Rantayetakeri 2:2-22

²Ari omapokapaakari antawoite kamenitapaintsiri oshiyawetapaakawo antawo tampyaa, okenapaake jenoki inkiteki, ookantapaakawo pankotsi risaikaiyakenira.

³Iñaawakitzi paampashithakeerekitapaintsiri, opeyantapaakari apaanipaini ikaatzi piyotainchari.

⁴Maawoini risaikashiretantapaakari Tasorenkantsi. Ari retanakawo riñaawaiyetanakero otsipasato ñaantsi, iriitakera Tasorenkantsi ñaawaitakaanakeriri.

⁵Okanta janta Jerusalén-ki, ari risaikayetziri Judá-ite poñaayetachari intaina otsipaki nampitsi. Iriiyetake pinkathatasorentsitaneripaini.

⁶Ikanta ikemaitakero kamenitapaintsiri, ripokaiyapaakeni osheki atziri, te riyotawakero oita awisatsiri, tema ikemathatakero apaanipaini ñaantsi okaatzi riñaawaiyeetziri, irootake riñaane.

⁷Iyokitzii ikantayetanaka, ikantawakagaiyani: “¿Tema Galilea-satzi rinatzi ñaawaiyetakerori otsipasato ñaantsi?

⁸¿Tsika okantaka akemantariri riñaawaitziro añaanepaini aaka?

⁹Tema atsipayetakari jaka Parto-satzi, Medo-satzi, Elam-satzi, Mesopotamia-satzi, Judea-satzi, Capadocia-satzi, Ponto-satzi, Asia-satzi,

¹⁰Frigia-satzi, Panfilia-satzi, Egipto-satzi, eejatzi Africa-satzi jekaatapai Cirene. Tema atsipatakari eejatzi poñaayetachari Roma, Judá-ite eejatzi kaari Judá-itetatsi pairani.

¹¹Eejatzi Creta-satzi, ipoñaapaaka Arabia-satzi. Ari atsipatakari maawoini irirori akemayetakeri riñaawaitantayetakawo añaanepaini, ikenkithatakotziri Pawa ritasonkawentantzi.”

¹²Iyokitzii ikantanaka atziripaini, te riyotzi oita iñiiri. Ikantawakagaiyani: “¿Oitaka jiroka?”

¹³Iro kantacha tzimatsi atziri thainkantaneri, ikantayetzi irirori: “¡Ishinkitaiyatyaani jirikapaini!”

¹⁴Ikanta ikatziyanaka Pedro irirori, itsipatakari Otyaantaperoriite ikaatzi 11, ikenkithawaitanake shintsiini, ikantzi: “¡Asheninká! ¡Jerusalén-satzipaini! Pinkemisantawakena piyotantyaari.

¹⁵Piñaawetaka eerokapaini ishinkitatya jirikapaini. Te, tema owakera reenokiityaapaake ooryaa.

¹⁶Imonkaatatya okaatzi rosankenatakeri pairani Kamantantaneri Joel-ni, ikantake:

¹⁷Ikantzi Pawa: Tzimatsi awisatsine weyaantapaakyaawone kiteesheri. Ari notyaantakeniri atziripaini Notasorenka oshiyawaitakawo risakoperoitatyeenirime. Ari inkenkithatakoyetanaina itomipaini eejatzi rishintopaini. Ari iñaawyaawaitakya mainaripaini, Eejatzi antarikitaintsiri rimishiwaiyetai.

¹⁸Ari nonkantakeri ewankaripaini ronampireyeetari, eejatzi ewankawopaini. Notyaantainiri Notasorenka paata, ari inkenkithatakaantayetai.

¹⁹Ari iñagaitake inkiteki kaari iñaapiintaitzi. Iñagaitero kipatsiki iraantsi, paampari, antawo oyachaarinka.

²⁰Iñagaiteri ritsiwakimate ooryaatsiri, Iñagaiteri eejatzi kashiri riratzimotante, Irootaatsi iyomaataiya kiteesheri ripokantaiyaari Pinkathari. Tema antawo rowaneenkawo onkantaiya.

²¹Inkaate aakotairine iwairo Pinkathari, rawentaayetaari, iriiyetake awisakoshiretaatsine.

²²¡Shiramparipaini! ¡Israel-iite! Pinkemaiyeni nonkante. Piñagaiyakerini eeroka, jirikaganki Jesús Nazaret-satzi, iriitake rotyaantakemiri Pawa. Ritasonkawentayetakemi, roñaagayetakemiro kaari piñaaweta pairani.