1Ko꞉sega, kalu a꞉namilo꞉ seno꞉ nowo꞉ ene wiyo꞉ Ananaias, a꞉la꞉ta꞉ga꞉ ene inga, Safaila ko꞉lo꞉ sen. A꞉la꞉ma꞉yo꞉lo꞉ hen heb inido꞉wo꞉ kililia꞉sa꞉ga꞉yo꞉, Ananaias eyo꞉ mole hebo꞉ ene kanulu difa꞉. A꞉la꞉do꞉ gab a꞉no꞉ ingaya꞉yo꞉lo꞉ o꞉li gabolo꞉b a꞉la꞉asulo꞉. Ananaias eyo꞉ mole heb nolo꞉ Iliga꞉felo꞉ kalulo꞉wa dia꞉ha꞉na꞉ga꞉ dimi.
3Emo꞉ dimiabiki, Bida eyo꞉ emo꞉wo꞉ a꞉la꞉sio꞉, “Ananaias, asulo꞉ gilo꞉wo꞉ Setene bo꞉fo꞉melea꞉ki, fogo꞉ dimi ko꞉lo꞉, giyo꞉ Godeya꞉ Mamayo꞉ a꞉na dikili sa꞉lakiyo꞉, moleyo꞉ hebo꞉ go꞉no꞉ndo꞉ kanulu difa꞉ a꞉no꞉, waga asulaki dimido꞉wo꞉?
4Giyo꞉ heno꞉ semo꞉kilili amio꞉, hen a꞉no꞉ hendele ga꞉no꞉ ko꞉lo꞉ kililia꞉sa꞉ga꞉ mole di a꞉no꞉ ga꞉lo꞉ asulab aumbo꞉ o꞉li dimidama꞉no꞉ dowo꞉. A꞉la꞉fo꞉ko꞉lo꞉, giyo꞉ dikilima꞉no꞉ a꞉la꞉likiyo꞉ waga asulaki sa꞉laya? Madalilo꞉ sa꞉lako꞉, giyo꞉ kaluwo꞉ ko꞉lo꞉ dikidaba. Godeyo꞉ ko꞉lo꞉ dikili sa꞉lab.”
5Ananaias e to a꞉no꞉ da꞉da꞉sa꞉ga꞉, elo꞉ elen a꞉naka, sulufo꞉ tina꞉sa꞉ga꞉ sowo꞉ ko꞉lo꞉, kalu nolo꞉ to a꞉no꞉ da꞉da꞉sa꞉ga꞉yo꞉, tagio꞉ alan dowo꞉.
6Ananaias e sowabiki, kalu so꞉wa nolo꞉ ya꞉ga꞉, so꞉ga꞉ mela꞉sa꞉ga꞉, dia꞉ha꞉na꞉ga꞉ a꞉na daido꞉.
7A꞉la꞉ta꞉ga꞉ ofa꞉si otalen ta꞉ta꞉sa꞉ga꞉yo꞉, ingayo꞉ Ananaias sowo꞉wo꞉ mo꞉da꞉daki, elo꞉ Bidalo꞉wa mio꞉.
8A꞉na fa꞉la꞉dowabiki, Bidaya꞉ emo꞉wo꞉ a꞉la꞉dabuba꞉ba꞉, “Mole gaindo di a꞉no꞉, tambo yomo꞉?” A꞉la꞉sa꞉labiki, Safaila eyo꞉ a꞉la꞉sio꞉, “A꞉, moleyo꞉ tambo dia꞉mio꞉ yom.”
9A꞉la꞉fo꞉ko꞉lo꞉ Bida eyo꞉ emo꞉ a꞉la꞉sio꞉, “Ga꞉go꞉ towo꞉ imilise saeta꞉ga꞉yo꞉, Godeya꞉ Mamayo꞉ da꞉fe ba꞉ba꞉nikiyo꞉, Emo꞉wo꞉ waga dikili sa꞉laya? Ge kalulo꞉ daida꞉len kalu i a꞉no꞉ tog amilo꞉ o꞉yayom ko꞉lo꞉ gelo꞉ a꞉na dia꞉ha꞉na꞉sa꞉ga꞉ dalima꞉nigab.”
