Apokalípsi 10

1

2

3

4

5

6

7

8

9

10

11

12

13

14

15

16

17

18

19

20

21

22

¹Ayteke nah hiyá pahapwiwa ahj detye akiw ig muhuk ayta inugiktak. Ig kasimsapu akak ukuhne. Pahá tuwesegu ay aranwa gitew. Gihepka kaamuwyisima ke kamuwbe. Gibagwan kadawe ke tiketbe akadwey.

²Ig sumuh pahak kagta nopsehsa in woknene ay giwaku. Ig danuh atan, ig sibuh gikugku kihehapriktak ta ahakwat parawhokwa. Inme gikugku patuwenapriktak ig sibuh ta apitit waxri.

³Ayteke ig kabiman akak gihawna ke kawokwinebe gibiman ahawna. Pisenwa gibiman ntewnehker akebyi diridriye dirihwa akak nihawna. In awna yuwit.

⁴Pase in diridriye matiswa, nah ahegbetaw adahan nah tamak giwnkis. Henneme nah timá pahá ikupimnat awna nuthu inugiktak. In awna: ―Ayamnite inakni giwnkis ini ntewnehkernene diridriye. Ka ba tamakni amadgat pikagtan.

⁵Ayteke ig ner ahj ku pariye nah hiyá tabirnene ahakwepi parawhokwa apit waxri, ig tarak giwak kihehapriktak ta inut.

⁶Ig awna: ―Nah awna kuri giwaprik Uhokri ku pariye dehetniye adahan apanenekwa, ku pariye keh en akak madikte inugikya, ku pariye keh waxri akak madikte amadgaya wayk, ku pariye keh parawhokwa akak madikte ahakwaya un. Nah awna, kuri ahawkanaprik ka ayipwihwa adahan madikte ini biyukka.

⁷Pase igkis ntewnehkerpye ahj agigha, ayge nikwe madikte ku pariye ig Uhokri ikiswanaw adahan ini hawkri in makisup. In ku pariye minikwak hiyeg kotenene hiyakte, kuri metakwa in kahayak ku samah ig ekke ta gitkis gibukpig gawnapepu. Hennewatbaki ig ahj detye awna.

⁸Ayteke ini pahá ikupimnat ku pariye kuwisnene nah timé awna inugiktak, in awna nuthu akiw. In awna: ―Ataknaba iwí ini kagta ku pariye woknene ay giwaku ner ahj ku pariye tabirnene ahakwa parawhokwa apit waxri.

⁹Nah timapni henne, nah atere git ner ahj. Nah makahpa git ini nopsesnene kagta tagegbihka. Igme kaytwa nuwnhu: ―Ahah. Iwepni. Axnin. Kuwewanek in wageswanek tipiye pitungik. Ka sam. Ay pibiygik in kitere ke ahayakbe anun.

¹⁰Nah timapni henne, nah iwé ini nopsesnene kagta giwakutak. Nah axwin. Hennewa, in kitere nubiygik ke ahayakbe anun. Henneme nah dakerepni, in wageswe kaatipinisima ay ntungik.

¹¹Pisenwa awnaka nuthu: ―Pahaynewata akiw amawka pis kinetihwa amin ku pariye nemnikumpiye ta gitkis kaayhsima hiyegipiyenepwi akak kaayhsima nawenéwa giwnkis, ta gitkis hiyeg msekwenepwi apit kaayhsima waxri, ta gitkis hiyeg gikiparakis kaneayhsima.