2 ፂሞቶሳ 4

1

2

3

4

¹ታኒ ኔና ፆሳ ሲንꬃኒኔ፥ ዴዑዋን ዴዒያ ኣሳኔ ሃይቄዳ ኣሳ ፒርዳናው ዴዒያ ኪሪስቶሲ ዬሱሳ ሲንꬃን፥ ቃሲ ኣ ዩሳኒኔ ኣ ካዉቴꬃን ኔና ዞራይ።

²ቃላ ኦዳ። ዎዲ ኢንጄቲና ኢንጄታና ꬋዪና፥ ሚናዴ ኦዳ። ዳሮ ዳንዳያን ኣሳ ታማሪሳዴ ሱሪሳ፥ ሴራኔ ዞራ።

³ኣዪሲ ጎፔ፥ ኣሳይ ቱሙ ቲሚርቲያ ሲሴናን ኢፂያ ዎዲ ያናዋ። ሺን ኣሳይ ባሬንቱ ኣሙዋ ካሊዴ፥ ሲሳናው ናሼቺያዋ ኦዲያ ታማሪሲያዋንታ ጉጂ ጉጂ ሺሻና።

⁴ኡንቱንቱ ቱሙ ዬዉዋ ሲሲያዋ ኣጊዴ፥ ቶሳ ሲሳናው ባሬንቱ ሃይꬃ ዎራ ዛራና።

⁵ሺን ኔኒ ኡባባኒ ኔ ሁጲያ ናጋናው ቤሴ። ዋዪያ ዳንዳያ። ዎንጋላ ሚሺራቹዋ ኦዲያዌ ኦꬂያ ኦሱዋ ኦꬃ። ፆሳ ቆማዳን፥ ኔ ኦꬂያ ኦሱዋ ኡባ ፖላ።

⁶ታና ጊዶፔ፥ ታ ሱꬃይ ጉኪዴ ያርሼቲያ ዎዲኔ ቃሲ ሃ ዴዑዋ ኣጋዴ ቢያ ዎዲ ጋኬዳ።

⁷ታኒ ሎዖ ባፂያ ባፄታዲ፤ ዎꬃ ዎፃዴ ዉርሳዲ፤ ኣማኑዋካ ናጋዲ።

⁸ሲንꬃፔ ታው ፂሎቴꬃ ኣኪሊሊ ጊጊ ኡቴዳ። ሄዋ ፂሎ ፒርዳ ፒርዲያ ጎዳይ ሄ ጋላሲ ታው ኢማና። ቃሲ ኪሪስቶሲ ቆንጫናዋ ዶሲያ ኡባሳፔ ኣቲን፥ ታ ፃላላሳ ጊዴና።

⁹ታኮ ኤሌካ ያናው ሚና።

¹⁰ኣዪሲ ጎፔ፥ ዴማሲ ሃ ኣላሚያ ዶሲዴ፥ ታና ኣጊዴ፥ ቴሴሎንቂያ ጊያ ካታማ ቤዳ። ቄርቂሲ ጋላቲያ ጊያ ጋዲያ ቢና፥ ቃሲ ቲቶ ዲልማፂያ ጊያ ጋዲያ ቤዳ።

¹¹ሉቃሳ ፃላላይ ታናና ዴዔ። ማርቆሲ ታና ኪታን ሎይꬂ ማዳናው ዳንዳዪያ ዲራው፥ ኣ ዴማዴ ኔናና ኣካዴ ያ።

¹²ሺን ታኒ ቲኪቆሳ ኤፌሶና ጊያ ካታማ ኪታዲ።

¹³ኔኒ ያዴ፥ ፂሮዓዳ ጊያ ካታማን ካርፖሳዋን ታኒ ዬጋዴ ዬዳ ታ ጋቢያኔ ቃሲ ማፃፋቱዋ ታው ኣካዴ ያ። ሺን ዱማያዴ ጋልባን ፃፌቴዳ ማፃፋቱዋ ኣያ ጊዶፔኔ፥ ኣኬናን ዮፓ።

¹⁴ቢራታ ቆፂያ ኢስኪንዲሪ ታና ዳሮ ቆሄዳ፤ ጎዳይ ኣው ኣ ኦሱዋዳን ዛራና።

¹⁵ኢ ኑኒ ኦዲያዋ ሎይꬂ ጳልቂያ ዲራው፥ ኔኒ ኣፔ ኔና ናጋ።

¹⁶ኮይሮ ታና ሞቲያ ዎዴ፥ ኡባይካ ኣጌዳዋፔ ኣቲን፥ ታና ኦኒኔ ማዲቤና። ፆሳይ ሄዋ ኡንቱንቶ ፓይዶፖ።

¹⁷ሺን ታኒ ኩሜንꬃ ኪታ ኣዪሁዳ ጊዴና ኣሳይ ኡባይ ሲሳናው ኦዳና ማላ፥ ጎዳይ ታ ማታን ኤቂዴ፥ ታው ዎልቃ ኢሜዳ። ቃሲ ጋሙዋ ዶናፔካ ታና ኣሼዳ።

¹⁸ጎዳይ ታና ኢታባ ኡባፔ ኣሺዴ፥ ባሬ ሳሉዋ ካዉቴꬃ ሳሮቴꬃን ኣፋና፤ ኣው ሜꬊ ሜꬊናው ቦንቹ ጊዶ። ኣሜንዒ።

¹⁹ጲሪስቂሊሲ፥ ኣቂላሲኔ ሄኔሲፎሩ ሶይ ኣሳው ታ ሳሮታ ኦዳ።

²⁰ኤራስፆሲ ቆሮንቶሳ ጊያ ካታማን ኣቴዳ። ሺን ፂሮፊሞሲ ሳኬቴዳ ዲራው፥ ሚሊፄ ጊያ ካታማን ኣ ዎꬃዲ።

²¹ባልጉ ዎꬋናፔ ካሴ ያናው ሚና። ኤዉቡሉሲ፥ ጱዴሲ፥ ሊኖሲኔ ቂላዉዴ ቃሲ ሃራ ኢሻቱ ኡባይካ ኔና ሳሮ ሳሮ ጊኖ።

²²ጎዳይ ኔ ኣያናና ጊዶ። ኣꬎ ኬካቴꬃይ ሂንቴናና ኡባና ጊዶ። ኣሜንዒ።