10Safaila e to a꞉no꞉ko꞉ da꞉dabiki, e sulufo꞉ tina꞉sa꞉ga꞉ sowo꞉ ko꞉lo꞉ kalu so꞉wa i a꞉no꞉ ya꞉ga꞉yo꞉, e sowo꞉lo꞉bi ba꞉da꞉ga꞉, iliyo꞉ e dia꞉ha꞉na꞉ga꞉ indo daido꞉ anib a꞉na dalialifa꞉.
11Tilidabu kaluka꞉isale tambo olia꞉ kalu nol a꞉namio꞉ sen a꞉no꞉lia꞉yo꞉, malolo꞉ a꞉no꞉ da꞉da꞉sa꞉ga꞉, iyo꞉ tambo tagi alan dowo꞉.
12Iliga꞉felo꞉ kalu iliyo꞉ molo ha꞉na꞉no꞉ ko꞉li ko꞉lilo꞉wo꞉ amisa꞉n us a꞉na dimida꞉len. Tilidabu kaluka꞉isale iyo꞉ ua, Solomona꞉ Isagen a꞉na kegea꞉sen.
13Ha꞉la꞉ kaluka꞉isale nol a꞉ma꞉yo꞉ iyo꞉ mada nafale a꞉la꞉asulo꞉ ko꞉sega ha꞉la꞉ kaluka꞉isale i a꞉no꞉ tagilaki, i o꞉lia꞉ mo꞉ gasa kegea꞉sen.
14Ko꞉sega ho꞉leno꞉ tambowo꞉, kaluka꞉isale modo꞉ nolo꞉ Alano꞉ tilida꞉da꞉sa꞉ga꞉, tamin tilidabu kaluka꞉isale i o꞉lia꞉yo꞉ ua gasaya꞉len.
15Amisa꞉n kaluka꞉isaleyo꞉ Iliga꞉felo꞉ kalu ililo꞉ molo ha꞉na꞉no꞉ dimida꞉lab a꞉no꞉ ba꞉ba꞉ ko꞉lo꞉ ili asulakiyo꞉ Bidayo꞉ ha꞉nab amio꞉ mama elo꞉ma꞉yo꞉ walaf kalu ka꞉isale iyo꞉ galalalikiyo꞉ falelema꞉ib a꞉la꞉asula꞉sa꞉ga꞉, iliyo꞉ i a꞉no꞉ ga꞉lilia꞉ ya꞉ga꞉, nolo꞉ wo꞉ba, nolo꞉ geondo꞉ wa꞉la alima꞉ki, tog anib a꞉na ta꞉felo꞉.
16A꞉la꞉ta꞉ga꞉ kaluka꞉isale modo꞉, Ya꞉lusalem anib amilo꞉ kandayo꞉ i a꞉no꞉ kegeo꞉. A꞉la꞉ta꞉ga꞉ iyo꞉ walafdo꞉ kaluka꞉isale o꞉lia꞉ kalu mama mogago꞉lo꞉ dosdo꞉ o꞉lia꞉yo꞉ tililia꞉ga꞉, Iliga꞉felo꞉ kalulowa yabiki, i a꞉no꞉ tambo falele alifelo꞉.
17Bobalo꞉ so꞉mia꞉sen misa꞉ kalu o꞉lia꞉ ene mili, Sadusi kalu o꞉lia꞉ma꞉yo꞉ iliga꞉felo꞉ kalu ilo꞉lo꞉ dimidab a꞉no꞉ ba꞉da꞉sa꞉ga꞉, iliyo꞉ iliga꞉felo꞉ kalumo꞉wo꞉ mo꞉beaki eteyo꞉wo꞉ alan fa꞉la꞉dowo꞉ ko꞉lo꞉ iliyo꞉ iliga꞉felo꞉ kalu i a꞉no꞉ ta꞉lia꞉sa꞉ga꞉, mogago꞉ kalu o꞉lia꞉ dibolo a usa disa꞉.
19Ko꞉sega o꞉g nulu a꞉namio꞉, Godeya꞉ ma꞉mul kaluwa꞉yo꞉ dibolo a a꞉no꞉, togo꞉ koda꞉sa꞉ga꞉, iyo꞉ ha꞉la꞉ya tilili ya꞉ga꞉ handalowakiyo꞉ a꞉la꞉sio꞉, “Gio꞉ ha꞉na꞉sa꞉ga꞉ Godeya꞉ malilo꞉ a usa kagafo꞉liki, gililo꞉ mela꞉no꞉ ho꞉gi di a꞉no꞉ kaluka꞉isalemo꞉wo꞉ tambo wida꞉lubi” eyo꞉ a꞉la꞉sio꞉.
