ሃዋሬታ ኦሱዋ 9:16-24

¹⁶ኣይስ ጊኮ፥ ታ ሱንꬃ ጊሾ ኢ ኣይ ሜላ ዋዬ ኤካናው ቤሲያኮ ታኒ ኢያ ቤሳና» ያጊስ።

¹⁷ሃናኔይ ቢዲ፥ ሶ ጌሊዲ፥ ባ ኩሺያ ሳዖላ ቦላ ዎꬂዲ፥ «ታ ኢሻ ሳዖላ፥ ኔኒ ያ ኦጊያን ኔው ቤንቲዳ ጎዳ ዬሱሲ፥ ኔኒ ፄላና ሜላኔ ጌሻ ኣያናን ኩማና ሜላ ታና ኪቲስ» ያጊስ።

¹⁸ኤሌሲዲ፥ ሳዖላ ኣይፊያፔ ኢሲ ፖቆ ሜላባይ ዎꬊን፥ ሳዖሊ ናምዓንꬆ ፄሊስ። ቃሲ ዴንዲዲ ፃማቄቲስ።

¹⁹ካꬂ ሚዲ ፃሊዲ፥ ዳማስቆን ዴዒያ ኣማኔይሳታራ ጉꬃ ጋላስ ጋምዒስ።

²⁰ኤሌሲዲ ሳዖሊ፥ «ዬሱሲ ፆሳ ናዓ» ያጊዲ ዳማስቆን ዴዒያ ኣይሁዴ ዎሳ ኬꬃታን ቃላ ታማርሲስ።

²¹ሄሳ ሲዒዳ ኡባይ ማላሌቲዲ፥ «ሃይሲ ዬሩሳላሜን ዬሱሳ ሱንꬃ ፄጌይሳታ ቃቼይሳ ጊዴኔዬ? ቃሲ ሃ ዪዳይ ኤንታ ቃቺዲ፥ ካሂኔ ሃላቃታ ሲንꬄ ኤፋናሳ ጊዴኔ?» ያጊዶሶና።

²²ሺን ሳዖሊ ቃላ ኦዶን ሚኒ ሚኒ ቢስ። ዬሱሲ፥ ኢ ኪሪስቶሳ ጊዴይሳ ቆንጪሲዲ ኦዲዳ ጊሾ ዳማስቆን ዴዒያ ኣይሁዴቲ ኢያው ዛሪያባ ꬋዪዶሶና።

²³ዳሮ ጋላሳፔ ጉዬ ኣይሁዴቲ ሺቂዲ፥ ሳዖላ ዎꬋናው ዞሬቲዶሶና።

²⁴ሺን ኣይሁዴቲ ባና ዎꬋናው ቆፒዳይሳ ሳዖሊ ሲዒስ። ኤንቲ ኢያ ዎꬋናው ቃማኔ ጋላስ ካታማ ፔንጊያን ናጎሶና።