Ola Saam 132:1-16

¹YAWEI, yu nomo fogedabat Deibid, en ola adtaim imbin abumbat.

²YAWEI, yu jinggabat wanim imbin pramis langa yu, det haibalawan God blanga Jeikob,

³“Ai kaan gobek langa kemp o gobek blanga leidan langa bed,

⁴en ai kaan abum spel o silip,

⁵raidap ai meigim haus blanga YAWEI, det haibalawan God blanga Jeikob.”

⁶Wibin irrim stori langa Bethlahem blanga det Seikridwan Boks, en wibin faindim im deya langa det pedik gulijap langa det taun gulum Jerim.

⁷Melabat bin tok, “Kaman! Wi garra go deya langa det Serramoni Pleis blanga YAWEI en wi garra nildan en weship im lida langa im speshalwan tjeya.”

⁸YAWEI, kaman en jidan deya langa yu Serramoni Pleis garram det Seikridwan Boks, weya pipul sabi yu pawa oldei jidan.

⁹Larram ol detlot serramonimen blanga yu oldei dum wanim rait olataim. Larram ol yu pipul olabat jingat adbala gudbinjiwei.

¹⁰YAWEI, yubin meigim pramis langa yu wekinmen Deibid. Nomo gibit bekboun langa im, det king weya yubin pikimat.

¹¹Yubin meigim brabli strongwan pramis langa Deibid, en yu garra oldei kipum det pramis. “Ai garra oldei meigim wan san blanga yu femili lain jidan king.

¹²If dei jidan trubalawei langa main strongbala pramis, en if dei teiknodis langa wanim ai dalim olabat, wal dei garra kipgon jidan king.”

¹³YAWEI bin pikimat Saiyan, en im wandim meigim tharran im kemp.

¹⁴“Iya na ai garra jidan olagijawan, en iya na ai wandim jidan bos.

¹⁵Ai garra gibit Saiyan ebrijing im wandim, en ai garra meigim ola powan pipul sedisfaid garram daga.

¹⁶Ebrijing detlot serramonimen dum ai garra gudbinji langa olabat, en ola pipul garra sing ola song gudbinjiwei.