Buka Linge 132:1-16

¹Na linge ni tona dato tana lei nina vahaghitaili David, Lord ko ghanaghana olia.

²Gaia te lavia na baubahu tana matana Lord, me hola na bosa ni papari itatana siki sakai te laga vule Israel.

³Inau ku tona keha tana valegu, mu ku mua ahevata iga.

⁴Inau ku mua maturuhighi na matagu, pana vauvahu ni matagu ge kara maturu mate.

⁵Polo ku topoa na bona ku kisua ga na vale vania Lord, na beala ni ahevata vania siki sakai te laga vule Israel.

⁶Ighai tai rongovia na vaevale baubahu tabu, te ghaha Ephrathah, mai vahu sodoa tana bona sagau, pari bebetena i Jaar.

⁷Mai ghita ka tona tana bona ni valena Lord, ma ka kikinima vania ga tana matana.

⁸Tapatughuru, Ghe Lord, mo ko haghevia na bonamu te tabu, kolua na Bokisi ni Vetena ni Baubahu tabu, te vaughilala nimua na maana.

⁹Nimua na mane sukaghi kara hola tughua nimua na maana ni vola, Ma nimua tinoni lutu kara tughuru kehai, kara nia linge na togotogo.

¹⁰Na pukuna nimua na tinoni lutu David, ko bei koengelea gea na vunaghi to vilia tua vanira nimua na vure.

¹¹Gaia Lord te papari vania David, ge ke mua laviolia nina bosa baubahu. Inau ku talua a sakai tadira, na vavatamu tana malei sopoumu.

¹²Ke vagha na vavatamu kara taonia nigua na bosa baubahu, Ma kara kabu taonia na vetena tu taraira nia ke, mana vavatamu ke mua soko.

¹³Gaia Lord heghena tua te vilia Jerusalem, te ghanaghana dila ge ke puku ni komuna.

¹⁴Ge bosa, aeni na puku ni komugu, igaa ku ghaha kasilau, mu ku ghahau igaa na komu tu vilia tua.

¹⁵Inau ku nea na komu eni ge ke halilaghi, ge na lei tinoni bona kara nia mahu na vanga.

¹⁶Inau ku nera na puku ni soni sukaghi ge kara hola tughua na mana ni vola, ge na lei nina vure God kara nia linge na togotogo.