Atos 9:16-24

¹⁶Sauru osanumãko toh mana itamurume jomiry poko tamoreparykohtao, jomipona aexiryke. Moro ekarõko ase eya, tykase.

¹⁷Morarame Anania toytose Juta tapyĩ taka, Sauru enese. Epona tomary tyrise eya. —Jepe Sauru, Jezu nosenepoase oya osemae ooepyryhtao. Mokyro jenehpo oya õsenuhmatohme ropa, Ritonõpo zuzenu ekarotohme oya, tykase Anania.

¹⁸Axĩ toepukase kana puhturu panõ enuru ae. Moro esahpyo kure ropa toehse ynororo. Tõsenuhmase ropa. Morarame tõpurihkase ynororo rahkene.

¹⁹Mame tõtuhxĩpo tyjamihtase ropa ynororo. Moroto tuhke pyra tõmehse Sauru Jezu poetory tõ maro, Tamaxikupõkõ maro.

²⁰Morarame juteu tõ oturutoh taka toytose ynororo morotaõkõ amorepase Jezu poko. —Ritonõpo mũkuru nymyry mokyro, tykase ynororo.

²¹Mame Sauru etaryke tyya xine toemynyhmase toto. —Ajohpe pyra mosero Jezu poetory ryhmahpõ Jerusarẽ po? Xiaro noepyase roropa Jezu poetory poko, tymyhse toto arotohme tyya Ritonõpo maro oturukety a ekarotohme, tykase toto, tõturuse oxime rokene.

²²Mame orẽpyra tõturuse ynororo Jezu Kyrixtu poko, —Ritonõpo mũkuru nymyry mokyro, tykase ynororo toto amoreparyme. Mame orẽpyra Sauru exiryke tõtururukõ tupise toto a, juteu tomo a, Tamaxikupõkomo a.

²³Morarame tuhke tynyhse ahtao juteu tõ tõturuse Sauru poko, —Setapatone, tykase toto.

²⁴Yrome Sauru tuaro. Totapary se exiketõ poko tuaro ynororo. Osema apuru pũto eraximãko toh kynexine, kokoro rokene, koko, saereme, enara, Sauru tũtary eraximãko, apoitohme tyya xine repe.