LOS HECHOS 25:5-21

⁵Co ndache na: ―Nchao nittetoanha ra tsjinha na ngain ciudad de Cesarea co jehe na sic̈ho na jie de ixin Pablo, si jehe joinchehe jianha.

⁶Festo vittohe ngain Jerusalén jeho jni o tte nchanho icha, cottimeja sacjan ngain ciudad de Cesarea. Nchanho yoxin jehe vetaha xintaon que gondehe are vehe gobernador co coetonhe xisoldado ixin vayé xa Pablo.

⁷Co are Pablo joí, ẍatte tsje chojni judío que joixin de Jerusalén co chojni mé joic̈ho na jie de ixin Pablo co ndac̈ho na ixin jehe joinchehe anto tsje cosa jianha, pero c̈hoha joincheguitticaon na Festo que ixin ján seguro Pablo joinchehe jamé.

⁸Cottimeja Pablo ndac̈ho de ixin jehe mismo: ―Janha ẍonhi jianha jointtaha ngain ley chojni judío, ni ngain nihngo icha importante, ni ngain emperador romano.

⁹Festo joinaoha ixin chojni judío rrocoñao na ngain, mexinxin ndache Pablo: ―¿Arinao satsji Jerusalén? Co nttiha janha sinttajuzgaha jaha.

¹⁰Co Pablo joattehe: ―Jaxon janha rrihi ngain juzgadoe emperador romano co nttihi tti janha jiquininxin soan na juzgado co nahi ngain Jerusalén. Soixin ochonxin que janha ẍonhi jianha jointtaha ngain chojni judío.

¹¹Si janha jointtaha jianha co jiquininxin ndasenhe na, janha rronichjaha nahi. Pero si jehe na ndac̈ho na ndoaha de ixin janha, ẍonhi chojni chonda joachaxin para sinchechienhe na janha ngain na. Janha rinaho que xiemperador ngain ciudad de Roma sinchejuzgana.

¹²Cottimeja Festo cjoao nivacjenguijna vaquetonha, cottimeja ndache Pablo: ―Jaha ndac̈ho ixin jaha rinao que ixin xiemperador sinttajuzgá; mexinxin jaha satsji ngain xa.

¹³Canxion nchanho después Agripa xirey co Berenice nc̈hichó xa cjoi Cesarea para ixin joitsjehe na Festo.

¹⁴Co ixin vittohe na nttiha nchion nchanho, Festo coequin Agripa de ixin Pablo. Co ndache xa: ―Jí ná xí que tti Félix cointtohe ngain cárcel nttihi are janha coexian joarihi gobernador.

¹⁵Are janha cjoi Jerusalén xidána que ttetonha ngain icha xidána co tti xí que ttetonha ngain ningoe chojni judío joic̈ho na jie de ixin jehe xí mé. Co jehe na rinao na ixin janha sinttacondená xa para ndasenhe xa.

¹⁶Co janha ndattjan na ixin ley romano ndac̈ho ixin c̈hoha sinchecondená ni ná chojni para ndasenhe antes que chojni mé tsinhi tti rrondac̈ho chojni que joic̈ho jie de ixin jehe. Co cai chonda que chojni mé rronichja de ixin quehe joinchehe jehe are chojni que tjanguihi tsinhi na tti rronichja jehe.

¹⁷Mexinxin are chojni judío joí na nttihi, janha toin nchanho yoxin joaritaha xintaoen xigobernador co vayá Pablo.

¹⁸Janha ẍaxanho que jehe joinchehe ná cosa anto jianha, pero nijoic̈ho jie de ixin jehe nichjaha na inchin janha ẍaxanho.

¹⁹Jeho ndac̈ho na ixin jehe ditticaonha religioen na. Co nichja na de ixin ná xí vinhi Jesús que ndavenhe. Pero Pablo ndac̈ho ixin xí mé jichon xa.

²⁰Janha joinonaha quehe rrojinttaha, mexinxin janha joanchianguia Pablo si jehe rinao tsji Jerusalén para soenxin juzgado nttiha.

²¹Pero Pablo ndac̈ho ixin jehe rinao Augusto tti emperador sinchejuzguehe. Mexinxin janha coetonha ixin jehe vittohe ngain cárcel hasta que janha nchao rroanha jehe ngain emperador mé.