Aposotolo Adi Hewau 25:5-21

⁵Tanutanuaga aridi eai i ene, “Headi omi maidamiuyao au laoma ta laulau, teina tau ta ena laulau baaea saha eo saha arinai abo au hegiru.”

⁶Ie mia aridi eai asubena haligigi‐haiona e saudoudoi abo i dobi Kaisarea eai: mara‐ie‐tom hedudurai abababawana arinai i bawasae abo i hetaladuidi Paulo abo se woeaiama.

⁷Ia ie lage, Iudea tataodi wa Ierusalema eai se dobima se torohetaiiri, ribariba taubiga gamagamagari se toreheohisaedi Paulo potana eai, riba tauhetuhetubudi wa nige abina se ata se hemamohoiedi.

⁸Paulo edi riba i hemaisa i ene, “Iudea edi laugagaeo eau nige ea utusidi, numa tabuna hinage eau nige ea hebaaea, eo Kaisara hinage nige ariariri.”

⁹Na Peseto, Iudea tataodi bena i henualolodi, Paulo arinana i heuio i ene, “Oa bena u sae Ierusalema wa, nei eai eau matagu eai teina riba ta aniona abo ta hedudurai?”

¹⁰Paulo abo i ene, “Eau Kaisara ena hedudurai aba babawana eai ea totoro: emi aba heduduraigu mamohoina ede meta: Iudea tataodi nige ea hebaaeadi doha abina u ata ariri.

¹¹Taba egu laulau se baaea, eo mate laulaudi ea abiwataidi, mate nige ea awayagaraei: na teina riba ta arinai se hegirunapaigu mo taba nige tau esau i woealaegu isi aridi eai. Kaisara esana ea atai.”

¹²Peseto, tauoigogo wa maedi se ribariba lautom, abo ia arinana i heuio, i ene, “Oa Kaisara esana u atai wa? Taiede Kaisara arinai abo u lau.”

¹³Asubena headi se lauo Ageripa eanua wasawasana eo Bereniki, Kaisarea eai se lage bena Peseto se aitoiei.

¹⁴Asubena gamagamagari se miamia nei eai, Peseto Paulo ribana wasawasa wa i heriba, i ene, “Tau auauna esau ia ede nei Peliki i toregabaei:

¹⁵eau Ierusalema eai, kohena lailaidi eo Iudea babadadi se heribagu, eo se awanorigu ia bena ea hemata’ila.

¹⁶Eau ea heribadi ea ene, Roma edi laulau ede teina, tabu tau esau se ununapai mo, tauhegiruna isi ia se ribataubiga se totoro ia matana eai, ena baaea se ribaei, e se riba lautom, abo hinage arinadi i heuio.

¹⁷Arinai abo se oigogoma inai, mara‐ie‐tom hedudurai ababawana eai ea bawa ea hetaladuidi wau tau wa abo se woeaiama.

¹⁸Tauribataubiga abo se toro mata wa se hasari se ribataubiga gaibu mo, edi riba wa nige aniona.

¹⁹Isi edi tabatabaohu mo ribadi se ribaedi, eo tau esau esana Iesu ribana, ia i mateo, na Paulo i ene i mauri.

²⁰Edi riba ta nuagu i ponoponoei arinai ea hesio ia arinai, ea ene, ‘Oa bena u lau Ierusalema, nei eai wau riba wa abo se hedudurai?

²¹Paulo bena i bagibagi mo, na Aoguso ena hedudurai mo i awanorini, arinai ea hetaladuidi ia se itawatai i lau e sora abo ea hetamari i lau Kaisara arinai.”