Föför 25:5-21

⁵Nöümi kewe souemwen repwe etieila Seserea o aturu ei mwän are a föri och föför mi ngau.”

⁶Iwe, Festus a pwal nonom rer walu ika engol rän, mürin a feila Seserea. Sorotän ewe rän a mot won ewe lenien kapwüng o allük pwe repwe emwenato Paulus.

⁷Nge lupwen Paulus a war, ekewe chon Juta mi feito seni Jerusalem ra ütä pwelin ünükün o popuetä le aturu won chomong föför mi ngau ra atipisi won. Nge resap tongeni alletätä pwe a pwüng.

⁸Nge Paulus a püsin peni i o apasa, “Üsap föri och mwäl ngeni än chon Juta kewe allük ika apiningaua ewe Imwenfel ika ü ngeni Sisar lon Rom.”

⁹Nge Festus a mochen kütta an chen me ren ekewe chon Juta, iei mine a aisini Paulus, “Ifa usun, ka tipeeu ngeni om kopwe feila Jerusalem, pwe üpwe apwünguk ikenan won ekei kapasen atutur ra atipisuk won?”

¹⁰Iwe, Paulus a üra, “Ngang üa ütä me mwen än Sisar lenien kapwüng, ewe ia üpwe kapwüng ie. Ngang üsap föri och föför mi mwäl ngeni ekewe chon Juta usun ka fen silei.

¹¹Are ngang üa purätiu eu kewe allük o föri och pwe üpwe tolong lon tipisin mäla, ngang üsap tüngor pwe üpwe ngasala seni. Nge are esap pwüng ekewe kapasen atutur ra atipisiei won, esap wor eman a tongeni atolongaei lepöür. Iwe, ngang üa tüngor pwe ei kapwüng epwe amwet ngeni Sisar.”

¹²Mürin än Festus pworaus ngeni nöün kewe souöüröür a pölüeni, “Ka tüngor pwe om ei kapwüng epwe amwet ngeni ewe Sisar, iei popun kopwe fokun feila ren Sisar.”

¹³Mürin ekoch fansoun ewe king Akripa me Pernike ra feito Seserea ar repwe churi o kapongen etiwetiw ngeni Festus.

¹⁴Mürin ar nonom ikenan ekoch rän, Festus a apworausa ngeni ewe king usun pworausen Paulus: A wor eman mwän ikei lon imwen fötek Feliks a likitätiu.

¹⁵Nge lupwen üa feila Jerusalem, nöün ekewe chon Juta kewe souasor mi lap me ekewe souakom ra uwato ar kapasen atutur ra atipisi won o tüngor ngeniei, pwe üpwe apwüngala pwe a tipis.

¹⁶Nge ngang üa üreniir, pwe oukich chon Rom lon örüniach sisap atipisi eman aramas ren och tipis me mwen an epwe churi ekewe chon atipisi, pwe epwe tongeni püsin peni i won ekewe kapasen atutur ra atipisi won.

¹⁷Iwe, lupwen ra feito ikei, üsap olusala ai fansoun, nge sorotän ewe rän üa mot lon ewe lenien kapwüng o allük pwe repwe emwenato ewe mwän rei.

¹⁸Iwe, ekewe chon ü ngeni ra ütä, nge resap aturu won och föför mi fokun ngau usun üa ekieki pwe repwe föri.

¹⁹A chök wor ekoch kapasen anini ngeni usun pwüngün ar lamalam, pwal usun eman mwän itan Jesus mi mäla, nge Paulus a apasa pwe a manausefäl.

²⁰Iwe, üsap chüen silei epwe ifa usun ai üpwe tongeni angei ai wewe won ekei mettoch. Iei mine üa tüngor ngeni Paulus are epwe tipeeu ngeni an epwe feila Jerusalem, pwe epwe kapwüng ikenan won ekei kapasen atutur.

²¹Nge Paulus a tüngor, pwe an kapwüng epwe amwet ngeni ewe Sisar an epwe filätä pwüngün, nge i epwe chök nom lon imwen fötek. Iei mine üa allük ngeni ekewe sounfiu, pwe repwe mamasa tori üpwe tongeni tinala i ren Sisar.”