1ᤂᤪᤡᤛ᤻ᤋ ᤕᤧᤛᤢ᤺ᤴ ᤜᤠᤱ ᤆᤥ᤺ᤰᤛᤧ ᤕᤢ᤺ᤸᤗᤧ ᤁᤠᤰ ᤁᤢᤜᤡᤱᤘᤧᤳ ᤏᤢ ᤁᤢᤛᤡᤘᤧᤳ ᤔᤏᤠᤜᤠ᤹ ᤂᤠᤛᤧᤴ ᤆᤥᤃᤢᤛᤡ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢ ᤕᤧᤛᤢ ᤂᤪᤡᤛ᤻ᤋᤖᤧ ᤂᤢᤴᤇᤡ᤹ ᤋᤃᤡ ᤀᤡᤱᤈᤠ᤺ᤱ ᤐᤡᤏᤧᤖᤥ–
2ᤛᤢᤏᤠᤀᤡᤱ ᤀᤡᤱᤓᤥ᤺ᤛᤧ᤹॥ ᤀᤠᤵᤑᤠᤸᤗᤧᤛᤠᤱ ᤛᤢᤏᤠᤀᤡᤱ ᤛᤧ᤺ᤔᤠ ᤂᤧᤏᤧ᤹ᤃ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤘᤕᤧ᤹ᤀᤥ॥ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤗ ᤏᤡᤛᤠᤶᤏᤢ ᤔᤏᤠᤜᤠ᤹ ᤏᤢ᤺ᤖᤡᤰᤁᤠᤱ ᤂᤠᤜᤢᤴ ᤐᤡᤖᤧᤛᤧ᤹. ᤑᤧ᤺ᤰᤋᤧᤛᤧ᤹. ᤜᤧᤰᤁᤩᤠᤱ ᤜᤠᤱᤜᤠᤱ ᤔᤧᤳᤋᤧᤛᤧ᤹ᤀᤥ॥
3ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤛᤧᤰᤂᤠ ᤏᤡᤛᤠᤶ ᤂᤧᤶᤔᤠ ᤂᤢᤏᤡ᤹ ᤛᤡᤖᤠ᤹ ᤔᤧᤴᤎᤠᤱᤔᤏᤠ ᤕᤧᤶ ᤋᤠᤖ ᤐᤳ॥ ᤁᤖ ᤂᤧᤱᤜᤠ᤹ᤖᤧᤃ ᤀᤠᤒᤠᤅᤣ ᤕᤠᤶᤏᤡᤱᤘᤠ᤹ᤀᤥ ᤔᤧᤒᤣ᤺ᤰᤁᤠᤱ ᤂᤢᤏᤡ᤹ ᤂᤧᤶᤔᤠ ᤛᤡᤖᤠ᤹ ᤁᤧᤎᤠᤱᤒᤠ ᤐᤠ᤺ᤴᤗᤰ ᤂᤧᤶᤔᤠ ᤑᤠ᤹ᤀᤠᤱ ᤒᤠ ᤜᤧᤰᤋᤱᤒᤠ ᤐᤠ᤺ᤴ ᤁᤧᤒᤠ᤺ᤵᤐᤠ ᤛᤡᤰᤛᤠᤶᤒᤠᤜᤠ᤹ ᤔᤧᤗᤢᤵᤛᤢᤛᤡᤖᤥ॥
4ᤂᤧᤱᤜᤠ᤹ᤖᤧᤃ ᤛᤧᤰᤂᤠᤒᤠ ᤐᤠ᤺ᤴᤏᤡᤴ ᤔᤧᤏᤠ᤹ᤖᤢᤀᤠᤱ ᤂᤢᤏᤡ᤹ ᤁᤢᤒᤢᤱᤏᤠ ᤁᤢᤛᤶᤒᤠ ᤂᤧᤍᤠ᤹ᤜᤠ᤹ ᤗᤧᤵᤔᤠᤱ ᤏᤡᤱᤘᤠ᤹ ᤔᤧᤒᤡᤖᤢ᤹ᤖᤥ॥
5ᤁᤖ ᤂᤧᤏᤧ᤹ᤃ ᤁᤠᤰ ᤐᤖᤡᤰᤐᤠ ᤘᤠᤏᤠᤶᤔᤥ ᤜᤠᤱᤜᤠᤱ ᤘᤕᤧ᤹ᤀᤠᤱ ᤋᤢᤰᤂᤣ᤺ᤴ ᤌᤖᤧ᤹. ᤛᤢᤏᤠᤀᤡᤱ ᤛᤧ᤺ᤛ᤻ᤛᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤔᤠᤱᤛᤣᤘᤠ ᤆᤥ᤺ᤰᤔᤠ ᤁᤧᤕᤠ᤺ᤶᤒᤰᤁᤡᤴ ᤆᤥᤃᤧ ᤛᤢᤖᤧ᤹ᤀᤥ॥
6ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤛᤡ᤺ᤔᤠ ᤕᤧᤶᤔᤡᤱᤃ ᤏᤡ᤺ᤳᤋᤠᤱᤅᤣ ᤋᤩᤧᤀᤠᤱ ᤘᤠ᤹ᤖᤥ॥ ᤀᤡᤱᤃᤠ᤹ ᤀᤠᤜᤡᤱᤔᤴᤏᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡ᤺ᤰ ᤆᤥ᤺ᤰ॥
7ᤀᤡᤱᤃᤠ᤹ᤃ ᤀᤠᤛᤢᤰᤛᤢᤰ ᤏᤢ᤺ᤖᤡᤰᤁᤠᤱ ᤏᤛᤠ᤺ᤴᤗᤧᤴ ᤌᤱ ᤌᤰᤋᤠᤱᤅᤠᤱ. ᤀᤠᤗᤥ᤺ᤰᤔᤠᤴ ᤛᤢᤖᤢᤱᤅᤠᤱ ᤘᤠ᤹ᤀᤠ ᤜᤧᤰᤁᤩᤠᤱ ᤏᤛᤠ᤺ᤴᤏᤡᤴ ᤔᤧᤶᤔᤠᤀᤣ ᤁᤳᤋᤢᤱᤅᤠᤱ ᤘᤠ᤹ᤀᤠᤖᤥ॥
8ᤀᤠᤏᤡ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤁᤧᤈᤥ᤺ᤰᤐᤠ ᤍᤠᤱᤒᤠᤸᤗᤧ ᤂᤧᤴ ᤕᤧᤴᤏᤥ ᤛᤠᤶᤕᤥᤏᤡᤒᤠ ᤋᤡᤆ᤺ᤴ ᤜᤠᤱᤛᤧᤶ ᤁᤢᤀᤡᤛᤡ᤺ᤰ ᤐᤡᤀᤠᤖᤥ॥ ᤀᤡᤱᤃᤠ᤹ᤖᤰ ᤔᤧ᤺ᤴ. ᤁᤖ ᤂᤢᤏᤧ᤹ ᤁᤢᤎᤠ᤺ᤴᤇᤡᤱᤔᤠᤴ ᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤁᤧᤜᤠᤱᤒᤠ ᤁᤠᤰᤗᤧ ᤔᤧᤄᤥ᤺ᤛᤢ᤹ᤖᤥ॥
9ᤂᤧᤏᤧ᤹ ᤀᤡᤱᤃᤠ᤹ᤀᤥ ᤜᤠᤖᤠ ᤑᤧᤶᤔᤠ ᤁᤧᤛᤢᤰᤛᤢᤰ ᤋᤶᤛᤡᤴ ᤆᤥᤃᤧ᤹ᤀᤥ॥
10ᤌᤣᤀᤠᤱᤓᤧᤸᤗᤧ ᤍᤣᤔᤠᤛᤖᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ ᤔᤡ᤺ᤶᤈᤡ ᤔᤧᤳᤋᤢ ᤜᤧᤰᤁᤩᤠᤱ ᤀᤡᤱᤃᤠ᤹ ᤗᤧᤖᤠᤱᤅᤠᤱ ᤌᤡᤛ᤻ᤛᤗᤥᤏᤡᤁᤠ ᤐᤣᤀᤠᤱ ᤘᤠ᤹ᤖᤥ॥ ᤁᤪᤣᤛᤣᤴᤛᤧᤴ ᤃᤗᤠᤋᤡᤕᤠ ᤌᤢᤶᤔᤥ ᤐᤣᤀᤠᤱ ᤘᤠ᤹ ᤜᤧᤰᤁᤩᤠᤱ ᤋᤡᤋᤛᤧᤴ ᤍᤠᤸᤔᤠᤋᤡᤕᤠ ᤌᤢᤶᤔᤥ ᤐᤣᤖᤥ॥
