1Apolosa Kotina yuu dokonya kateamo gii dokopa Polome yuu manda dupanya-kaita payao ipao Epesasa pyakanatala yuu dokonya Jisasa masoo miningi endakali mendapua kateamino kandea-pyaa.
2Kandatala baame dupa lamaiyoo, “Nyakamame masoo miniamino gii dokopa Oli Sipitisa doko nyiamipi?” lao pisia-pyaa. Dupame baa lamaiyoo, “Oli Sipitisa mende kalyamo lapae naimame nasiamana,” leami-pyaa.
3Dopa leaminopa Polome dokaita lamaiyoo, “Nyakamame kaimbu aipale mende nyiamipi?” lea-pyaa. Dopa leamopa dupame baa lamaiyoo, “Naimame Jonenya kaimbu doko nyiamana,” leami-pyaa.
4Dopa leaminopa Polome dokaita lamaiyoo, “Endakali mona kapilyiamino dupa Joneme kaimbu pyakamaiya. Joneme endakali dupa lamaiyoo, ‘Akali mende namba watao epelyamo doko lao masoo minalapape,’ lea-pyomo doko Jisasa kandao lea-pyaana,” lea-pyaa.
5Polome pii leamo doko sepala dupame Kamongo Jisasanya kenge doko lao kaimbu nyiami-pyaa.
6Kaimbu nyepeaminopa Polome dupanya aiyomba minani pyakamaiya-pyaa. Dokopa Oli Sipitisa doko dupa-kisa epeamopa dupame Gote lao tama pyoo pii tata waka dupa lao Gotenya pii panao lao kateami-pyaa.
7Akali dupa pyasoo kingi ita mende-kisa dee lapomapi mende-pyaa.
8Polome kana tepoma Jutamanya losuu anda dokonya kolandata pyoo paka nakayao Gotenya isingi dokonya lao endakali dupanya masingi sakatasakamaiyoo dupa-pipa pii laloo pyoo kateami-pyaa.
9Dopa piamoaka doko, yangi dupame nyakamanya ingi monapi dupa kana jetala masoo minala nayami-pyaa. Dupame endakali enomba dupanya Kamongonya pii manapi dupa kandao pii koo leaminosa Polome dupa yakinatala pea-pyaa. Masoo miniamino dupa awapa lanyoo pupala akali Titanasa lenge dokonya mana lenge anda mendenya baame dupa-pipa koteaka lao pii laloo pyoo katea-pyaa.
10Baame ee kana lapoma dopa pyoo katea-pyaa. Dopa piamopa Juta endakalipi tata wakapi yuu Esia kateamino dupa pitakame Kamongonya pii doko siami-pyaa.
11Polonya kingilyaka dokonya Goteme kalai pupu lapae tata waka mendepale mendapua pia-pyaa.
12Endakali dupame Polonya lapalapapi kalai pyaanya yonge pee sanga pyao kisa pingi dopale mendapuapi nyepala, nyoo pao endakali yaina pyapae dupa-kisa setapa piaminopa yaina dupa mee jeta pia-pyaa. Dopa piaminopa enjele koo endakali dupa-kisa paleamo dupame yakinatala peami-pyaa.
13Dokopa enjele koo watao pyao paenge Juta mendapua epeami-pyaa. Dupame endakali-kisa enjele koo palenge dupa watao pyalanya Kamongo Jisasanya kenge doko lao makande pyoo dapa lengema-pyaa: “Polome lenge Jisasa dokonya kenge doko lao nambame nyakama pupa lelyona,” lengema-pyaa.
14Jutamanya pitisa mupa Sipaa lenge dokonya ikiningi kalange dutupame mana doko minao kateami-pyaa.
15Dopa piaminopa enjele koo dokome dokaita kandao, “Nambame Jisasa doko kandenge. Polo doko kandengeakana, nyakama angi apitupape?” lea-pyaa.
16Dopa latala enjele koo paleta akali dokome dutupa-kisa pyakala ipupala dutupa pyaanya isa setapala ita minia-pyaa. Dopa pyoo yambale dupa lyokao lapinya nepatakamaiyamopa, dutupame baa yakintala papata too putiputi latae dupa paka pyoo peami-pyaa.
17Maitakao Jutapi tata waka Epesasa dokonya kateamino dupapi dupa pitakame piamo doko sepala pakame kumapala dupame Kamongo Jisasanya kenge doko lao lalyoo kateami-pyaa.
18Dokopa endakali longo masoo minateamino dupame ipata ipata pyoo nyakamanya mana miningi dupa lao panao tata leami-pyaa.
19Topoli mana miningi akali longo dupame nyakamanya buku dupa nyoo elyambu petala endakali dupa pitakanya enombanya soo yangeami-pyaa. Dopa petala buku dupanya muni akipate peape lao itaki piaminopa kina tausene kingi ita yuungi jia-pyaa.
20Mana dopale dupanya Kamongonya pii dokome ita minao kyoto joo tayama tayama pyoo taya-pyaa.