21Elo꞉ sio꞉ o꞉leaum iliyo꞉ a꞉la꞉dimidaki, kea꞉fo nulu ofo꞉ yabikiyo꞉, iyo꞉ Godeya꞉ malilo꞉ aya tina꞉sa꞉ga꞉, a꞉na mo꞉mo꞉da wido꞉. O꞉g kea꞉fo nulu a꞉nami, bobalo꞉ so꞉mia꞉sen misa꞉ kalu o꞉lia꞉ e o꞉lia꞉lo꞉ elen kalu o꞉lia꞉ma꞉yo꞉, Yu amilo꞉ Kanisolo dosdo꞉wo꞉ a꞉na kegeo꞉. Isolael misa꞉ kalu tambo a꞉na kegea꞉sa꞉ga꞉, iliyo꞉ iliga꞉felo꞉ kaluwo꞉ tililia꞉ mena꞉ki dibololo꞉ sab a꞉na to saga꞉fo꞉.
22Ko꞉sega dibolo alo꞉ bo꞉fo꞉lowan kaluwo꞉ aya ha꞉na꞉sa꞉ga꞉ ba꞉ba꞉ amio꞉, Iliga꞉felo꞉ kalu i a꞉no꞉ a꞉namilo꞉ mo꞉sena ba꞉ba꞉ ko꞉lo꞉ iyo꞉ a꞉ma꞉la꞉ ha꞉na꞉sa꞉ga꞉ misa꞉ kalumo꞉wo꞉ a꞉la꞉sio꞉, “Nio꞉ dibolo aya fa꞉la꞉dowaki ba꞉ba꞉ amio꞉, togo꞉ tambo uludo꞉ ko꞉lo꞉, dibolo alo꞉ bo꞉fo꞉lowan kaluwo꞉ toga꞉me amio꞉ o꞉li yasila꞉len ko꞉sega, nio꞉ dibolo a usamio꞉, kalu i a꞉no꞉ mada aundo꞉ma elena ba꞉ba꞉.”
24Bobalo꞉ so꞉mia꞉sen misa꞉ kalu i o꞉lia꞉ Godeya꞉ malilo꞉ alo꞉ bo꞉fo꞉lowan misa꞉ kalu o꞉lia꞉ma꞉yo꞉ to a꞉no꞉ da꞉da꞉sa꞉ga꞉, iyo꞉ molo asulakiyo꞉, o꞉b ko꞉lo꞉ fa꞉la꞉doma꞉nigabele a꞉la꞉liki modo꞉.
25Iyo꞉ a꞉la꞉asula꞉li elen ami, kalu imilise nowo꞉ ya꞉ga꞉, imo꞉wo꞉ a꞉la꞉sio꞉, “Dabuma. Kalu gililo꞉ dibolo ayamilo꞉ disa꞉ a꞉no꞉, Godeya꞉ malilo꞉ aya kagafo꞉liki, kaluka꞉isalemo꞉wo꞉ towo꞉ a꞉na wida꞉lab” a꞉la꞉sio꞉.
26A꞉la꞉sa꞉labiki, Godeya꞉ malilo꞉ alo꞉ bo꞉fo꞉lowan misa꞉ kalu o꞉lia꞉ dibolo alo꞉ bo꞉fo꞉lowan i o꞉lia꞉yo꞉ ha꞉na꞉sa꞉ga꞉, Iliga꞉felo꞉ kalu i a꞉no꞉ a꞉ma꞉la꞉ tililia꞉ mio꞉. Kaluka꞉isale i a꞉namilo꞉ sab a꞉ma꞉yo꞉ bo꞉fo꞉lowan kalu iyo꞉ uwa꞉yo꞉ agodoma꞉ib a꞉la꞉asula꞉sa꞉ga꞉, iyo꞉ tagilaki, iliga꞉felo꞉ kalu a꞉no꞉ mo꞉yami tandeaki, ha꞉sa tilia꞉mio꞉.
