1Kiŋ Kembunini Kraist Jisösnöŋ asuhuba jebuk malbini me kömumba ahöbini, neŋgö keunini kewöta jim teköba tosatŋi nini bemtohoŋe ala galöm köl neŋgima. Nöŋön Jisös mi aka Anutu yetkö jemesoholŋire kinda gi urugö nup memangöra jim kutum gihizal. Mi wuataŋgömangö jiba keu mi jöjöpaŋ keunöŋ jöhönöŋga mötpi dop kölma.
2Kewö jim kutum gihizal: Göŋön Buŋa keu jiba ambazip uru kuŋgum eŋgiba malman. Mötmegö nalöŋini dop köl eŋgiza me qahö dop köl eŋgiza, mönö töndup kapaŋ köla wahöta keu jim asariba malman. Ambazip bölöŋamŋinaŋgöra jim eŋgiba mindiŋqindiŋ aka galöm meme keu jiba uruwahöt keu eŋgiba malman. Keu mötme me qahö mötmea kun, mi töndup mönö mökösöŋda kinda köna ölŋi nalö dop kusum eŋgiba malman.
3Neŋön mötnaripkö keu nalö kewöŋe ambazip ölöwakŋegöra kusum eŋgimakzinmö, nalö murutŋi kun kam kuŋguiga miaŋgöreŋ mötnaripkö keu kembaŋi kun mötpepuköra tököba kezapŋini gwözöŋ akŋe. Keu murutŋi murutŋi mötpingö kezapŋini köröpŋi köröpŋi aka aziŋa azi sesegilgil öröm eŋgigetka kaba ambazip keu i me wai mötpingö sihimŋi mötzei, miaŋgö dop kusum eŋgigetka malme.
4Mewö mala Buŋa keu ölŋi mötpinbuköra nönöŋgan aka kezapŋini gwözöŋda bem sambanŋi sambanŋi laŋ jiji jimakzeaŋgöreŋ göröken meleŋda mi kezap ala möta malme.
5Malmal mewö me mewö uteköba asuhumawi, Timoti gi mönö töndup böŋ qeba zeŋ kinda ahakmemegi törörök galöm köl aŋguba malman. Aŋgösirip ak gihimei, miaŋgö sihimbölöŋi mönö mökösöŋda bisiba malman. Urukuŋgukuŋgu (ewanjelis) azigö nup areŋ mi körek dop köla mem teköman.
6Nalö köröpŋi bauköm gihimamgö osimamaŋgöra mewö jizal. Tandö lopioŋ möpöseibingöra sömbup qeba jakenöŋ ala ohogetka köwaknöŋ öŋgözapma. Miaŋgö dop nöŋön malmalni Anutugöra ala köleŋda nupŋi memba malalaŋgöra gawman yeŋön keuni jöhöba nuŋgugetka nani sepni mokomamgö dopdowizal. Gölme ki mosötmami, miaŋgö nalöŋan lök kam kuŋgumamgö dopdowiiga mötzal.
7Mönahot aŋgolat azinöŋ ösumtiti aoŋgit nalöŋe luhut almamgöra ösumŋi pakpak qezaköba tiba anjawi, nöŋön miaŋgö dop mötnarip köl guliba aoŋgit aködamunŋambuk ak teközal. Kraist möt narimamgö keu jim jöhöyali, mi qahö köyatiba qaŋ kölalmö, miaŋgö bimŋi mönö pöndaŋ köhöiba qeba malal.
8Kembunöŋ jimtekötekö Toŋi diŋdiŋi aka malmalni kewöta solanŋi aka malali, miaŋgö ila soromŋi mi jim teköm niŋgiiga nöŋgö mamböt ahöza. Kembunöŋ liliŋgöba kamawi, nalö miaŋgöreŋ mi niŋgiba imbine köli geiga qetbuŋanambuk akŋam. Mi nöŋgörök qahö niŋgimapmö, ambazip jöpaköm waŋgiba kunbuk asuhumapkö al mambörakzei, mi yeŋgö imbiŋine mewöyök köli gem eŋgima. Mewö.