11ᤀᤡᤱᤃᤠ᤹ᤏᤢᤃ ᤗᤢᤁᤠᤖᤰ ᤘᤠ᤹ᤖᤥ॥ ᤂᤧᤏᤧ᤹ ᤁᤧᤓᤧᤴᤏᤡᤸᤗᤧ ᤔᤷᤁᤢᤛᤧᤴᤏᤠᤱ ᤂᤧᤏᤧ᤹ᤏᤢ ᤛᤥᤖᤡᤰ ᤑᤧᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤕᤠ᤺ᤶᤒᤰᤁᤥ ᤂᤧᤸᤗᤧ ᤕᤖᤡᤰ ᤁᤢᤓᤠ᤹ ᤐᤡᤀᤠᤖᤥ॥
12ᤀᤡᤱᤃᤠ᤹ ᤋᤢᤂᤡᤁᤛᤧᤴ ᤀᤣᤑᤡᤛᤛᤀᤥ ᤐᤠᤱᤄᤢᤱᤍᤣ᤺ᤛᤢᤱᤅᤠᤱ ᤘᤠ᤹ᤀᤠᤖᤥ॥
13ᤂᤧᤏᤧ᤹ ᤁᤧᤓᤧᤴᤏᤡᤸᤗᤧ ᤋᤪᤥᤀᤠᤛᤗᤠᤶ ᤁᤠᤷᤐᤛᤧᤸᤗᤥ ᤏᤧᤛ᤻ᤛᤢᤱᤎᤠᤱᤒᤠ ᤆᤢᤱᤃᤠ ᤏᤢ ᤛᤠᤵᤐᤴᤜᤠ᤹ ᤑᤧᤳᤋᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤛᤧᤜᤥᤒᤠ ᤛᤠᤵᤐᤴᤏᤡᤴ ᤏᤡᤱᤘᤠ᤹ ᤔᤧᤶᤓᤣ᤺ᤴᤏᤣ ᤑᤧᤳᤋᤧ᤹ᤀᤥ॥
14ᤑᤧᤴ ᤁᤧᤎᤰᤐᤠ ᤀᤗᤧᤰᤈᤧᤴᤍᤖᤗᤧ ᤀᤡᤱᤃᤠ᤹ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤳᤋᤠᤱᤗᤥ॥ ᤍᤠᤱᤒᤠᤸᤗᤧ ᤜᤠᤖᤠ᤹ ᤁᤢᤕᤠ᤺ᤶᤒᤰ ᤁᤢᤀᤡᤛᤡ᤺ᤰ ᤐᤡᤖᤢᤏᤡᤖᤥ॥
15ᤂᤧᤏᤧ᤹ᤀᤠᤱ ᤂᤧᤴᤏᤢ ᤛᤡᤱᤛᤡᤱ ᤕᤧᤰᤕᤧᤰ ᤘᤕᤧ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤏᤡᤃᤧ ᤏᤡᤛᤠᤶᤔᤡᤴ ᤛᤠ᤹ᤖᤡᤰ ᤀᤳᤋᤢᤖᤥ॥
16ᤌᤡᤰᤛᤡᤃᤣ᤺ᤰᤐᤥ ᤀᤡᤱᤃᤠ᤹ ᤂᤠᤛᤧᤴᤗᤥᤒᤠᤸᤗᤥ ᤔᤧᤍᤠᤖᤠᤱᤅᤡᤸᤗᤧ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤕᤠᤵᤔᤡ ᤁᤢᤓᤠ᤹ ᤔᤧᤶᤒᤡᤖᤠᤱᤅᤡᤴ. ᤁᤖ ᤁᤧᤖᤧᤰᤗᤧ ᤀᤡᤱᤃᤠ᤹ ᤔᤧᤗᤧᤖᤠᤱᤅᤠᤱ ᤔᤧᤒᤣᤖᤥ॥ ᤁᤴ ᤐᤠ᤺ᤴᤏᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤂᤠᤛᤧᤴ ᤔᤧᤈᤥᤃᤢᤴᤏᤡᤖᤥ॥
