Apostolo 25:5-21

⁵Ge valai turagu e huriki a matakari ne mua, mi gi lakea o Sisaria. Pali a bakovi iea ge tahoka a naro hale, bara ri padi virihia vonga.”

⁶E Pestus i made turane ria na parava i polotolu o i ravulu, muri i hamule lakea o Sisaria. Na parava muri i made na gula ni vapelekado, lakea i taki ria, ri turari vilia vona e Paulus.

⁷Na tahuna e Paulus i bele, e huriki a Iuda ri valai o Ierusalem ri pesi haluia, ri padi virihia na maka ngava dagi i uka vuhuna.

⁸Pali e Paulus i taga vona i ta maea, “Iau i uka ma a ratea tara naro ge hale na vinara ne huriki a Iuda, o na roho na Vure, o ne Kaiser.”

⁹Pali e Pestus i ngaru ge rata kamumu e huriki a Iuda, lakea i nanea e Paulus, “Ioe o ngaru ni lakea o Ierusalem, ga longoa vonga a maka ngava ni padi virihi ioe vona?”

¹⁰E Paulus i koli i ta maea, “Ngane a pesi na matana mari ni pelekado ne Kaiser tara. Koea ia a tabeke bara ni pelekado iau vona. Iau i uka ma a rata a naro hale ne huriki a Iuda, ioe tara o lohoka vona.

¹¹Iau bara longotaro a vinara, a ratea tara naro i hale hateka, bara mate vona, i uka ma ga ha vona. Pali ra ngava ni padi virihi iau vona, bara a ngava taminga, i uka tara viri ge habi iau na limane ria. Iau a ngarua e Kaiser ge longoa a ngavagu.”

¹²Muri e Pestus i ta lobo turane huriki a bolekori vona, i koli, i ta maea, “Ioe o ngaru e Kaiser ge longo a ngava vomu, ngane bara o lakea ne Kaiser.”

¹³Muri na parava ranga, e Agripa a hariki, turana e kurabana e Bernaisi ru valai o Sisaria ru gu gosia e Pestus.

¹⁴Ru made na parava ranga, lakea e Pestus i vakalongo e Agripa vona e Paulus, i ta maea, “I tahoka tara bakovi e Peliks i pe purua na bavi.

¹⁵Na tahuna a lakea o Ierusalem, e huriki a prister dagi, a gare ne huriki a Iuda ri padi virihia na maka maregoa i kupo, lakea ri nana iau ri ngarua ge vurua ra bakovi iea.

¹⁶“Lakea a koli, a ta maea, ‘Na tahuna a bakovi tara ni padi virihi na maregoa, a vilone huriki a Rom i ta maea, nahea ni gi vakamadihi tavula a viri. A viri i tahoka a maregoa bara i pesi taro na matana viri i padi virihia na maregoa, ge tagaria na maregoa ni padi virihi ia vona.’

¹⁷Na tahuna e huriki a Iuda nga ri valai koea na murina ni vapelekado, iau i uka ma dava. Na parava muri a made na gula na mari ni vapelekado, a talo rike a ngava ni tuli valai nau e Paulus.

¹⁸E huriki a Iuda ri pesi rike, ri padi virihia na ngava. Pali a ngava ri padi virihia vona i uka ma i hale hateka ge manga a ngava a luhoi ta ri gi padi virihia vona.

¹⁹A ngava ri padi virihia vona i dili na nita na lotu, a nita na bakovi tara i mate, a rana e Isu. E Paulus i takia ta i mahuri mule a bakovi iea.

²⁰Pali iau a ngaru ni matakanea a vuhuna a maregoa iea, pali a varoru. Lakea a nanea, ma ge ngaru ni lakea o Ierusalem ni gi longo vonga a ngava ni padi virihi ia vona.

²¹Pali i marikoi ia, i ngaru ni matai e Kaiser ge longoa a ngava vona. Lakea a takia ni gi matakari taro ia na bavi, muri ga rudu lakea ne Kaiser.”