27Dibolo alo꞉ bo꞉fo꞉lowan kaluwa꞉yo꞉ Iliga꞉felo꞉ kalu iyo꞉ tilili ya꞉sa꞉ga꞉, Yuwa꞉ kanisolo kalulo꞉wa ta꞉fo꞉liki, bobalo꞉ so꞉mia꞉sen misa꞉ kalu eyo꞉ imo꞉wo꞉ a꞉la꞉sio꞉, “Niliyo꞉ tamin amio꞉ gimo꞉wo꞉ ‘kalu wa꞉ma꞉ wi amio꞉ kaluka꞉isalemo꞉wo꞉ wida꞉so꞉boka꞉’ a꞉la꞉bo꞉ towo꞉ halaido꞉ saefa꞉ ko꞉sega giliyo꞉ Ya꞉lusalem kaluka꞉isalemo꞉wo꞉ tambo towo꞉ wida꞉li ha꞉nab ko꞉lo꞉ giliyo꞉ kaluka꞉isalemo꞉wo꞉ ‘kalu we nili sanasowo꞉ka꞉’ a꞉la꞉li diga꞉li sa꞉la꞉lab” a꞉la꞉sio꞉.
29To a꞉no꞉ da꞉da꞉sa꞉ga꞉, Bida o꞉lia꞉ Iliga꞉felo꞉ kalu i nol a꞉ma꞉yo꞉ towo꞉ a꞉la꞉sio꞉, “Niliyo꞉ kaluwa꞉ towo꞉ mo꞉kudu ha꞉na꞉no꞉ ko꞉sega, Godeya꞉ Ene toleyo꞉ ko꞉lo꞉ mada kudu ha꞉na꞉no꞉.
30Giliyo꞉ Ya꞉suwo꞉ i malana alula꞉sa꞉ga꞉ sana sowo꞉ ko꞉sega, nili ma꞉muwa꞉ Godeya꞉yo꞉ E a꞉ma꞉la꞉ dasi alifa꞉ ko꞉lo꞉lab.
31Isolael kaluka꞉isaleya꞉yo꞉ asugo꞉ nodola꞉sa꞉ga꞉, ililo꞉ mogago꞉ dimida꞉seno꞉ hama꞉ki, Godeya꞉yo꞉ Ya꞉suwo꞉ iwalu dia꞉takiyo꞉, ene dagi ililiba ta꞉fo꞉ ko꞉lo꞉ Ya꞉su E misa꞉ kalu dowaki, Eyo꞉ kaluka꞉isaleyo꞉ a꞉ma꞉la꞉ gasilia꞉no꞉ dowo꞉.
32A꞉la꞉fo꞉ko꞉lo꞉ Godeya꞉yo꞉ kaluka꞉isaleyo꞉ E tolo꞉ kuduha꞉na꞉sen imo꞉wo꞉ Ene Mamayo꞉ dimi ko꞉lo꞉, Godeya꞉lo꞉ dimido꞉ a꞉no꞉ tambo ni o꞉lia꞉ Godeya꞉ Mama o꞉lia꞉ma꞉yo꞉ ba꞉ba꞉ ko꞉lo꞉ a꞉no꞉ wido꞉l”
33Iliyo꞉ Bida elo꞉ to sa꞉lab a꞉no꞉ da꞉dakiyo꞉, kulufa꞉yo꞉wo꞉ alan dowa꞉sa꞉ga꞉, iyo꞉ yasalema꞉no꞉ asulo꞉.
34Ko꞉sega Fa꞉lisi kalu nowo꞉, ene wiyo꞉ Gamaliel, e elelo꞉ asulo꞉ kalu ko꞉lo꞉ Yu kaluka꞉isale iyo꞉ man elo꞉wo꞉ nafale ba꞉da꞉sen. O꞉g a꞉namio꞉ Gamaliel e, misa꞉ kalu o꞉lia꞉ sen ko꞉lo꞉, e dasila꞉sa꞉ga꞉, kalu nolbo꞉wo꞉ “Iliga꞉felo꞉ kaluwo꞉ ha꞉la꞉ya o꞉tililia꞉ hamana” a꞉la꞉sa꞉la꞉sa꞉ga꞉, Yu misa꞉ kalu imo꞉wo꞉ a꞉la꞉sio꞉, “Isolael kalu giliyo꞉, kelego꞉ nowo꞉ kalu i wemo꞉wo꞉ dimidama꞉no꞉lalega, giliyo꞉ dinafa asula꞉bi.
