1Jezu oehnõko mana kutuisarykomo. Toehse tahtao kurãkõ apiakãko mana popyno htae emero, aorihtyamo, orihpynomo, enara. Ynara oururu se ase Ritonõpo netaryme, Jezu Kyrixtu Kuesẽkõ netaryme roropa. Ynara ãko ase oya,
2Ritonõpo omiry ekaroko imehnõ netaryme. Ekurehpyra exiko. Jezu apoiry se toto ahtao, amorepako toto. Apoiry se hkopyra toto ahtao aomiry ekaroko rokẽ toto netaryme. Pohnõ zuruko tyyrypyrykõ poko pyra toto ehtohme. Ãkyemapoko toto. Amorepako toto Ritonõpo omiry poko. Penekehpyra ke exiko roropa toto amorepary poko.
3Imeĩpo zae omi etary se pyra exĩko mã toto sero nonopõkomo, typenetatohkõ poko rokẽ toehtohkõme. Ajohpãkõ menekãko mã toto tamorepanekõme, tyyrypyrykõ poko rokẽ tamorepatohkõme.
4Zae omi rumekãko mã toto ajoajohpãkõ omiry rokẽ etatohme tyya xine.
5Naeroro mokaro sã pyra exiko. Tuaro exiko. Oetuarimaryhtao eanahtoko rokene. Imehnõ zuruko Jezu Kyrixtu poko. Orẽpyra exiko Ritonõpo omipona. Imehnõ akorehmako roropa aomipona toto ehtohme.
6Okynahkopyra jorihtoh toehse nase. Yrome torẽtyke pyra ase jorikyry poko.
7Tururume ytoketõ ahtao, toiro osemazuhme eporehkãko. Epehpyry apoĩko mana, tosẽkõ omipona ahtao rokene, osema etyhpyry pona toeporehkase ahtao roropa. Mokaro sã ywy. Poremãpyra exiase. Yrohmanohpotopõpyry poko tõtyhkase ywy. Kuesẽkõ onenetupuhkehpyra ase. Naeroro Ritonõpo nekarory kurã jeraximãko mana, kure jehtopõpyry epehpyryme. Moro ekarõko mã Kuesẽkõ ya ekarotoh po toehse ahtao. Imehnomo a roropa, emero Kuesẽkõ pyno exiketomo a moro ekarõko roropa mana, aepyry ropa eraximananomo a.
9Timoteu, axĩ sahxo õpokonopyry aotyhkanohko, oehtohme xiaro ya.
10Turumekase Temaxi a jexiryke morara ãko ase. Mõkomo poko typenetaryke toytose ynororo Tesaronika pona. Kyresẽte toytose roropa Karaxia pona. Titu toytose Taumaxia pona, enara.
11Ruka rokẽ taro nase ymaro. Maku menehtase amaro oehtozome, jakorehmaneme aehtohme taro.
12Tikiku aropone Epezu pona.
13Ooepyryhtao jupõ enehko. Tyroa po Kapo tapyĩ tão ynomoase. Moro enehko. Ypapẽ roropa enehko. Okyno pihpyry risẽ roropa enehko, imerohpyry. Moro se nymyry ase.
14Arexãtere mokyro metau poko erohkety. Popỹ mokyro, yhtomane. Apo Kuesẽkõ mokyro wãnohno iirypyryme aexirypo.
15Akorekehkatõ mokyro nexiase Ritonõpo omiry ekaroryhtao yna a. Tõsezusezuhse itamurume ynororo yna maro. Mokyro waro exiko oryhmaryino roropa.
16Terekatu ẽpataka toehse jahtao josewomatoh myhe upiase. Urumekase toto emero porehme. Yrome ynara ãko ase Ritonõpo a ipoko xine, “Papa, iirypyrykõ ikorokako ropa,” ãko ase.
17Mokaro urumekase repe, yrome Kuesẽkõ ymaro monexiano. Yjamihtanopyase Jezu poko juteutõkara zurutohme. Ypyno Kuesẽkõ exiryke eatãpyra toh kynexine, rião pãkomo.
18Kuesẽkõ ypynohnõko mana yryhmaryhtao pohnomo a. Mame orẽpyra tosaka jarõko mana. Moero mã emero esẽme mã ynororo. “Kure Ritonõpo mana, kakehpyra sehtone.” Morara ahtao kure mana.
19Murutase toto Pirixira, Akira, Onexiporu tõ roropa, enara.
20“Pauru opyno xine,” kaxiko eya xine. Eraxitu tõsesarise Korĩto po, Tyropimu ynomoase Miretu po, kure pyra exiryke.
21Axĩ sahxo moehtase konopotara ro ahtao. “Kuurupotase Timoteu a,” tykase Eupuru. Purutẽte, Rino, Kyrautia emero Jezu poetory tõ maro. “Opyno ynanase, Timoteu,” ãko toh nase.
22Ynara ãko ase Kuesẽkomo a Jezu Kyrixtu a, “Timoteu maro exiko. Ipyno exiko,” ãko ase. Enara rokene.
