ᤛᤣ᤺ᤰᤕᤢᤰᤔᤡᤒᤠᤜᤠ᤹ 25:5-21

⁵ᤜᤧᤰᤁᤣ᤺ᤸᤗᤧ ᤂᤡᤏᤡ᤹ᤀᤥ ᤁᤢᤓᤠ ᤗᤠᤶᤗᤥ᤺ᤒᤠᤜᤠ᤹ ᤀᤡᤱᤃᤠ᤹ᤏᤢᤀᤣ ᤌᤩᤧᤶᤔᤧ᤹ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤛᤧᤰᤂᤠᤀᤣ ᤐᤠ᤺ᤴ ᤑᤣ᤺ᤴᤍᤢᤀᤠᤱ ᤘᤠ᤹ᤏᤧ ᤑᤠ᤹ᤃᤪ ᤁᤢᤍᤰᤗᤧᤱᤘᤠᤀᤥ ᤜᤠᤖᤠ᤹ ᤂᤧᤵᤔᤥᤀᤣ ᤀᤠᤵᤋᤡᤰ ᤁᤢ᤺ᤳᤋᤧᤶᤔᤧ᤹ᤀᤥ॥”

⁶ᤜᤧᤰᤁᤩᤠᤱ ᤑᤧᤛ᤻ᤋᤛᤧᤴ ᤕᤖᤢᤛᤗᤧᤶᤔᤥ ᤕᤧᤳᤇᤡ ᤕᤧᤴᤏᤠᤱᤎᤥ ᤌᤡᤒᤥ᤺ᤱ ᤕᤧᤴ ᤌᤠᤖᤡᤰ ᤕᤠ᤺ᤰᤋᤧᤀᤠᤱ ᤂᤢᤏᤧ᤹ ᤛᤡᤈᤖᤡᤕᤠᤀᤥ ᤌᤩᤧᤒᤣᤖᤥ॥ ᤕᤖᤡᤰ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤀᤠᤱ ᤂᤧᤵᤔᤥ ᤔᤧᤒᤣ॥ ᤛᤡᤈᤖᤡᤕᤠ ᤁᤧᤖᤧᤒᤠ ᤁᤢᤍᤠ᤺ᤴᤍᤡᤰᤔᤠ ᤂᤠᤛᤧᤴ ᤕᤢᤰᤏᤠᤀᤥ ᤕᤢᤱᤛᤡᤱᤅᤠᤱ ᤐᤠᤘᤗᤧᤴ ᤂᤧᤵᤔᤥ ᤔᤧᤍᤠᤖᤢᤏᤡ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥

⁷ᤐᤠᤘᤗᤧᤴ ᤂᤧᤵᤔᤥ ᤔᤧᤍᤠᤖᤢᤀᤠᤱ ᤕᤖᤢᤛᤗᤧᤶᤗᤠᤶ ᤁᤧᤕᤢ᤺ᤒᤠ ᤕᤜᤢᤍᤡᤜᤠ᤹ ᤂᤢᤏᤧ᤹ ᤁᤢᤄᤡᤖᤡ ᤔᤧᤕᤧᤶᤛᤡᤱᤅᤠᤱ ᤐᤕᤶ ᤕᤶᤒᤠ ᤀᤠᤵᤋᤡᤰᤜᤠ᤹ ᤁᤢ᤺ᤵᤔᤠ ᤔᤧᤜᤣ᤺ᤰᤋᤢ. ᤁᤖ ᤂᤢᤏᤧ᤹ ᤔᤧᤃᤢ᤺ᤳᤋᤢᤒᤠ ᤀᤠᤵᤋᤡᤰᤜᤠ᤹ ᤛᤧᤰᤂᤠᤀᤣ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤔᤠ ᤔᤧᤴᤇᤢᤰᤋᤢᤴᤗᤥ॥

⁸ᤜᤧᤰᤁᤩᤠᤱ ᤐᤠᤘᤗᤖᤧ ᤏᤠᤱᤛᤡᤱᤗ ᤀᤰᤂᤣ ᤔᤧᤳᤋᤢᤛᤡ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤕᤜᤢᤍᤡ ᤛᤠᤶᤕᤥᤌᤡᤶ. ᤔᤠᤱᤜᤡᤶ ᤏᤢ ᤖᤥᤔᤡ ᤜᤠᤱᤈᤢᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣᤀᤠᤱ ᤑᤧᤴ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤘᤠ᤹ᤀᤠᤖᤥ॥”

