Apocalipsis 10

1

2

3

4

5

6

7

8

9

10

11

12

13

14

15

16

17

18

19

20

21

22

¹Tume tuque peya bacuare Yusu tsahuaquique casadaque barepa juque buteyaju. Barepa juque huani ducutu jucuare. Iyuca tajinaqui ecuejiquini ijeti bucha huecae, etsaca bacue tuja etiqui bucha huecae jadyatu jucuare.

²Quirica piji epirurique ejiraque tujatu inacuare. Tapacuare tujatu jida eque amaca tsehue cueri cuanaja ecuaque, jani eque amaca tsehue bacue yahua.

³Tumetu quiquecuare jebuda etsuri tsehue, iba mariyaque juya bucha. Tumeque marijacahuaju tuque bacacuare peya cuanaja etsuri pacarucu tiriti juya bucha.

⁴Pacarucu tiriti quisaratihuajutu era huenecara acuare tunara quisarati ahuaque. Tume tuque bacacuare etsuri barepa juque. —Hueneume mira bacahua cuanaque, —jadya aira cuana acuare barepajura.

⁵Tumetu barepaju Yusu tsahuaquique cueri cuanaja ecuaque, yahua jadya tapatsu netiyaju bahuara emetucu jida eque amaca huesacuare barepaju.

⁶—“Tere patu amena japadama”, jadya Yusu Maju Baecuara cuejamerehua. Turadyatu barepa, yahua, enaja ecuaque jadya iyahua. Turadyatu iyahua dutya, dutya queja aniyaque.

⁷Beru yuequedyatu Yusura cuejacuare tuque equeque cuitadya quisarati cuejaqui cuanaque. Iyacuatu ejetsunue ama Yusura amena ishuque inime ejitaju aya. Pacarucu ishuque Yusu tsahuaquira corneta meyatibuneyajutu amena Yusuja inime etehuaque juhua, —jadyatu jucuare.

⁸Bacanucacuare tuque barepaju ejeque cuana quisaratiyaju. —Cuacue, ique tsahuaquique casadaque yahuaju, cueri cuanaja ecuaqueju jadya netiya queja. Inacue quirica piji tura inayaque, —jadya tura acuare.

⁹Jadya juatsu cuacuare Yusu tsahuaqui queja. Jadya juatsu tuque bacaticuare tura quirica piji inayaque. —Jeedya micue. Inacue. Aracue. Micue ecuatsajutu huajada juya huaja bucha. Micue ecarecaniju camadyatu patseda juya, —jadya riyaque Yusu tsahuaquira acuare.

¹⁰Inatsacuare tuque Yusu tsahuaquija emetucu juque. Inatsatsu tuque aracuare. Ecue ecuatsajutu huajada jucuare huaja bucha. Buijitsu tuque patseda bacuare ecarecaniju.

¹¹Ejera cuana taa jadya acuare: —Cuejanucataqui tuque micue Yusura eje bucha juya jadya ayaque jetiama epu cuanaju aniya cuanaque, eje uma anae cuanaque, tumebaedya tunaja ecuari cuana, —jadya tura cuejacuare.