1A kakailai kai Asap. God, a umana Tematana dia tar ki ta kaum gunan; Dia tar vabilak kaum pal tabu, Dia tar re vapar vue Ierusalem.
2Dia tar tabar ra umana beo liuliu ma ra virua i kaum umana tultul, Ma ra vio i kaum lavur tena lotu dia tar tul tar ia ta ra umana leing na pui.
3A gapu i diat i alir kikilane Ierusalem da ra tava ka, Ma pa ta tikai abara ba na punang diat.
4Avet ave da ra magit na varkulumai pire ra umana talai vevet, Ma da ra magit na varvul ma ra magit na varvaula pire diat dia ki kikilane avet.
5Aivia ra bung boko, Luluai, aivia ra bung una kankanuane vatikene pa avet? Ma kaum varpin na birao da ra iap?
6Una lolonge tar kaum kankan taun ra umana Tematana ba dia ngulngul tam, Ma taun ra lavur vuna tarai ba pa dia lotu ta ra iangim.
7Tago dia tar konom vapar vue Iakob, Ma dia tar pait ra kamara ta kana gunan.
8Koko una bali ra mangamangana kai ra umana tama i vevet ta vevet; Boina ba una lulut, ma una totongo upi avet ma kaum bala na varmari; Tago ave bel tuna.
9Una maravut avet, God kaveve tena valaun, ure ra minamar i ra iangim, Una valangalanga avet, ma una pun vue kaveve varpiam ure ra iangim.
10Ta ra ava ra umana Tematana diat a biti boko dari: Akave kadia God? Boina ba una vaarike ra varobo ure ra gapu i kaum umana tultul Livuan ta ra umana Tematana ta ra luaina mata i vevet.
11Boina ba ra mamadang kadiat di ga vi diat na vana rikai piram; Vardada ma ra ngala na dekdekim una valaun diat dia to na mat;
12Ma una valavurua ma ra balbali tadav diat dia ki kikilane avet, Ure ra varvul, Luluai, nina di ga vul u me.
13Damana avet kaum tarai, a kikil na sip nina u tabatabar diat, Avet a pite vatikene pa u; Avet a vaarike kaum pite varpa pire ra lavur taun tarai par.
