1Saulo, Guiau tauataiena i ribahemahematausidi, eo bena i unuidi, ia abo i lau kohena lailai arinai,
2uriuri i awanoridi, ia bena i laedi Damaseko sunagodi enadi, ena headi i italobaidi wau dobila taulaulauina tataodi, tatao eo sisine, ia abo i paidi i woeaidi, i laedi Ierusalema eai.
3Sora ma launa Damaseko i hanahanaui galewa marana ia abo i hemara hetaiiri.
4Ie guridobi tano eai, arina esau i ataiei i ribalaoma ia arinai i ene, “Saulo e, Saulo e, ue saha u hegahegadotoagu ta?”
5Ia abo i ene, “Guiau e, oa hede eai?” Guiau i ene, “Eau hede Iesu, oa u hegahegadotoagu wa.”
6Ia abo i tabutabubu, eo ie noo, i ene, “Guiau e, Oaem nuatu abo edoha, egu laulau saha abo ea abi?” Guiau i ribalau ia arinai i ene, “U torohai, u lau eanua eai, em laulau aisana abo se heribam.”
7Tatao ia maedi se lau, se totoro na nige ariarinadi, arina wa se ataiei, na tau nige se ita.
8Saulo tano eai wa i torohai ia matana se lala’o nige tau i ita na isi se abinimai, se woeai se laei Damaseko eai.
9Asubena haiona ia matana se gibu, aiai nige i ai, eo goila nige i nom.
10Damaseko eai tauataiena esau esana ede Anania; ia i enosuai, Guiau i ribalau ia arinai, i ene, “Anania e,” Ia i ene, “Guiau e, eau ede ina.”
11Guiau i ribalau ia arinai, i ene, “U toro, u lau dobila esau arinai esana ede Dudurai, Iuda ena numa eai tau esau esana Saulo, Tareso tauna, hage u hesio arinai, ia i laulau‐uura.
12Ia hinage i enosuaiyao, tau esau esana Anania ie ita, i awasae ia nimana i toresaei ia potana eai, matana bena abo se lala.”
13Anania arinana abo i heuio i ene, “Guiau e, nei tau ne wasana ea ataieyao, tatao gamagaridi se ribaei, ia baaea lailai ie abi, hetabu tataodi i hebaaeadi Ierusalema eai.
14Inai hinage kohena lailai‐didigadi edi riba eai tatao esam se atai ia abo i paidi.”
15Na Guiau i ribalau ia arinai, i ene, “U lau mo em dobila eai wa: egu bia ea hineriyao ede ina, bena abo eau esagu i laei Etene eo wasawasadi aridi eai, eo Isaraela nanatudiyao aridi eai hinage.
16Ia abo ea heita, eau esagu eai amamna gamagamagari abo sora i hearodi.”
17Anania ie lau i awasae numa wa alona eai ia nimana i toresaedi ia potana eai, i ene, “Egu‐tau Saulo e, Guiau Iesu wa, ia ede u laoma dobila eai i hemasarahaaurim wa, ia i hetamariguma matam bena abo se lala, eo Earua Tabuna wa bena abo u monau.”
18Ma‐esega abo ginauri ia matana eai se beu doha eama onahidi: ia matana abo se lala, ie toro, ia se hebapatisoi.
19Ia aiai ie ai, abo tauna se maidosiuio. Saulo asubena headi i miamia Damaseko eai tauataiena aridi eai.
20Ia abo i lauguguia sunago alodi eai, ia Keriso i wasaduaiei, i ene, ia Eaubada Natuna tahunuana ede.
21Isi gamagaridi ena riba se ataiei se noo, si ene, “Ina tau wa e nige’e, ia tauataiena Ierusalema eai i hebaaeadi wa? Ena laoma paana hinage doha bena i paidi, eo i laedi kohena lailaidi aridi eai?”
22Na, Saulo ena adidiri abo i tubulailai; Iudea tataodi taumia Damaseko eai i henuaponoponodi, arinai abo Keriso i riba hemasaraha mamohoiei.
23Asubena gamagaridi se ohi, Iudea tataodi abo se oioiriba ia bena se unui.
24Saulo tau‐weseina i nuatulobaidio. Eanua gana tonana gududi se itawataidi maiona to asubena ia bena abo se unui.
25Maiona eai tauataiena ia se usai bosa alona eai, abo se hedawedobei tona murina eai.
26Saulo abo ie lage Ierusalema eai, ia ena nuatu i ene tauataataiena bena maedi se oigogo esega: na isi gamagaridi ia se matausiei, nige se nuatui ia tauataiena esau.
27Na Banaba ia abo i woeai, i laei aposotolo aridi eai, enadi ie riba lahinae Guiau dobila eai ie ita wa, eo Iesu esana eai i lauguguia adidiriei Damaseko eai, wasana i heribadi.
28Ia maedi se mia esega Ierusalema eai, se sae na, se dobi.
29Guiau Iesu esana eai i riba headidiri, Iudea Heleni maedi se haiawayagara: to isi hinage edi dobila se eooi ia bena abo se unui.
30Teina se ataiei ena tataoyao ia se laei Kaisaria eai, abo se hetamari i lau Tareso eai.
31Ekalesia Iudea hari tupo, hari tupo eai, eo Galilaia eai, eo Samaria eai abo se miataubiga eo nuadi se tubu; isi Guiau matausina boeana eai se laulau, eo Earua Tabuna ena henuabiga arinai abo se hetadada.
32Petero hinage ie lau hari eanua, hari eanua, ia abo ie leta ie dobi Lida eai hetabu tataodi aridi eai.
33Nei eai tau esau i lobai esana ede Ainea, borimai igigi‐haiona ena aba eno eai ie ota ena asiebo ede i tabutabubu.
34Petero i ribalau ia arinai, i ene, “Ainea e, Iesu Keriso i hemaurim: u toro, em aba laulaueno me u launo’u.” Arinai abo i toro heuheula.
35Isi gamagaridi Lida eo Sarona taumiaidi tau wa se ita, isi abo se sinibui Guiau arinai.
36Na tauataiena sinena esau Iopa eai ie mia ia esana ede Tabita, heaheasonina se ribaei ede Doreka: teina sine ta ena hewau se lolo, eo ia sine aiainauiana.
37Nei huiana ne i asiebo, ia abo ie mate: isi ia se hedui nonohai, abo se heota biri ewa eai.
38Iopa eo Lida edadi nige se loloha, tauataiena wasa se ataiei Petero nei eai, tatao labui se hetamaridi se lau ia arinai se heriba, si ene, “U laoma, ta heula.”
39Petero abo i torohai, maedi se lau. Ia ie lage, maedi se lau biri ewa eai: sisine wabuwabu wa se totoro ia gegesina eai se doudoui, pereue, eo hari lulu, hari lulu ma miamiana eai wa Doreka i ginauridi ia se heita.
40Petero isi gamagaridi i aiduiedi: ia abo i turibonodobi, i uura: ia i itaitalau sinarena arinai i ene, “Tabita e, u toro.” Ia matana i helaladi: ia Petero ie ita, abo i torouioma ie bawa.
41Ia nimana i helelelaei sine wa arinai, i abihetoro, hetabu tataodi, eo sisine wabuwabudi i eogaidi, sine wa abo i mosei isi aridi eai ma maumaurina.
42Iopa tataodi gamagaridi wasana se ataiei, arinai gamagaridi Guiau abo se ataiwatai,
43Petero i miahai Iopa eai asubena gamagamagari Simona, sarai opidi tauginaginauridi, arinai.