⁹ᤁᤖ ᤑᤧᤛ᤻ᤋᤛᤖᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤐᤠᤘᤗᤧᤴ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤁᤧᤶᤃᤢ᤺ᤳᤋᤧᤒᤠ ᤀᤠᤵᤋᤡᤰᤁᤡᤸᤗᤧᤴ ᤋᤢ᤺ᤴᤍᤣ᤹ᤖᤧ ᤂᤠᤛᤧᤴᤏᤡᤴ ᤌᤥ ᤕᤖᤢᤛᤗᤧᤶᤔᤥ ᤀᤠᤍᤃᤡ ᤐᤥ᤺ᤱᤏᤡ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤈᤥᤃᤢᤒᤡ᥅”

¹⁰ᤐᤠᤘᤗᤖᤧ ᤏᤥᤃᤵ ᤐᤡᤖᤢ. “ᤔᤧ᤺ᤴᤗᤥ. ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤛᤡᤈᤖᤧᤸᤗᤣ ᤁᤢᤄᤠᤛᤧᤴ ᤕᤢᤰᤏᤠ᤺ᤸᤗᤣ ᤁᤢᤍᤃᤡ ᤕᤧᤵᤐᤠ᤹ᤖᤥ॥ ᤁᤵᤔᤥᤀᤣ ᤀᤡᤱᤃᤠ᤹ ᤀᤠᤍᤢ᤺ᤴᤍᤣᤸᤗᤧᤴ ᤂᤠᤛᤧᤴ ᤐᤥ᤺ᤱᤔᤠ ᤐᤥ᤺ᤱᤗᤥ॥ ᤌᤣᤀᤠᤱᤓᤧᤸᤗᤧ ᤕᤜᤢᤍᤡᤜᤠ᤹ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤀᤡᤱᤃᤠ᤹ ᤌᤣᤀᤠᤱ ᤑᤧᤴ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤘᤠ᤹ᤀᤠ ᤁᤧᤗ᤹ᤒᤠ ᤀᤠᤍᤠᤱᤒᤠᤖᤧ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤠᤱ ᤁᤧᤘᤠ᤹ᤖᤥ॥

¹¹ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤂᤥ᤺ᤔᤠ ᤌᤡᤶ ᤑᤣ᤺ᤴᤍᤢᤱᤅᤠᤱ ᤘᤠ᤹ᤀᤠᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤛᤡ᤺ᤔᤠ ᤐᤥ᤺ᤱᤛᤠᤱ ᤔᤧᤀᤳᤋᤢᤱᤅᤡᤴᤗᤥ॥ ᤁᤖ ᤀᤡᤱᤃᤠ᤹ ᤔᤧᤃᤢ᤺ᤳᤋᤠᤱᤒᤠ ᤀᤠᤵᤋᤡᤰ ᤐᤠ᤺ᤴᤏᤥ ᤛᤧᤰᤂᤠ ᤐᤠ᤺ᤴ ᤜᤥ᤺ᤵᤐᤠᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤸᤗᤧᤀᤠᤱ ᤀᤡᤱᤃᤠ᤹ ᤂᤢᤏᤡ᤹ᤀᤥ ᤜᤢᤰᤛᤢᤵᤔᤠ ᤔᤧᤴᤇᤢᤰᤁᤠᤴᤗᤥ॥ ᤀᤡᤱᤃᤠ᤹ ᤖᤥᤔᤀᤥ ᤜᤠᤱᤕᤢᤰᤐᤠ ᤛᤡᤈᤖᤖᤧᤸᤗᤥ ᤀᤠᤍᤢ᤺ᤴᤍᤣᤸᤗᤧᤴ ᤂᤠᤛᤧᤴ ᤐᤥ᤺ᤱᤗ ᤑᤠ᤹ᤀᤠᤱ ᤕᤧᤰᤐᤣᤗᤡ ᤆᤥ᤺ᤰᤁᤠᤖᤥ᥄”

