2 Timoti 4

1

2

3

4

¹Ina bada wannan umarni a gaban Allah da Yesu Almasihu, wanda zai yi wa rayayyu da matattu shari'a, kuma saboda bayyanuwarsa da mulkinsa:

²Ka yi wa'azin Kalma. Ka himmantu a kai ko da zarafi ko ba zarafi. Ka tsautar, ka kwabar, ka gargadar, da dukan hakuri da koyarwa.

³Gama lokaci na zuwa wanda mutane ba za su jure wa koyarwar kirki ba. Maimakon haka, zasu tattara wa kansu malamai bisa ga sha'awowin zuciyarsu. Za su rika fada masu abin da kunnuwansu ke so.

⁴Za su juya kunnuwansu daga koyarwar gaskiya, za su koma wa tatsunniyoyi na banza.

⁵Amma kai, sai ka natsu a cikin dukan abubuwa. Ka jure wa wahala; ka yi aikin mai bishara, ka cika hidimarka.

⁶Gama ana-tsiyaye ni. Lokacin yin kaurata yayi.

⁷Na yi tsere na gaskiya; na kuma kammala tseren; na rike bangaskiya.

⁸An adana mani rawani na adalci, wanda Ubangiji, alkali mai adalci, zai ba ni a ranan nan. Ba ni kadai ba, amma kuma ga dukkan wadanda suke kaunar zuwansa.

⁹Ka yi iyakacin kokarinka ka zo wurina da sauri.

¹⁰Domin Dimas ya yashe ni. Ya kaunaci wannan duniyar, ya tafi Tassalonika, Kariskis ya tafi Galatiya, Titus kuma ya tafi Dalmatiya.

¹¹Luka ne kadai yake tare da ni. Ka nemo Markus ka zo tare da shi domin yana da amfani a gareni a cikin aikin.

¹²Na aiki Tikikus zuwa Afisus.

¹³Ka kawo mani mayafin da na bari a Taruwasa wurin Karbus, idan za ka zo ka taho da shi, duk da littatafan nan, musanman takardun nan.

¹⁴Iskandari makerin dalma ya kulla mani makirci ba kadan ba. Ubangiji zai biya shi gwargwadon ayyukansa.

¹⁵Kai ma ka yi hankali da shi, domin yana tsayyaya da maganganunmu sosai.

¹⁶Da farkon kariyar kaina, babu wanda ya goyi bayana. Maimakon haka kowa ya guje ni. Bana so dai a lissafta wannan a kansu.

¹⁷Amma Ubangiji ya kasance tare da ni, ya kuma karfafa ni, yadda ta wurina, shelar ta sami cika da kyau, domin dukan al'ummai su ji. An kwato ni daga bakin zaki.

¹⁸Allah zai kubutar ni daga dukan ayyukan mugunta, ya kuma cece ni domin mulkinsa na sama. Daukaka ta tabatta a gareshi har abada abadin. Amin.

¹⁹Ka gayar da Briskilla, da Akila, da gidan Onisifurus.

²⁰Arastus ya nan zaune a Korinti, amma na bar Turufimus ya na zazzabi a Militus.

²¹Ka yi iyakar kokarinka, ka zo kamin hunturu. Yubulus yana gayar da kai, haka ma Budis da Linus da Kalafidiya da dukan 'yan'uwa.

²²Bari Ubangiji ya kasance tare da ruhunka. Bari Alheri ya kasance da kai.