Di Aks 2:8-38

⁸Soh da how aala wi ku yehr dehn di taak eena eech a fi wee langwij?

⁹Yu ga peepl ya fahn aal bowt. Yu ga Paatyanz, ahn Meedz, ahn Eelamaits. Den peepl deh ya fahn Mesopotaymya ahn Judeeya, fahn Kapadosha ahn Pontus, ahn Aysha. Den yu ga peepl fahn Frijya, Pamfilya, ahn Eejip ahn fahn sohn paat a Libya weh deh kloas tu Saireen. Yu ga sohn vizitaz fahn Roam weh da Joo ahn ada peepl weh mi jain di Jooish rilijan, lang wid peepl fahn Kreet ahn Araybya. Wi yehr dehn di taak eena aala wi oan langwij bowt di grayt ting dehn weh Gaad du.”

¹²Dehn kudn bileev weh mi-di hapm, bot sayhn taim dehn mi kanfyooz. Dehn aks wan anada, “Da weh dis meen now?”

¹³Bot yu mi ga sohn ada peepl weh mi tek di hoal ting mek joak. Dehn seh, “Dehn peepl ya mosi mi-di jrink tu moch wain!”

¹⁴Den Peeta stan op wid di ada ilebm apasl dehn ahn staat tu preech haad-wan. “Mi felo Jooz, ahn aala unu ada peepl weh liv ya da Jeroosalem, Ah wahn eksplayn egzakli weh di goh aan rait ya soh; soh unu lisn gud tu weh Ah ga fi seh.

¹⁵Dehn peepl weh unu si ya noh jronk laik weh unu di tink, yu noh; kaa da jos nain aklak da maanin.

¹⁶Dis weh yu si di hapm ya da weh di prafit Joawel mi taak bowt fahn lang lang taim. Dis da weh Gaad tel Joawel:

¹⁷‘Dis da weh Ah wahn du eena di laas dayz: Ai wahn poar owt mi Spirit pahn evribadi. Unu son ahn unu daata dehn wahn preech weh Ai tel dehn fi preech. Unu yong man dehn wahn si vizhan, ahn unu oal man dehn wahn ga jreemz.

¹⁸Yes, eevn pahn mi servant dehn, man ahn uman sayhn way, Ah wahn poar owt mi Spirit eena dehndeh dayz. Ahn dehn wahn preech weh Ah tel dehn fi preech!

¹⁹Ah wahn du aal kaina mirakl ahn wandaz op eena di skai ahn dong ya pahn ert. Blod, faiya, ahn tik smoak wahn deh.

²⁰Di son wahn geh daak daak, ahn di moon wahn ton red laik blod, bifoa di grayt ahn wandaful Day wen di Laad wahn kohn bak.

²¹Ahn enibadi weh kaal owt tu di Laad fi help wahn geh sayv.’”

²²Den Peeta gaahn hed ahn seh, “Peepl a Izrel, lisn tu dis! Jeezas fahn Nazaret da-mi wahn man weh Gaad mi proov seh mi kohn fahn hihn, chroo di miraklz ahn wandaz ahn di sain dehn weh Gaad mi gi ahn di powa fi du. Unu noa dis da chroo, bikaa aala dis hapm rait ya monks unu.

²³Gaad mi plan fahn lang bifoa taim dat Jeezas mi wahn geh han oava tu unu. Ahn unu, lang wid sohn wikid peepl, mi nayl ahn pahn di kraas ahn kil ahn.

²⁴Ih sofa bad wen ih ded, bot Gaad neva lef ahn deh; ih rayz ahn op bak. Det neva ga no powa oava ahn agen, ahn kudn hoal ahn az ih prizna.

²⁵Dis da weh King Dayvid mi seh bowt ahn: Ih seh, ‘Ah aalwayz si di Laad fronta mi aal di taim. Sayka weh ih deh rait saida mi, Ah noh hafu wori bowt notn.

²⁶Ahn soh mi haat oanli feel glad, ahn mi mowt sing ih prayz. Eevn doa Ah da flesh ahn blod, Ah ga kanfidens dat yoo, Gaad,

²⁷noh wahn lef mi eena di plays a di ded, ner lef yu Hoali Wan fi ratn eena di grayv.

²⁸Yu shoa mi di way weh leed tu laif, ahn bikaa yu deh wid mi, Ah oanli feel hapi.’

²⁹“Mi brejrin, Ah shoar seh dat wen wi grayt-grayt-grayt-granfaada King Dayvid mi seh dehndeh ting, ih kudn a mi-di taak bowt ihself bikaa hihn don ded ahn beri, ahn fi hihn grayv stil deh ya wid wi op tu dis day.

³⁰Dayvid da-mi wahn prafit, ahn hihn mi noa weh Gaad mi pramis ahn: Gaad mi mek wahn vow dat ih mi wahn mek wan a fi hihn disendant dehn bee wahn king, jos laik hihn.

³¹Dayvid mi-di si weh Gaad mi wahn du eena di fyoocha, ahn soh hihn mi-di taak bowt di day wen di Krais mi wahn rayz op bak fahn di ded. Ih seh, ‘Hihn mi neva geh lef eena di plays a di ded, ahn fi hihn badi neva ratn weh eena di grayv.’

³²Soh Gaad rayz op dis Jeezas fahn di ded, ahn aala wee da witnis tu dis.

³³Gaad gi Jeezas di bigis aana wen ih put ahn fi sidong da ih rait han said; ahn ih gi ahn di Hoali Spirit jos laik how ih mi pramis, soh dat hihn ku ful wee op wid ahn tu. Dis da weh unu di si ahn yehr ya tudeh.

³⁴Yu si, da neva Dayvid weh mi gaan op da hevn. In fak, Dayvid mi seh, ‘Di Laad seh tu fi mee Laad, “Sidong rait ya da mi rait han said,

³⁵til Ah put yu enimi dehn anda yu fut laik wahn futstool.”’

³⁶“Peepl a Izrel, mek Ah mek it klyaa dat di sed Jeezas weh unu mi kroosifai, da hihn Gaad ton rong ahn mek Laad ahn Krais.”

³⁷Wen di peepl dehn yehr dis, dehn mi oanli feel bad. Soh dehn aks Peeta ahn di ada apasl dehn, “Mi brejrin, da weh wi fi du?”

³⁸Peeta ansa dehn ahn seh, “Unu ton fahn unu sin dehn, aala unu, ahn geh baptaiz eena di naym a Jeezas Krais, soh dat Gaad ku fagiv unu a unu sin dehn, ahn gi unu di Hoali Spirit weh ih mi pramis.