Loc Hechos 25:5-21

⁵Jira íaɨoɨna daɨde: —Ɨe jira omoɨ cɨ́gɨri ite rɨ́imacɨ mai cuedo Cesaréamo jairi. Afémɨemo nɨfue íadɨ dɨnomo íemo nítajiredɨomoɨ, —daɨde.

⁶Festo afe Jerusalemo nano ocho nɨbaɨ diez dɨ́garui illa meífodo meine Cesaréamo bite. Afe jɨáɨruido ie rɨire jɨcánoranomo ráɨnazaide. Páblona atɨ́tate.

⁷Pablo afénomo jofo jáidemo, Jerusalémona como dúcɨde judíuaɨ íemo áɨnozidiaɨoɨ. Aɨnozillano aillo fɨénide ráfuiaɨ íemo nitádiaɨoɨ. Mei íadɨ aféfuiaɨmo ɨ́ɨnollɨfuena iñede.

⁸Mei jira Pablo ie abɨ rɨ́iduafuena daɨde: —Cue nɨe fɨénidɨfuena fɨnóñedɨcue. Judíuaɨ ocuícafuiaɨ uáitaoiñedɨcue. Iaɨoɨ gaɨríraco ero bácañedɨcue. Daje izói romano caifóidɨllaɨma uáillaɨna uáitaoiñedɨcue, —daɨde.

⁹Mei íadɨ Festo judíuaɨ cɨ́gɨri ñue íacade. Jira Páblomo jɨcánote: —¿Jerusalemo abɨdo jáiacadɨo omoɨ nitácafuiaɨ dɨnomo cue jɨcánolleza? —daɨde.

¹⁰Jira Pablo uai ote: —Ja birui romano illaɨma uícomo náidadɨcue. Ja benomo cuemo nitácafuiaɨ jɨcánorede. Mei judíuaɨmo nɨ́fuenidɨmɨedɨcueza ñue onódɨo.

¹¹Cue tɨ́taite fɨénidɨfue cuemo íadɨ, áfemona abɨ jáanoñeitɨcue, mei íadɨ nana cuemo íaɨoɨ nitácafuiaɨ táɨnofue íadɨ, buna íaɨoɨmo cuena rɨ́ifuedo izájinide. Dama romano jamánomo ocuídɨllaɨma cuemo jɨ́cano daɨdɨcue, —daɨde.

¹²Iemo ie fɨdɨ́tatɨmɨiaɨmo úrilla meífomo, Festo daɨde: —Mei “Jamánomo ocuídɨllaɨma cuemo jɨ́cano” daɨdɨ́oza, ie jira afe jamánomo ocuídɨllaɨmamo ona óreitɨcue, —daɨde.

¹³Dɨga irui illa meífomo illaɨma Agripa ie aɨ Berenice dɨga Cesaréamo Festo uáiduaide.

¹⁴Afénomo dɨga irui itíaillɨnoɨmona, Festo Pablo rafue Agrípamo llote. Iena daɨde: —Félix fɨénocaiga llavécamɨe naɨ benomo ite.

¹⁵Naui Jerusalemo cue jailla llezica, lletáriraɨnɨ illaɨnɨ, naa judíuaɨ éicomɨnɨri íemo íaɨoɨ nitácafuiaɨ cuemo llotíaɨoɨ. Ie duere cue fɨnótallena cuemo jɨcádiaɨoɨ.

¹⁶Jira íaɨoɨ uai otɨcue. Iaɨoɨna daɨdɨcue: Romano rɨ́imacɨ íaɨoɨ fɨbilla izói, afefue nitádɨmɨe íemo nitácamɨe uiécomo conímamo jofo eróicana naɨ úriñenia, nitácamɨena fañédiaɨoɨ. Afe daɨí táɨnofue nitácamɨe ie abɨ rɨ́iduafuena fɨnórede.

¹⁷Ie jira afémacɨ benomo billa llezica, raɨre afe jɨáɨruido cue jɨcánoranomo ráɨnazaidɨcue. Ráɨnazaillano afe cómena atɨ́tatɨcue.

¹⁸Mei íadɨ afémɨemo nitádɨno cue comecɨ daɨna izói nitáñediaɨoɨ.

¹⁹Daa íemo íaɨoɨ nitácafue fia íaɨoɨ ɨ́ɨnogafuiaɨmo jaɨnáidɨfue. Daje izói da Jesudo úritiaɨoɨ. Afémɨena tɨ́ide daɨdíaɨoɨ; mei íadɨ Pablo “Caade” daɨde.

²⁰Mei aféfuena onóñedɨcueza. Nɨe izói aféfuena nɨ́baɨtɨcue, daɨdɨcue. Jira Páblomo jɨcánotɨcue: ¿Jerusalemo meine jáiacadɨo dɨnomo omo nitácafuiaɨ ñue jɨcánollena?

²¹Mei íadɨ afémɨe jamánomo ocuídɨllaɨma Augusto íemo jɨcánollena jɨcade. Ie jira naɨ íena zuitáñedɨcue. Iena rairuídɨcue jɨáɨruido afe caifóidɨllaɨmamo ie cue oréllena, —daɨde.