SALMOS 132:1-16

¹TOTECO, xiquilnamiqui David huan quejatza tlaijiyohui.

²Xiquilnamiqui quejatza David tlatestigojquetzqui ica ta, TOTECO, tlen tiiTeco Jacob, Tlen Tijpiya Nochi Chicahualistli.

³Quiijto: “Ax nicalaquis nocalijtic, niyon ax nimotecas ipan notlapech para nicochis.

⁴Ax niixijcopis, niyon ax nicochis niyon se tlalochtli,

⁵hasta nijpantis se lugar campa huelis nijchihuas ichaj TOTECO para ipan ma mocahua, yajaya tlen iTeco Jacob, Tlen Quipiya Nochi Chicahualistli.”

⁶Tijcajque camatij ipan tlali Efrata para icaxa TOTECO eltoya nopano, huan teipa tijpantijque huejca tlen altepetini ipan cuatitlamitl.

⁷Huajca ama ma tiyaca ipan itiopa Toteco. Ma tiyase timotlancuaquetzatij iixtla para tijhueyichihuase.

⁸TOTECO, ximotlalana huan xicalaqui ipan nopa tiopamitl campa eltoc mocaxa, tlen quiixnextía mochicahualis.

⁹Nopa totajtzitzi tlen tiquintlapejpenijtoc ma moquentica ininyoyo chipahuac tlen quinixnextía para tlatzejtzeloltique, huan nochi tlacame tlen tiquiniyocatlalijtoc ma tzajtzica ica paquilistli.

¹⁰NoTeco, pampa tiquicnelía motlatequipanojca David, amo ximoicancuepa tlen nopa tlanahuatijquetl tlen ta tijtlapejpeni, para quinnahuatis motlacajhua.

¹¹Pampa ta, TOTECO, tijtlajtolcahuili David, huan ax quema tiquilcahua tijchihua tlen tijtlajtolcahua. Huan ta tiquilhui para teipa tiquintlalis iixhuihua ipan isiyaj para tlanahuatise.

¹²Huan intla iixhuihua quichihuase tlen quiijtohua nopa tlajtolsencahuali tlen tijchijqui ica David huan intla quitlepanitase motlajtol, huajca inijuanti nojquiya mosehuise ipan isiyaj para tlanahuatise para nochipa.

¹³Pampa ta TOTECO, tijtlapejpenijtoc altepetl Jerusalén para tiitztos nopano.

¹⁴Tiquijto: “Ya ni elis nochaj campa niitztos para nochipa. Nopano nimocahuas pampa ya nopa tlen nijnequi.

¹⁵Nijtiochihuas ni altepetl miyac huan niquintlamacas itlacajhua tlen teicneltzitzi.

¹⁶Niquinmaquixtis itotajtzitzi tlen nochi tlen quinequij quincocose, huan itlatzejtzeloltijca tlacajhua tzajtzise ica paquilistli.