵Itech nonteh tonatijmeh, ompa Jerusalén okatkah miakeh judíojteh non satlawel okimopantiayah itlanawatil Moisés. Ninteh judíojteh owalajkeh de nochi lado de nin tlaltíkpaktli.

⁶Ijkuak okikakeh non tlatekuinílistli, san nima owalmoololojkeh miakeh tlakah, iwa mach ok okimatiah tlan kijtoskeh, porke yejwah opé kikaki kintlapowiah ika intlajtol.

⁷Yejwah satlawel omotlajtlachialtijkeh, iwa okijtojkeh: —¿Amo de Galilea nochteh ninteh non tlajtojtokeh?

⁸¿Tleka kiné, tikinkakih tlajtoah ika totlajtol non tejwah ipan otitlakatkeh?

⁹Nika kateh sikimeh tlakah de Partia, de Media, de Elam, de Mesopotamia, de Judea, de Capadocia, de Ponto iwa de Asia,

¹⁰de Frigia iwa de Panfilia, de Egipto iwa de tlalmeh de África, non kateh okachi tlayakapa de Cirene. Nika noiwa chantitokeh sikimeh tlakah de Roma.

¹¹Noiwa nika kateh sikimeh tlakah non owalajkeh de Creta iwa de Arabia. Iwa ika tejwah totlajtol tikinkakih kenijki yejwah kimijtoah n milagros non Dios yokinchi.

¹²Nochteh san omotlajtlachialtiayah iwa mach okimatiah tlan kijtoskeh, iwa omotlatlajtlaniayah: —¿Tlan kijtosneki nochi ni?

¹³Pero oksikimeh san otepijpinawiayah, iwa okijtoayah: —¡Ninteh tlakah wintitokeh!

¹⁴Ijkuakó Pedro omóketski iwa n májtlakteh iwa n se tlatematiltijkeh, iwa chikawak opé tlajtoa: —Judíos iwa nochteh akimeh nonchanchijtokeh nika Jerusalén, xikmatikah nochi ni, iwa kuali xikkakikah tlan nomechilis.

¹⁵Ninteh tlakah amo wintitokeh kemi nomejwah nonkimoliah, porke wel ok kualka, sikin las nueve de kuinal.

¹⁶Porke nochi tlan axa panotok, ye noni tlan yowejka okijto n profeta Joel:

¹⁷N Totajtsi Dios kijtoa: Itech sa iksemi tonatijmeh, niktitlanis no Espíritu itech nochteh n tlaltikpaktlakah. Nomopilwah iwa nomochpochwah kijtoskeh tlan tlamochiwas satepa. Nomotelpochwah kinmitaskeh neskayolteh iwa n tetajtsitsinteh tejtemikiskeh.

¹⁸Itech nekateh tonatijmeh niktitlanis no Espíritu itech n tlakah iwa siwameh akimeh tekiti nonawak, iwa tetlapowiskeh tlan satepa tlamochiwas.

¹⁹Tlakpak kan ilwikak iwa tlatsintla itech tlaltíkpaktli: nikinteititis neskayolteh, estli, tletl iwa méxpoktli.

²⁰N tonati ayakmó tlawis, iwa n metsi chichilewis kemi estli, achto de maajsiki itonati n Toteko, non tonati yetos weyi iwa mawistik.

²¹Iwa nochteh akimeh kitenewaskeh Itoka n Toteko, Ye kinmakixtis.

²²'Tlakah de Israel, xikkakikah tlan nomechilis: Jesús de Nazaret, Dios okipéjpenki. Nomejwah kuali nonkimatokeh, porke Dios okimák weletílistli para makinchiwa wejweyi neskayolteh nomoixpa, kemi nomejwah kuali nonkimatokeh.