¹²ᤑᤧᤛ᤻ᤋᤛᤧᤴ ᤁᤢᤛᤢᤈᤠᤛᤠᤒᤠᤜᤠ᤹ᤏᤢ ᤋᤠ᤹ᤈᤧᤰᤂᤧᤀᤠᤱ ᤐᤠᤘᤗᤧᤴ ᤔᤧᤳᤋᤢ. “ᤂᤧᤏᤧ᤹ ᤛᤡᤈᤖᤗᤥ ᤕᤧᤰᤐᤣᤗᤡ ᤁᤧᤈᤥᤃᤢᤀᤠᤱ ᤁᤧᤘᤠ᤹॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤛᤡᤈᤖᤗᤥᤀᤣ ᤐᤠᤱᤏᤧ᤹ᤖᤥ॥”

¹³ᤁᤢᤓᤠ ᤕᤧᤴ ᤀᤣᤃᤠᤱ ᤀᤃᤪᤡᤐᤠ ᤜᤠᤱ ᤏᤢ ᤁᤢᤴᤈᤣᤗᤡ ᤒᤷᤏᤡᤛᤧᤴ ᤛᤢᤜᤠᤱᤃᤧᤶᤒᤠ ᤑᤧᤛ᤻ᤋᤛᤧᤴ ᤋᤢᤶᤍᤢᤶ ᤗᤠᤱᤍᤠ᤺ᤰᤛᤧ ᤛᤡᤈᤖᤡᤕᤠᤀᤥ ᤋᤩᤧᤳᤇᤡᤖᤥ॥

¹⁴ᤂᤢᤴᤇᤡ᤹ ᤕᤖᤡᤰ ᤕᤧᤴ ᤘᤕᤧᤳᤇᤡᤸᤗᤧ ᤑᤧᤛ᤻ᤋᤛᤖᤧ ᤀᤃᤪᤡᤐᤠ ᤜᤠᤱᤅᤡᤴ ᤐᤠᤘᤗᤖᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤔᤧᤳᤋᤢ. “ᤑᤧᤗᤡᤰᤛᤧᤴ ᤁᤵᤔᤥᤗᤠᤶ ᤐᤣ᤺ᤸᤗᤧ ᤐᤠᤘᤗ ᤔᤧᤵᤔᤏᤠᤒᤠ ᤐᤢᤱᤗᤠᤎᤠᤒᤠᤴ ᤐᤰᤌ᤺ᤀᤠᤱ ᤘᤕᤧ॥

¹⁵ᤀᤡᤱᤃᤠ᤹ ᤌᤥ ᤕᤖᤢᤛᤗᤧᤶᤔᤥ ᤐᤣᤃᤠᤱᤅᤡᤸᤗᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤵᤋᤡᤰ ᤔᤧᤍᤥ᤺ᤴᤍᤢᤀᤠᤱ ᤜᤠᤖᤠ᤹ ᤂᤢᤶᤍᤡᤱ ᤂᤥ᤺ᤛᤢᤏᤡ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ॥

¹⁶ᤀᤡᤱᤃᤠ᤹ ᤂᤧᤱᤜᤠ᤹ ‘ᤀᤠᤵᤋᤡᤰᤛᤠᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤃᤢ᤺ᤳᤋᤢᤒᤠ ᤀᤠᤵᤋᤡᤰᤗᤧ ᤁᤢᤍᤰᤗᤧᤱᤘᤠᤀᤥ ᤏᤠᤱᤛᤡᤱᤔᤠ ᤛᤢᤕᤧᤶ ᤔᤧᤶᤒᤡᤀᤣ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ ᤂᤧᤴ ᤜᤢᤰᤛᤢᤵᤔᤠ ᤖᤥᤔᤡᤌᤡᤶ ᤜᤥ᤺ᤵᤗᤥ’ ᤗ᤹ᤖᤡᤰ ᤔᤧᤳᤋᤢᤱᤛᤡᤱᤗᤥ॥

¹⁷ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤀᤡᤱᤃᤠ᤹ᤏᤢᤀᤣ ᤛᤥᤖᤡᤰ ᤛᤡᤈᤖᤡᤕᤠᤀᤥ ᤔᤧᤍᤩᤧᤀᤠᤱ ᤀᤡᤱᤃᤠ᤹ ᤔᤧᤴᤏᤠ᤺ᤶᤛᤡᤱᤅᤣ ᤁᤢᤍᤠ᤺ᤴᤍᤡᤰᤔᤠᤀᤣ ᤂᤠᤛᤧᤴᤜᤡᤶᤔᤥ ᤀᤢ᤺ᤳᤋᤢᤱᤛᤡᤱᤅᤠᤱ ᤂᤧᤴ ᤐᤠᤘᤗᤧᤴᤏᤠᤱ ᤂᤧᤵᤔᤥ ᤋᤠ᤺ᤵᤔᤠ ᤐᤠᤱᤄᤢᤱᤛᤡᤱᤗᤥ॥

