Revelation 10

1

2

3

4

5

6

7

8

9

10

11

12

13

14

15

16

17

18

19

20

21

22

¹Egae kai lau agelo ekapula alogaina auga agaꞌo ufai eake emai laisa. Ke apuapu auga tiapu koa kepaiꞌiuka. Ke ananati isa kania laagai efai elao. Ke kua maaga auga kina koa iꞌopoga emia. Ke ife auga ipalao loai eaga epito auga koa iꞌopoga emia.

²Ke imagai puka eꞌele eega umamo auga eafiia. Isa ife kaina auga aꞌuai epaapa, ke lafanina auga aagoai epaapa.

³Ke isa laion eagaga koa iꞌopoga, aina akaikiꞌagai eagaga. Ke eagaga aisama, ufa eauga aꞌo akaikiꞌa emia auga auꞌi imagea gua auꞌi iifa kepamue.

⁴Ke ufa eauga auga auꞌi imagea gua keniniꞌani aisama, lau kapa agaꞌo mapapua laomaoma kai, ufai aufalao agaꞌo iina eifa oma aina lalogonia, “Puka ipaafiapina kapa moafia puka mopaafiapia, ke ufa eauga auꞌi imagea gua auꞌi kapaꞌina keifania auga ogefake kapa gamia, folopapua,” eoma.

⁵Ke agelo ife apie aꞌuai epaapa, ke apie aagoai epaapa auga ima kaina eafiakae ufa Deo eagu afuga epaꞌa penia laisa.

⁶Deo auga eague aoniamo, ke Isa ufa epagama, ke kapa maꞌoai ufai kekae auꞌi isafa epagamaꞌi. Ke Isa aagoa epagama, ke kapa maꞌoai aagoai kekae auꞌi isafa epagamaꞌi. Ke Isa aꞌu epagama, ke kapa maꞌoai aꞌuai kekae auꞌi isafa epagamaꞌi. Agelo lau laisa auga, Deo egaꞌina faagagai pakoꞌa iifaga ekapaisa, ke eifa einaka, “Deo kina eifania auga kina afaeafiapia!

⁷Kai Isa agelo imagea gua auga ega fiꞌi ageipina kinaꞌiai aisama, Deo ega ogefake kapaꞌi fekemia eoma auga agepafuaꞌi. Egaꞌina auga Isa ega pinauga auꞌi profeta maaꞌiai eifania koa iꞌopoga mo agemia,” eoma.

⁸Egae kai ufai aufalao agaꞌo aina lalogo auga, lau maauai eifa pugu einaka, “Molao agelo ife apie aꞌuai epaapa, ke apie aagoai epaapa auga imagai puka eꞌele eega umamo ekae auga moafia,” eoma.

⁹Ke lau lalao agelo eegai ke lapainia puka eꞌele egaꞌina gapeniau laoma. Ke isa lau epainiau einaka, “Moafia moania! Ke aloania aisama, akemuai auga memeꞌuge feina emekiꞌa alogaina auga koa iꞌopoga agemia. Kai ageake agelao guamu alogai aisama agekimu,” eoma.

¹⁰Ke lau isa imagai puka eꞌele egaꞌina laafiia laaniia. Ega aisama akeuai auga memeꞌuge feina emekiꞌa alogaina auga koa iꞌopoga emia. Kai lakogopia eake elao aisama, guau alogai ekimu.

¹¹Ke isa lau epainiau einaka, “Oi ago maꞌo, papiau maꞌo, mala maꞌo papiauꞌi, ke kin maꞌo isafa maaꞌiai egaꞌina kapaꞌi fouꞌi profeta koa fomia foifafouꞌi pugu,” eoma.