Aposolo Jaŋere Binaŋ 25:5-21

⁵Paulo bahacdâŋ‐ticne muzo murâ ŋoŋeraonec micne bapa nohec mâmâc hurâ munʒepieŋ.”

⁶Iŋuc murâ ʒoaŋ 8 me 10 Jerusalem haeo jurâ Kaisarea haeo rahuwec. Izi hae fureme dâŋficko ferâ mume Paulo bafembiŋ.

⁷Ficko feme Jerusalem haeonec Judaŋic jaŋe orâŋkerâ samarierâ qorickehuc domambiŋ. Erâ qoqoricte fârine mi fuawec.

⁸Mupie Paulozi dâŋjeŋic bawahahuc ʒiŋuc muwec: “No Judaŋic sâcmutâc dâŋjeŋic me taha ufuŋ me Roma ŋicwofuŋ moc mi musuaekopac.”

⁹Eme Festozi Judaŋic bubiaŋ qajareocte Paulo indiŋkerâ muwec, “Go Jerusalem haeo jowacgu ferâ ira dâŋge mutarape me?”

¹⁰Indiŋkeme Paulozi ʒiŋuc âzâcnewec: “Roma ŋicwofuŋte dâŋfic ʒine hâcne; nore dâŋ ʒira mutarazo; go gahac fuŋne‐nane manakic, no Judaŋic wiac hehesic moc mi ejarepo.

¹¹No bahac me kiŋsâko moc bâfuarâ muzac, nuzo mutec sahac‐nane mi sakarezapo. Jaŋe ine burecko qoricnuŋgopieŋte moczi moc bubiaŋ qajarehuc jaŋere meo sâcne mi râecnu‐jâmbâŋkeocmu. Irec ʒi Roma ŋicwofuŋzi dâŋnane mutaraocte mukopac.”

¹²Iŋuc mume Festo e ŋicfâc‐ticne jaŋehec muc manac erâ Paulo ʒiŋuc âzâcnewec: “Ŋicwofuŋ sâkore mukomec, irec ŋicwofuŋ sâkorao razemec.”

¹³Ʒoaŋ gie bapa tucne tarame ŋicwofuŋ Agripa â seŋticne Beanike jahe Kaisarea haeo hurâ Festo âgo bapic.

¹⁴Eme jahe ʒoaŋ gâcne ehec ŋeŋe juju ehapire Festozi Paulore dâŋ binaŋ ecnehuc ŋicwofuŋ ʒiŋuc âzâcnewec: “Felikizi kâpâcwâru ŋic moc beherâ rame ŋehuc jukac.

¹⁵Eme no fisirâ Jerusalem haeo fepe taha bapa micne â Judaŋic jaŋere soŋaŋ jaŋe norao tumaŋnehuc ŋic e qape hâmoocte munarembiŋ.

¹⁶Munarepie no dâŋ ŋifecne ʒiŋuc jazapo: ‘Romaŋic nâŋe qoqoricte sawa ŋic moc ʒikare mi qikiŋneeŋgopeneŋ. Nâŋe ŋic dâŋko râekicne e mecne â dâŋrune mecne mâmâc hetumaŋ‐jopapene ŋifec â ŋifec dâŋ sâckoa mueŋgopieŋ.’

¹⁷Iŋuc jazape Judaŋic norao warepie izia hae fureme jaŋe â e dâŋficko bâturec‐jopapo.

¹⁸Eme jaŋe ere sâqocne qizecne moc mufuaniŋmu muhape

¹⁹jaŋe miti‐jeŋicte hehefaric dâŋ â ŋic hâmokicne moc ʒâŋene Jesu ere dâŋ bajumbiŋ; ŋic ere hâcne Paulozi ʒiŋuc muekac: ‘E faharewec jukac.’

²⁰Eme no dâŋ iŋucnere kâuc barâ Paulo Jerusalem haeo feme ira dâŋticne mutarapemurâ âzâcnepo.

²¹Âzâcnepe Paulo e Roma ŋicwofuŋzi dâŋticne mutaraocte muwec. Eme Paulo e rara dameŋ maickeme mupe Roma ŋicwofuŋtao raocte kâpâcwâru ficko woŋec jukac.”