Hechos 25:5-21

⁵man jaska ea yuiaidan, matun xanen ibubu Cesarea anu ebe buxun ja junin jawada chakabuwayama chitekin unantidubuki— jatu washina

⁶Jerusalén anuxun 8 día kasmai 10 día daki nichintan Cesarea anu ana chintunkaini jikishina janua meshukidi januxun xanen ibui tsauxun unanti wamisbu anu jadi Festo tsautan jau Pablo itanunbun jatu yunua

⁷iweabu Jerusalén anua beshian judio xanen ibubun kebaunxun jawen yusian betsa betsapakidi Pablo chitebiakin jawen jaska watima kayakidi Festo yuiaibun

⁸januxun jantsedi Pablon jawa chakabuwama ikimakidi unanmakin Festo yuikin: —En jawa chakabu jayamakidi ena mia yuinun ninkawe. Diosun nukun xenipabu yusini chibankin en kaneama inun Jerusalén anuxun Templo en jawa chakabuwama inun romano xanen ibujaida Césarki en jawa jakidi chakabu yuismadiki— ikaya

⁹janua judio xanen ibubun jau Festokidi pe shinanunbun, iwanan, Pablo yukakin: —¿Jerusalén anudan, min kakatsis ikai, jadixun min jaskayama jau en mia unanti waxanunan?— aka

¹⁰Pablon kemakin: —Jaskamaki. Juni betsa tibi mian min unanti wanun romano xanen ibujaida Césarn min jabiaska watanun mia yunuimaki. Jaskaken na jabiatian min ea unanti watiduki. Jaskaken enabu judiobu en jawa chakabuwama iyama en mia tapinmaxuki.

¹¹En jawada chakabuwayamawen taexun jau ea tenanunbun en jatu jawa nemama ikeanaii. Jakia mia padainbun jau ea tenanunbun min xanen ibun jancha kanekin min ea jatu yunutidumaki. Jaskawen taexun maiwan kesua xanen ibujaida Césarn jau ea unanti waxanun Roma anu ea yunuxanwen— aka

¹²januxun unanepa medabenanbube Festo janchatan Pablo yuikin: —Peki. Césarn jau mia unanti waxanun min ea yukaxuki. Jadi en mia yunuxanaii— ashian jiweyuken

¹³chipu xaba eskadabes kaken romanobube xanen ibumis judion xanen ibu Agripa jawen pui Berenicebe Cesarea anu xanen ibu bena Festo uinkin jancha wakin benimawanun ika jaki bai bushian

¹⁴jabe jiweyuabun Feston Pablokidi Agripa jadi banabimakin: —Nenu juni betsa mekexun Félixin eki jenebainshinaki. Mia yuinun ninkawe.

¹⁵Nenua Jerusalén anu en ka Diosbe jawenabu janchaxunika xanen ibubu inun jabun mekenikabun chakabu jakidi yuitan ja en kupinun jaki sinatakin ea yunuabu

¹⁶jakia ean jatu kemakin: “Nun romanobunan, nukun yunua kushipawenan, e iskaun detenunbun nun jaska beyamaki. Jakia jau detenunbun yunukinan, ja jaki kayai jadatuda chakabu ja dabe unanti wadabetan nun jatu nematiduki, ja ikaibudan”, akin en jatu washina

¹⁷en jatu jaska wabidana ea chibanbidanshinabu manakatsi ikama meshukidi januxun nun jatu unanti wamis anu tsauxun ja juni en jatu yunua iweabu

¹⁸jabu beshianbu benixun jaska jakidi kayakin jawa jatun chakabu tibi waima jaskakidi chiteaibu dabanen jaska en shinainkidi jawa yuiabuma

¹⁹jakia jaska judiobun jiwea beya kenwanmisbu jatu maewamai inun juni betsa Jesús mawabiani ana jiweaki, akin Pablon jatu yuimis besti jakidi chiteaibu en ninkaimaki.

²⁰Jaska jakidi yuiaibun jawawen en jaska watima ea unantimaska kaya wabu shinantan Pablo yukakin: “Jerusalén anuxun ana jadixun jatubetan en mia unanti wai kaxanun ¿jadi min kakatsis ikai?” en wa

²¹januxun jatun ea akin: “Jamaki. Xanen ibujaida Césarn jau ea unanti waxanun Roma anu ea yunuxanwen”, ishinken jadi ea yukashinanu yunukatsi jau bichixun meke bestiyununbun en jatu yunushinaki— aka