9Nalö kewöŋe gölmegö ahakmeme aka memakzei, neŋakni Demas yaŋön uruŋi miaŋgöreŋ jöhöba nömosöta Tesalonaika sitinöŋ anök. Neŋakni Kresens yaŋön Galesia prowinsnöŋ anök. Taitusnöŋ Dalmesia gölmenöŋ anök. Miaŋgöra gi mönö zilaŋ nöŋgöreŋ kamamgö kapaŋ kölman.
11Luk yaŋön nanŋök nömbuk maljit. Maknöŋ welen qem niŋgimapköra gwötpuk möta yaŋgöra osizal. Miaŋgöra Mak waŋgita mohotŋe kamahot.
12Neŋakni Tikikus melaim waŋgibiga Efesus sitinöŋ anök.
13Troas taonöŋ mala malukuni azi qetŋi Karpus yaŋgö mire mosörali, mönö mi memba kaman. Mewöyök kulem lama sileŋe ohoba lipiŋgeri, nöŋgöreŋ lama sile mi mönö kapaŋ köla meman aka miaŋgö andöŋe buk tosatŋi mi mohotŋe memba kaman.
14Aleksander, silwö kopö ohom qeköqekötahö azi mötzani, yaŋön bölöŋi könaŋi könaŋi gwötpuk ak niŋgiba malök. Kembunöŋ ahakmemeŋi kewöta miaŋgö dop likepŋi meleŋ waŋgiiga qakŋe öŋgöi sihimbölö mötmawi, mi mötzal.
15Yaŋön keuninaŋgöra gwötpuk tuarenjoŋ ak neŋgiba malök. Miaŋgöra gi mewöyök mönö yaŋgöra galöm mem aŋguba malman.
16Indim mutukŋi kutukutulaŋ keu jake bohonŋe al niŋgigetka keuni likepŋi jibiga kunŋan kun qahö kaba ni naŋgöm niŋgiba jiyökmö, alaurup pakpak yeŋön buratiba nömosötket. Anutunöŋ siŋgisöndokŋini miaŋgö likepŋi qakŋine albapuköra köuluközal.
17Yeŋön nömosötketmö, Kembunöŋ bauköm niŋgiyök. Nöŋön Buŋa keu jiba ambazip uru kuŋgum eŋgiba nup mi körek mem tekömamgöra aka mem köhöim niŋgiyök. Kantri pakpak yeŋön Buŋa mi mötmegöra möta bauköm niŋgiba laion sömbup kalŋi yeŋgö numbuŋine gil niŋgibepukö aŋgön köla jitŋineyök meköm niŋgiiga eral.
18Kembunöŋ bölöŋi könaŋi könaŋi mem niŋgibepuköra meköm niŋgiiga ölöp Suep bemtohoŋaŋgö uruŋe eu öŋgömam. Kembugö qetŋi mönö sundan möpöseininga nalö teteköŋi qahö aködamunŋambuk aka ahöba öŋgöma. Keu mi ölŋa.
19Gi mönö nöŋgö yaizökzökni Prisila aka apŋi Aqila yetköra aka Onesiforusgö saiwaurupŋi yeŋgöra jinöŋ mötme.
20Neŋakni Erastus mosötpiga Korint sitinöŋ malja. Trofimus i Miletus sitinöŋ mosötpiga kawöl yöhöi ahöza.
21Miaŋgöra kömunjaŋ kie uru nalö qahö kaiga mönö bapŋe kiaŋgöreŋ nöŋgöreŋ kamamgö kapaŋ kölman. Azi qetŋini Yubulus, Pudens, Linus, Klodia aka urumeleŋ alaurup pakpak yeŋön yaizökzökŋini jiba algetka göhöreŋ kaza.
22O Timoti, Kembunöŋ uŋagi kötuetköba göbuk kinma. Anutugö kalem möriamŋan mönö embuk ahöma. Mewö.
