Annabi Yeremi 12

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

¹«Alatala, i tinxin, kɔnɔ n wama i maxɔrinfe i xa natɛ nde xa fe ra. Munfe ra mixi ɲaaxie xa fe luma sɔɔnɛya ra? Munfe ra bɔɲɛsa na yanfantee bɛ?

²I tan nan e daaxi, i tan nan e baloxi. E sigama yare, e fe rabama e xa duniɲɛigiri kui. E i xili falama e dɛ ra, kɔnɔ i xa fe mu na e bɔɲɛ kui.

³Alatala, i n sondonyi ma fe kolon. I xa natɛ tongo mixi ɲaaxie faxafe ra, alɔ yɛxɛɛ naxee xaninma e kɔn naxaba yire.

⁴Bɔxi luma sunnunyi kui han mun lɔxɔɛ? Tunɛ tondima fade han mun tɛmui? Subee nun xɔnie na faxafe mixi xa ɲaaxuɲa saabui ra, barima e naxɛ, ‹Ala mu muxu toma.›»

⁵«Xa i tagan i gide adamadie ya ma, i fa i gima di soe ya ma? Xa i bira taa kui, i ɲɛrɛma Yurudɛn wula kui di?

⁶I ngaxakerenyi naxee kelixi i baba xɔnyi, e fama nɛ i yanfade, e sɔnxɔɛ rate i ma. I naxa la e xa wɔyɛn ɲɔxunmɛ ra.

⁷N nan n ma banxi bɛɲinma nɛ, n nan n ma ɲama raboloma nɛ, n xanuntenyie fi e yaxuie ma.

⁸N na rabama nɛ barima n ma ɲama bara lu alɔ yɛtɛ xaaɲɛ wulai. N bara e xɔn.

⁹N ma ɲama bara lu alɔ xɔni maxɔnɔxi sɛgɛe birama naxan fɔxɔ ra. ‹Wulai subee, wo xa fa n ma ɲama sɔntɔde.›

¹⁰Xuruse dɛmadonyie bara n ma laakɔɛ kana, e n ma xɛ fanyi maboron, a findi yire xaraxi ra.

¹¹N ma bɔxi bara findi gbaloe yire ra. A na sunnunyi kui n ya xɔri, sese mu fanma mɛnni, mixi yo mu kinikinima a ma.

¹²Sɔɔri ɲaaxie na fafe kelife gbengberen yire, barima Alatala bara a ragiri santidɛgɛma xa bɔxi birin li, mixi yo naxa lu bɔɲɛsa kui.

¹³E bara sansi xɔri si, kɔnɔ e tunbe gbansan nan sɔtɔma. E e yɛtɛ rataganma nɛ fufafu. Alatala bara xɔnɔ wo ma, na birin xa findi yaagi ra wo bɛ.»

¹⁴Alatala bara a masen, «Si naxee sabatixi Isirayila rabilinyi, si naxee n ma Isirayila ɲama xa bɔxi xun nakanama, n naxan fixi e ma, wo xa a kolon n fama nɛ wo fan keride wo xɔnyi, n fa n ma ɲama ba wo yi ra.

¹⁵N na gɛ e bade wo yi ra, n man kinikinima nɛ e ma, n fa e ragbilen e xa bɔxi ma naxan findixi e kɛ ra.

¹⁶Xa na sie n ma ɲama xa sɛriyɛ matinkan, e fa e rakali n xili ra, ‹Alatala ɲiɲɛ,› n e rasoma nɛ n ma ɲama ya ma. E nu bara n ma ɲama matinkan e kalide Bali xili ra, n ma ɲama fan nɔma nɛ e matinkande kali ra n xili ra.

¹⁷Kɔnɔ xa a sa li na sie mu e tuli mati n ma masenyi ra, n e xun nakanama nɛ, n fa e sɔntɔ.» Alatala xa masenyi nan na ki.