¹⁸ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ ᤔᤧᤕᤧᤶᤛᤡᤱᤅᤠᤱ ᤀᤠᤵᤋᤡᤰ ᤁᤢ᤺ᤵᤔᤠ ᤔᤧᤜᤣ᤺ᤰᤋᤢ. ᤁᤖ ᤀᤡᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱᤒᤠ ᤜᤧᤰᤁᤣ ᤐᤕᤶ ᤀᤠᤵᤋᤡᤰ ᤌᤣᤀᤠᤱ ᤁᤢ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥

¹⁹ᤁᤖ ᤁᤢᤀᤠᤵᤋᤡᤰᤁᤡᤱᤃ ᤀᤠᤒᤠᤅᤣ ᤂᤢᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤏᤡᤱᤘᤠ᤹ ᤔᤧᤴᤍᤱ ᤐᤠ᤺ᤴᤎᤱᤜᤠ᤹ ᤏᤢ ᤁᤧᤛᤡ᤺ᤒᤠᤀᤠᤱ ᤁᤧᤒᤣ᤺ᤰᤐᤠ ᤕᤧᤛᤢ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥᤖᤰ ᤘᤕᤧᤖᤥ॥ ᤂᤧᤴ ᤀᤠᤸᤗᤥᤀᤠᤱ ᤁᤢᤜᤡᤱᤘᤧᤳ ᤘᤠ᤹ ᤗ᤹ᤖᤡᤰ ᤐᤠᤘᤗᤧᤴ ᤆᤰᤔᤧᤸᤗ᤹ᤀᤣ ᤜᤠᤍᤡᤱ ᤌᤰᤋᤧᤖᤥ॥

²⁰ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤴ ᤀᤰᤂᤣᤗ᤹ᤖᤡᤰ ᤁᤥ᤺ᤶᤓᤥ ᤆᤥ᤺ᤰᤔᤠ ᤀᤡᤱᤃᤠ᤹ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤘᤕᤠᤱ॥ ᤜᤧᤰᤁᤣ᤺ᤸᤗᤧ ᤐᤠᤘᤗᤧᤴ ᤌᤥ ᤕᤖᤢᤛᤗᤧᤶᤔᤥ ᤁᤧᤍᤢ᤺ᤴᤍᤣ᤹ᤖᤧ ᤂᤠᤛᤧᤴ ᤗᤥ᤺ᤶᤔᤠ ᤁᤧᤛᤡᤖᤠ᤹ ᤌᤠᤱᤒᤡ᥅ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤱᤗᤥ॥

²¹ᤁᤖ ᤐᤠᤘᤗᤖᤧ ᤂᤢᤏᤧ᤹ ᤁᤢᤍᤢ᤺ᤴᤍᤣ᤹ᤗᤧᤴ ᤂᤠᤛᤧᤴᤏᤡᤴ ᤖᤥᤔᤡ ᤜᤠᤱᤕᤢᤰᤐᤠᤸᤗᤧ ᤆᤥᤃᤢᤏᤡ ᤗ᤹ᤖᤡᤰ ᤕᤧᤰᤐᤣᤗᤡ ᤆᤥᤃᤢᤒᤠᤸᤗᤧ ᤀᤡᤱᤃᤠ᤹ᤀᤠᤱ ᤂᤢᤏᤧ᤹ ᤐᤕᤶ ᤜᤠᤱ ᤛᤡᤈᤖᤧᤸᤗᤥᤀᤣ ᤐᤠᤱᤔᤠᤍᤣ᤺ᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤂᤢᤏᤧ᤹ ᤔᤧᤶᤒᤠᤱᤅᤣ ᤌᤠᤖᤡᤰ ᤋᤡᤗᤡᤱᤃᤠᤜᤠ᤹ ᤁᤥᤔᤠᤀᤠᤱ ᤁᤵᤔᤠ ᤀᤡᤱᤈᤠ᤺ᤱ ᤐᤡᤖᤢᤱᤛᤡᤱᤗᤥ॥”