1Ti quila otro jun ángel, pero jel tzatz juntiro. Ti huan coel jan ja ba satq'uinal potzan soc jun ason. Jaxa ba s'olomi, tey jun q'uintum lajan soc jastal scorona. Jaxa sati, huan lijpel jastal ja sat ja c'ac'u, jaxa yechmali, chacjoljol xta y huan nijquel lajan soc jastal huax yiaj vuelta ja yat c'aq'ui.
2Ti yioj jun yal juun balan ajyi, pero ja huego, paubal xa, ti yaman yuj ja ba sc'abi. Ti xeta och ja stojol yoc ja ba yoj mari, pero ja surdero yoqui, ti sbatunej ja taquin luumi.
3Ti xa ahuani tzatz leca, jastal huax ahuani ja choji. Huaj to cabi, ti q'ue oc' juque vuelta ja chahuuqui.
4Yajni ch'ac oc'uc juque vuelta ja chahuuqui, jaxa queni huax c'ana nique oj tz'ijba huego ja jas ch'ac cabi, pero ti cho cab huego otro jun c'umala ja ba satq'uinali. Ti yala caba: ―Moc atz'ijba ja jas ahuab yala ja yoq'uel ja juque chahuuc jahui. Mi ni sbejuc huax abxi ja jas yalahuei, xyutajon ja c'umal jahui.
5Jaxa ángel it quila xetan jun yoc ba yoj mari soc ja ba luumi, ti xa sacha stojol sc'abi, ti sq'uela q'ue ja satq'uinali, ti yalaa:
6―Ja ma' sac'an ni lec tola vida, ja' ni ja ma' sc'ulunej ja satq'uinali soc ja luumi, soc ja mari, soc spetzanil ja cosa, ti huax yila que meran ja jas huanon yaljel. ¿Jas to junuc oj majla masi?
7Porque oj xa q'ue suu ja strompeta ja ba suquil ángel tac. Ja jas quechan yen huas snaa ja Diosi soc ja yaluman ja ma' yatjum ni ‑ como alji ni yabye ja yenle chomajquili ‑ pero spetzanil ja jas huas snaahuei, huan xa ni c'otel smeranila, xchi ja ángel jahui.
8Ti cho cab otro vuelta ja sc'umal ja ma' huan c'umal con ja ba satq'uinali. Ti cho yala caba: ―Cax iaj ja yal juun it yaman yuj ja ángel jau ti xetan ec' jun yoc ja ba mari soc ja ba luumi, como jaman xa ni yuja.
9Ti huajyon ja bay ja angeli. Ti jc'ana yi ja yal juun yaman yuji. Ti yala caba: ―Lec, iaj, ti xa bucu coe, jaxa ba hua tii, jel chi' oja huabi como jastal yaalchab. Pero cuando huax coi, c'aj oj huajuc juntiro ja hua hualtzili, xyutajon.
10Ti quiaj ja yal juun ja ba sc'ab ja ángel jahui. Ti jbucu coa y meran nia, ja ba jtii, jel chi' cabi jastal ja yaalchab, jaxa mas tzaani, cuando jbucu ta, jaxa ba caltzili juntiro c'ajbi.
11Ti cho alji cabi que t'ilan bi oj yii majan ja jti ja Diosi porque ay to bi jas oj cal sbaj jitzan lec ja cristiano soc ja slugarei, anima tuctuquil ja sc'umalei, ma tuctuquil ja ma' ay yatel yujilei.