21Dokopa Polome Masetoniapa Akayapa yuu dolaponya pupala Jetusaleme patoo lao kyoto joo masia-pyaa. Baame lao pituu, “Nambame Jetusaleme pupala dee Loma yuu dokonya patoakana,” lea-pyaa.
22Dopa latala baame baanya nisingi akali Timoti Ilasatasapa dolapo Masetonia yuu dokonya wambao pena latala baa dee kote mendatupa Esia yuu dokonya mee katea-pyaa.
23Gii dokopa endakali mendapuame Kataisanya pii manapi minao paenge dokonya imbu kayapala pundu andake mende sakatasiami-pyaa.
24Akali Dimitiasa lenge mendeme oapi dupa silipame wasoo katea-pyaa. Baame Atemisadokonya losuu anda doko wangi tao yakane mendapua silipame wasoo katea-pyaa. Dopa pyoo baa-pipa awapa kalai pingi dupame yole longo lao nyoo katengema-pyaa.
25Baame akali dokaitapi dee kalai dopale pingi dupapi dupa nyoo elyambu petala lao pituu, “Kaimia paluma, naimanya kalai dokonya yole longo lao naima-kisa epenge doko masilyamino.
26Dee mende nyakamame soo kandao masilyamiaka kanja: Epesasa yuu dakenya iki daa, akali Polo dokome Esia yuu dake pitakanya endakali dupanya masingi aloo pisetakamaitala kaita duna waka mende laitaka pyoo, endakali kingimi gote wapuingi dupa angi daana lao lamailyamo.
27Tenge dokonya minao endakali dupame naimanya kalai dake kilya kandatami. Doko iki napinya, dupame enda gote Atemisa dokonya losuu anda doko kandao angi mende daa lamona lao masetamiaka. Dopana, Esia tange dupapi dee yuu dupa pitakanya endakali kalyamino dupa pitakapimi enda Atemisa lao tama pilyamino dokonya kenge epe doko alu pitana,” Dimitiasa dokome dopa lea-pyaa.
28Dupame pii doko sepala etete imbumi kumapala lao pituu, “Epesasa tange Atemisa doko andakena,” lao puu lao leami-pyaa.
29Dopa latala dupame taono dokonya endakali dupanya masingi minao lungu piseteaminopa dokaita pitakame lalya lana petala alo pyao limbao petenge panda dokonya kolameami-pyaa. Polo-pipa awapa paenge akali Masetonia tange Gayasa lenge dokopa Atitakasa lenge dokopa dolapo puu lao anjetala pyalya lao nyoo peami-pyaa.
30Polome endakali limbiamino dokonya paanya piamopa Jisasa masoo miningi endakali dupame napena lao kaita lyokeami-pyaa.
31Esia tange kapomane dupanya mendapua Polonya kaita miningi kateamino dupame apata Polo kandao, “Emba limbilyamino panda ongonya napupi lao kyoto joo wai leami-pyaa.
32Limbiamino endakali dupanya mendapuame pii mendeaka lao ae leaminopa mendapuame mendeaka lao ae leami-pyaa. Dopa lao nyakamanya masingi dupa kyekeamopa, aipuma limbilyamape lao longo dupame tenge masala nayami-pyaa.
33Juta dupame akali Alekesanda lenge doko endakali dupanya enombanya kalya pena latala mendapuame pii wasoo maiyaminoli pyoo baame kingi pee latala dupanya pii yanu pyao laanya pia-pyaa.
34Dopaka doko, dupame akali doko Juta lamo lao masetala pitakame pii mendai dopaka lao, “Epesasa tange Atemisa doko andakena,” lao puu lao lao kateaminopa kiloko gii lapomapi mende pea-pyaa.
35Maitakao Epesasa tange kapomane andake dokome dokaita pii kaena latala, “Epesasa tange akali anematupa, enda gote Atemisa dokonya losuu anda dokopa kaiti-kisa tae yainanda kuli mende isa epeamo dokopa dolapo naima Epesasa tange dupame isoo kalyamano doko endakali pitakame kandengema daape.
36Endakali mendaipi mendeme doko sambona laa nayatana, nyakama pii kayalapa. Opale mende pyaanya pitamino doko yapa napyepape.
37Nyakamame akali laminao ipamino dolapome losuu anda dupanya pakepi mende nanyimbi. Naimanya enda gote doko kandao pii koopi mende nalambiaka.
38Dee Dimitiasa mauwapi baa-pipa awapa kalai pingi dupapi dupame mende kosimi lapenge jetamo kandao doko, kosa lapenge gii soo kapomane andake dupa katao pilyamino. Dupa katatamino dokopa dupame mende kosimi laa laa pina kayalapape.
39Dee nyakamame pii lapenge setamoaka kandao doko, limbingi mana watao minao ipao tolasepenge.
40Angi tenge mende nakatamopa ae lalya lana pyoo katalamano dokonya kapomane dupame naima-kisa pii setapimili lamo. Dupame naima kandatala dokonya pisipimili kandao doko, naimame kapa pao yanu napyapumalina,” lea-pyaa.
41Kapomane andake dokome dopa latala limbiamino dupa pena lea-pyaa.
