1Nixe’ xa q’uichachic ne’ets yanenel am belomchic c’al an Ajatic. Chuthel chuthel u buc’tsixnanchab i c’apnel, tocat jaye hua’ats i jolbixtalab tin cuenta am buc’tsixtalab c’apnel. Am belomchic ax in caunal an cau griego in ulu abal an tsemchith uxum c’al jaja’chic yab u quithat pithnalchic an c’apnel ejtil tu quithat pithnal an tsemchith uxumchic ax in caunal in cuete’ cahuintal Israel.
2Tam axi lajuj tsab i abathuale in ucha’ ca tala’ tamcun am belomchic. Tamcunits ani in ucha’chic: ―Yab in tomnal huahua’ tu abathuale qui jila’ tu olnom c’al in cahuintal a Dios ani tocat qui buc’tsixnanchi an c’apnel.
3Jaxtam ebchalabchic, ca tacuy buc i inic ani ca punuchic ti buc’tsixnanchix c’apnel. Ca tacuy buc ax u lej c’ac’nab c’al patal am belomchic ani lej alhua’ tsalpath ani jum putat co’onchith in ichich c’al an Espíritu Santo.
4Ani huahua’ ne’ets qui lej expinchiye cu olon ani cu exobchixin c’al in cahuintal a Dios.
5Ani patal am belomchic in tsalpay abal alhua’ jahua’ in ulu antsana’ an abathualechic. Tam tacuyat a Esteban axi lej lubach belom ani jum putat co’onchith in ichich c’al an Espíritu Santo. Jaye tacuyatchic a Felipe, ani a Prócoro, ani a Nicanor, ani a Timón, ani a Parmenas, ani a Nicolás Antioquíajib. Pel a Nicolás axi ti jayq’ui’ huenc’onenec ti c’ac’nax c’al a Dios ejtil an Israelchic.
6Tam chanchin axi buc tin tamet an abathualechic, punchin tin oc’chic in c’ubac ani conchinchat in tolmixtal a Dios.
7Ne’ets yanenel in cahuintal a Dios, ani ne’ets lej yanenel am belomchic ti Jerusalén. Ma yan i pale’chic jaye in it belal an Ajatic.
8Jun axi buc tacuthits pel a Esteban. Cum lej tsaplilith c’al a Dios in t’ajal yan i labith t’ajbilab ti tsu’bixtalab tin tamet an inicchic. Lej jum putat co’onchab in ichich c’al in alhua’ inictal a Dios.
9Ani hua’ats taja’ al an tiyopan Israel i cuenel axi hueutsíx c’al a Esteban. U bijiyab an cuenel ti Hualcathlom, cum pelac i inicchic axi ti jayq’ui’ lej c’unat co’oyame c’al i amulab ani xo’ itsots. Pelchic al nixe’ xi cuenel axi c’uajinec ti Cirene, ani ti Alejandria, ani ti Cilicia, ani ti Asia.
10Ani yab in ejtouchic quin ata’ a Esteban, cum jaja’ pithnenec i tsalpathtalab ani i cau c’al an Espíritu Santo.
11Tam jaja’chic in ucha’ talchic in juntal ca janamcahuin jun t’ajat tin cuenta a Esteban. Quin uluq’ui abal in ats’amalits tam ti quithab cahuilixin c’al a Moisés ani c’al a Dios. Im pitha’chic i tumin abal antsana’ quin ulu.
12Ani cum belchinits an janamtalab, tam tocat tsacuy an mulcunel junax c’al an yejtselabchic Israel ani c’al an exobchixchic c’al an ts’ejcath cau binath c’al a Moisés. Tam lej muthenchab a Esteban c’al jaja’chic. Yac’uan ani ne’tha tin tamet an cuenel ts’ejcom cau axi lej c’athpich exbath in ey.
13Tam cubiychic i q’uet’ach jolbix in ulu: ―Axe’ xi inic yab u coyol tucu quithab olnanchi i t’ocat tiyopanil ani tucu pojcanchi an ts’ejcath cau ax tu pithamal a Moisés.
14I ats’amal tam tin ulu abal a Jesús Nazaretib ne’ets tucu paclunchi i tiyopanil ani ne’ets tucu jalc’unchi an uchbixtalab ax tu pithamal a Moisés.
15Tam an cuenel ts’ejcom cau ani patal axi quetechic c’al jaja’chic in ejchical a Esteban, ani in tsu’chal in hual ejtil in hual i ángel.
