HECHOS 2:2-22

²ꞌBa tukjiaꞌa janeya ngankꞌa jo ma nga ꞌñu faꞌa ntjo, ꞌba janeya niꞌya ña tjinduya.

³ꞌBa kuatsejen ngasun nindaku nga jngu jngu xutabiu kitsojosunre tsajmi xi jo kun najenre ndiꞌi.

⁴ꞌBa ngatsiꞌi kitse ngajinre Isennixtjintsjere Naꞌenchana. ꞌBa ꞌbatsaꞌen ꞌetutsꞌinre nga kinchja kjaꞌe kuanga en jotsaꞌen nga Isennixtjintsje kitsjare nga kuinchja.

⁵ꞌBa kui nixtjinbiu tjindu naxinanda Jerusalén nchja judío xi bekun Naꞌenchana, xi jendibani ngayéje nangi xi tjin ngasunꞌndebi.

⁶ꞌBa kuañajan ngatsiꞌi xutankjiun nga kjintꞌe siꞌa xi janeya, ꞌba bi be mé= xi sikjaꞌetsjen, ngatꞌa nga jngu jngu inyantꞌere enre.

⁷ꞌBa tu ꞌba= kjimare ꞌba kjimakunre nga tsiningiyare xinkjin: —¿A bi tsa xuta xi Galilea tseꞌe ngatsiꞌi xi ꞌbatsaꞌen inyanchja? —kitsure xinkjin—.

⁸¿Jótsaꞌen nga tenuꞌyani_ra nga inyanchja en xi mana nga jngu jngua?

⁹Ngatꞌa tjindujinna ngaꞌe xuta xi nangi Partia tseꞌe, xuta xi Media tseꞌe, xuta xi Elam tseꞌe, xuta xi ndibani nangi Mesopotamia, Judea, Capadocia, Ponto, Asia,

¹⁰Frigia, Panfilia, Egipto ko ngaꞌnde xi tjin nangi Libia xi tiñare naxinanda Cirene ꞌba ko xuta xi jendibani naxinanda Roma.

¹¹Tjin xi nchja judío ꞌba tjin xi bi judío tunga makjainre ngatꞌa tseꞌe Naꞌenchana. Tjin xuta xi Creta tseꞌe ꞌba ko xuta árabe. ꞌBa ngatsiꞌa tenuꞌya_ra nga enna inyatsuyani xutabi kjuaje xi tsaꞌen Naꞌenchana.

¹²ꞌBa ngatsiꞌi kuakunre ꞌba bi be mé= xi sikjaꞌetsjen. —¿Jó tsunire kibi? —kitsure xinkjin.

¹³—Chꞌi=ni nchjabiu —kitsu yakꞌa xi tu tsejnuke.

¹⁴ꞌBa ꞌbatsaꞌen Pedro tsakasen nduju ko nchja apóstol xi ngitejngu, ꞌba ꞌñu kinchja nga kitsure xuta naxinando: —Jun nchja judío ko ngatsiꞌu xi tetsubo naxinanda Jerusalén, ngatjaꞌyo ꞌba tasen ñojon mé= xi xin_nuu̱.

¹⁵Bi chꞌi nchjabi jotsaꞌen tenikjaꞌetsjion, ngatꞌa saꞌe= chuba ñajan nga tajñu.

¹⁶Kui=bi xi kitsutitjun xuta chinga profeta Joel:

¹⁷ꞌBi= ku̱an nixtjin xi fetꞌani, sja_ra̱ Isennixtjinna̱ ngatsiꞌi xuta, kitsu Naꞌenchana. Kiꞌndi xiꞌinnu ꞌba kiꞌndi yanchjinnu kuinchja ngatꞌana̱ joni jngu profeta, ꞌba nchja nistinu sꞌejñatsejenre mé= xi tijñaꞌmo, ꞌba nchja chinganu kuaꞌere chini xi kjuakixi.

¹⁸Kui nixtjinbiu sja_ra̱ Isennixtjinna̱ nchja chuꞌndana̱ ꞌba ko yanchjin chuꞌndana̱. ꞌBa kuinchja ngatꞌana̱ joni jngu profeta.

¹⁹Saꞌaa̱n kjuakun ngankꞌaa ꞌba chu̱ba̱ xi kuakutsejen kjuajena̱ tꞌanangiu, ꞌba sꞌe̱ jin ko ndiꞌi ꞌba ko niꞌndi xi yufi ni.

²⁰Tsuꞌbiu ku̱ajñu ꞌba naꞌenso ini ku̱an joni jin, kionga kje faꞌejín nixtjin nga kjuaꞌe Naꞌenna, nixtjin xi je ꞌba xi tjinre kjuaje.

²¹ꞌBa kꞌuangi ngatsiꞌi xi kuinchja jaꞌenre Naꞌenna.

²²’ꞌBamani jun naꞌen xi Israel tsojon, tasen ñojon mé= xi xin_nuu̱. Jesús xi Nazaret tseꞌe, kui jngu xuta xi Naꞌenchana yaku chuya ngajinnu. Ngatꞌa Naꞌenchana kitsjare kjuaꞌñu nga kitsaꞌen ngajinnu kjuaje ko kjuakun ko chuba xi yakutsejen kjuaꞌñure Naꞌenchana jotsaꞌen jun nda ꞌyo.