Deftere Kuuɗe Sahaabaaɓe Ɓen 2:2-22

²Tun nde wootere, hawa wa hendu tiiɗundu iwri ka kammu ari, hebbini suudu ka ɓe woni ɗon.

³Onsay wa ɗenɗe yiite feeɲani ɓe, ɗe sendondiri, ɗe woni e hoore mo kala e maɓɓe.

⁴Ɓe fow ɓe heewi *Ruuhu Seniiɗo on, ɓe nangani wowlugol e *haalaaji goo, mo bee e ko Ruuhu on longini ɗun.

⁵Tawi wa nden ɲande *Yahuudiyankeeɓe rewooɓe Alla iwruɓe e leyɗe aduna on fow no Yerusalaam.

⁶E nder ko hawa kan waɗata kon, jamaa mooɓinooɗo ɗon on jiiɓii sabu ko mo kala e maɓɓe nanaynoo ɓen no wowla e haala mun kan tigi kon.

⁷Ɗun ŋalɗini ɓe haa feƴƴiti, e hoore hiɓe wi'a: «Hara ɓee yimɓe wonɓe wowlude ɗoo fow hinaa ɓe diiwal Jaliilu?

⁸Ko honno nanirɗen ɓee no wowla e haala ka muynuɗen kan tigi?

⁹Ɗun ko enen ɓee Fartiyankooɓe e Maadiyankooɓe e Elaamiyankooɓe e ɓee hoɗuɓe Mesopotamii e ka diiwal Yahuuda e ɓe Kapadoosi ɓen e ɓe Pontii ɓen e ɓe *Aazii ɓen,

¹⁰e ɓe Firgii ɓen e ɓe Pamfilii ɓen e ɓe Misira ɓen e ɓee jeyaaɓe e ndii leydi Libii kawtirɓe e Sirenii e iwruɓe Roomu ɓen,

¹¹ɗun ko Yahuudiyankeeɓe ɓen e naatuɓe e diina Yahuudiyanke ɓen e jeyaaɓe Kereeti ɓen e Aarabeeɓe ɓen, enen ɗoo fow en nanii hiɓe wowla e haala mo kala e men fii kuuɗe Alla mawɗe ɗen!»

¹²Tawi ɗun no ŋalɗini ɓe fota ɓe fow haa hiɓe jiɓii, ɓe nangi wi'indirgol: «Ko honɗun ɗu'un holli?»

¹³Kono woɓɓe no awmotonoo ɓe, wi'a: «Ɓee ko yaruɓe haa mandili!»

¹⁴Ontuma Petruusu immodi e *sahaabaaɓe ɓen sappoo e go'o, o ewnii jamaa on, o wi'i ɓe: «Ko onon yo Yahuudiyankeeɓe e kala hoɗuɗo Yerusalaam, heɗitee konguɗi an ɗin, andon ɗunɗoo.

¹⁵Ko fii hinaa ko sikkuɗon kon, ɓee wonaa mandiluɓe nii, ko walluhaa on nii.

¹⁶E hino ko annabi Yuu'iila wi'unoo kon, himo wi'i:

¹⁷‹Alla daalii: Ka balɗe sakkitore mi tippinay Ruuhu an on e hoore kala tagaaɗo haa heewa. Onsay ɓiɓɓe mon worɓe e rewɓe haaloyay ko Alla longini ɗun, sukaaɓe mon ɓen yi'oya feɲɲinanɗe, mawɓe mon ɓen hoydoya koyɗi.›

¹⁸‹Kanko Alla o daalii kadi: Ko non woniri e ɗen ɲalaaɗe ɗon, mi tippinay Ruuhu an on e hoore jiyaaɓe an ɓen worɓe e rewɓe, ɓe haala ko ɓe longinaa.

¹⁹Mi waɗa kadi kaawakeeji ka kammu dow, e maandeeji ka hoore leydi, ɗun hara ko ƴiiƴan e yiite e duggal curki.

²⁰Naange ngen wayloo niɓe, lewru ndun kadi wayloo ƴiiƴan, ɗun ko ado ɲalaande Joomiraaɗo on hewtude, ɗun ko nden ɲalaande mawnde teddunde.

²¹Onsay kala jantotooɗo innde Joomiraaɗo on dandoyte.›

²²Kanko Petruusu o wi'i kadi: «Ko onon yo *Isra'iilayankeeɓe, heɗitee ɗii konguɗi an! Oo gorko wi'eteeɗo Iisaa, oo jeyaaɗo Naasirata, on mo Allaahu on ɓanginiri yeeso mon kaawakeeji moƴƴi e kuuɗe e maandeeji, kon ko Alla warri e makko e hakkunde mon, wano andirɗon non tigi,