17ᤁᤖ ᤍᤠᤱᤒᤠᤴ ᤀᤡᤱᤃᤠ᤹ᤏᤢ ᤘᤕᤧᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤢᤏᤠᤀᤡᤱ ᤂᤧᤶᤔᤠ ᤔᤧᤄᤥ᤺ᤛᤢᤏᤡ ᤑᤠ᤹ᤀᤠᤱ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠ ᤁᤧᤛᤢᤰᤐᤠ ᤐᤥ᤺ᤱᤔᤠ ᤌᤢᤶ ᤐᤡᤖᤠᤱᤗᤥ॥ ᤍᤠᤱᤒᤠᤸᤗᤧᤃ ᤀᤡᤱᤃᤠ᤹ ᤌᤧᤖᤡᤱᤒᤠᤸᤗᤧ ᤁᤢᤔᤢᤖᤠᤀᤥᤗᤠᤶᤔᤠᤱ ᤛᤧ᤺ᤵᤋᤠᤱᤗᤥ॥
18ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤁᤠᤰ ᤑᤧᤴ ᤐᤠ᤺ᤴᤏᤥᤗᤠᤶ ᤛᤧ᤺ᤵᤐᤠᤀᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤁᤢᤜᤠᤱᤈᤢᤶᤔᤥ ᤁᤶᤒᤪᤠᤱ ᤔᤧᤳᤋᤠᤖ ᤋᤣ᤹ᤀᤠᤖᤥ॥ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤛᤍᤠᤍᤡᤱ ᤏᤢ ᤛᤍᤠᤍᤡᤱ ᤐᤥ᤺ᤱᤏᤡᤖᤥ॥ ᤀᤠᤔᤧᤴ॥
19ᤀᤡᤱᤃᤠ᤹ ᤐᤪᤡᤛ᤻ᤁᤡᤗᤠ ᤏᤢ ᤀᤁᤫᤡᤗᤠ ᤜᤧᤰᤁᤩᤠᤱ ᤀᤥᤏᤣᤛᤡᤑᤥᤖᤛᤖᤧ ᤁᤢᤜᤡᤶᤛᤕᤱᤜᤠ᤹ ᤀᤠᤛᤣᤘᤠᤔᤢ ᤔᤧᤳᤋᤧᤛᤧ᤹ᤀᤥ॥
20ᤀᤡᤖᤠᤛ᤻ᤋᤛᤧᤴ ᤁᤥᤖᤴᤌᤡᤀᤥ ᤘᤕᤧ ᤗᤠᤖᤧᤖᤥ॥ ᤜᤧᤰᤁᤩᤠᤱ ᤋᤪᤥᤑᤡᤔᤛᤧᤴ ᤋᤢᤃᤧᤖ ᤘᤕᤧᤒᤠᤸᤗᤧ ᤔᤡᤗᤣᤋᤛᤀᤥᤀᤣ ᤐᤰᤌᤠᤱᤗᤥ॥
21ᤁᤧᤛᤢᤰᤋᤢᤏᤧ ᤑᤠ᤹ᤃᤪ ᤆᤢᤱᤘᤠ᤺ᤶᤔᤠ ᤋᤠᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤧᤏᤧ᤹ ᤀᤡᤱᤃᤠ᤹ᤀᤥ ᤋᤠ᤺ᤔᤠ ᤋᤶᤛᤡᤴ ᤆᤥᤃᤧ᤹ᤀᤥ॥ ᤕᤢᤒᤗᤛ. ᤜᤧᤰᤁᤩᤠᤱ ᤐᤢᤍᤣᤏᤛ. ᤗᤡᤏᤛ. ᤰᤗᤦᤍᤡᤕᤠ ᤜᤧᤰᤁᤩᤠᤱ ᤁᤠᤰ ᤘᤣ᤹ ᤑᤢ᤹ᤏᤢᤛᤠ᤹ᤜᤠ᤹ᤖᤧᤀᤠᤱ ᤂᤧᤏᤧ᤹ ᤛᤣᤘᤠ ᤁᤧᤶᤜᤠᤰᤋᤧᤀᤠᤱ ᤘᤠ᤹ᤖᤥ॥
22ᤍᤠᤱᤒᤠᤴ ᤂᤧᤏᤧ᤹ᤏᤢ ᤘᤠ᤹ᤖᤖᤥ॥ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤁᤧᤖᤧᤰᤏᤢ ᤘᤠ᤹ᤖᤖᤥ॥