36Mo꞉wo꞉ o꞉semo꞉amalela꞉ amio꞉, kalu nowo꞉ Teudas e babuma꞉niki, kalu alan o꞉ngo꞉ dasilabiyo꞉, kalu do꞉la꞉lowo꞉wo꞉ do꞉la꞉fo꞉ fa꞉la꞉da꞉in e kudu ane. Ko꞉sega e sana sowabikiyo꞉, kalu elo꞉ kudu ane a꞉no꞉ tambo dalale ane ko꞉lo꞉ elo꞉ dimidama꞉no꞉ asulo꞉ a꞉no꞉ madali wala꞉.
37A꞉ma꞉ fa꞉s amio꞉, wilo꞉ sa꞉sa꞉lan ho꞉leno꞉ dowabikiyo꞉, Yuda꞉s, Ga꞉lili kalu eyo꞉lo꞉ dasila꞉sa꞉ga꞉, eyo꞉ kalu nolo꞉ hala tilia꞉gane ko꞉sega e sana sowabiki, kalu elo꞉ kudu ane a꞉no꞉ tambo dalale ane.
38A꞉la꞉fo꞉ko꞉lo꞉ o꞉gdo꞉ fa꞉la꞉dowab we gio꞉ asula꞉bi. Ililo꞉ dimidab we, inin asulo꞉wa fa꞉la꞉dowa꞉sa꞉ga꞉ dimidabo꞉lalega, ililo꞉ dimidama꞉no꞉ asulab a꞉no꞉ madali walema꞉ib. Ko꞉sega nanog a꞉no꞉ Godelo꞉wa a꞉la꞉ta꞉ga꞉ mio꞉lalega, giliyo꞉ ililo꞉ nanog diab a꞉no꞉ mada mo꞉ka꞉ma꞉ib. Giliyo꞉ ko꞉lo꞉ ka꞉ma꞉no꞉ susialega, gio꞉ Gode o꞉lia꞉ bubaki auma꞉ib. A꞉la꞉fo꞉ko꞉lo꞉ giliyo꞉ mogago꞉ imili nowo꞉ i o꞉lia꞉yo꞉ mo꞉dimidaki, iyo꞉ ga꞉li melea꞉ki ta꞉ta꞉bi.”
40Gamaliel eyo꞉ a꞉la꞉sa꞉labiki, Yu misa꞉ kalu iliyo꞉ elo꞉ to sa꞉lab a꞉no꞉ ko꞉lo꞉ kudu ane. Iliyo꞉ Iliga꞉felo꞉ kaluwo꞉ a꞉ma꞉la꞉ tilia꞉a꞉sa꞉ga꞉ dotabiki, dibolo alo꞉ bo꞉fo꞉lowan kaluwa꞉yo꞉ iyo꞉ sanama꞉ki a꞉na sio꞉ ko꞉lo꞉, sa꞉nda꞉sa꞉ga꞉yo꞉ Iliga꞉felo꞉ kalu imo꞉wo꞉ a꞉la꞉sio꞉, “Giliyo꞉ Ya꞉suwa꞉ wi sa꞉lakiyo꞉, wa꞉kabiyo꞉ mada wida꞉so꞉bo.” Imo꞉wo꞉ towo꞉ a꞉la꞉ halale sa꞉la꞉sa꞉ga꞉, iliga꞉fo꞉.
41A꞉la꞉fo꞉ko꞉lo꞉ iyo꞉ Yu misa꞉ kalu kegeo꞉ a꞉no꞉ ta꞉ta꞉sa꞉ga꞉ ha꞉nakiyo꞉, Godeya꞉yo꞉ iyo꞉ Ya꞉suwa꞉ wiya a꞉la꞉ta꞉ga꞉lo꞉ sendelowo꞉wo꞉ o꞉li diab a꞉la꞉do꞉ asulab a꞉no꞉, iyo꞉ sagala꞉liki ane.
42A꞉la꞉ta꞉ga꞉ Godeya꞉ malilo꞉ ayamio꞉lo꞉, kaluka꞉isaleya꞉ ayamio꞉lo꞉ Godeya꞉ Ene to nafa widakiyo꞉, Ya꞉su E, Godeya꞉ Enedo꞉ Da꞉feyo꞉ kaluwo꞉ E a꞉la꞉liki iliyo꞉ ho꞉leno꞉ tambo wida꞉li sia꞉liki mo꞉edo꞉.
