1Iau o Saimon Pita, a tultul ma aposel anun o Iesu Karisito. A tumtumus torom mot, ra o God i sa tabor tar mot nama wakak na nurnur, elar nami ra i tabor met kai nami, kibino una tokodos na petutna anun o Iesu Karisito, i ra a God anundat, ma anundat a Tene Ulaun.
2A marmaris ma a malmal in bukus un mot, uni mot tasman o God ma o Iesu anundat a Labino.
3Una dekdekin o God, i tabor dat nama kum utna rop ra dat sibo suri, sur dat in laun wakak, ma dat in mur a petutna ra i wakak umatan o God, uni dat tasman o God, i ra i kabo pas dat, sur dat in los anun a minamar ma a wakak na magirano.
4I tabor dat nama kum liliman ra i wakak doko ma i labo doko, kibino una nun a minamar ma a wakak na magirano. I sa liliman taru sur mot in pet lar pasi, sur mot in rakon a magiran o God ma anun a nilaun kai, ma sur mot in walip gusun a utna tagun a rakrakon bual ra in ban laulau mot, ra i ser wanpat tagun a kum laulau na nemnem.
5Iri a kibino ra mot in dekdek sur mot in palataun anumot a nurnur nama wakak na petutna. Ma mot in palataun a wakak na petutna nama mananos un o God.
6Ma mot in palataun a mananos un o God nama petutna ra mot tamtamabat wakak anumot a nilaun. Ma mot in palataun a petutna ra, nama tuntunur dekdek. Ma mot in palataun a tuntunur dekdek nama petutna ra i wakak umatan o God.
7Ma mot in palataun a petutna ra i wakak umatan o God, nama marmaris torom a kum tistisi mot una nurnur. Ma mot in palataun a marmaris ra, nama marmaris kai torom a taro rop.
8Ra a kum petutna ri kura un mot, ma det lubung una numot a nilaun, anumot a mananos un anundat a Labino o Iesu Karisito ken utna oros, ma in wu a wino.
9Ikut, osi ra a kum ngasino ri ke kis uni, i sa gawul in matano ma i sa pulu, ma i sa dumano ru i lena o God i sa gos talapor tari gusun a kum sakino petutna ra i pam tari.
10I mo ra a kum tistising, mot in papam dekdek sur mot in ese i una numot a nilaun lena, o God i sa kabo pas mot ma i pilok pas mot. Ra mot in pami lenra, ka mot in puku,
11ma o Iesu Karisito, anundat a Labino ma anundat a Tene Ulaun in ben ruk mot nama gasgas una nun a matanitu ra ken rop.
12Mot sa tasman a kum utna ri, ma mot sa tur dekdek una lingmulus na etowo ra mot sa los pasi, ikut i wakak ra an unuk tar mot melet nami.
13Ra a laun utmakai una pining, a nuki lena, i tokodos sur an wangun melet tar a nuknuki mot una kum utna ri.
14Uni a tasmani lena, i sa milau sur an nan gusun a pining ri, elar nami ra anundat a Labino o Iesu Karisito i sa upuaso tari tang.
15A lingmulus, an dekdek sur an unuk tar mot una kum utna ri, sur mot in nuk ukai det ra a sa mat.
16Ra met inanos mot una dekdek in anundat a Labino o Iesu Karisito, ma anun a inawan pat melet, awu sur met saksakutna oros kut nama kum saksakutna ra met nuk pas det kut, awu. Met ut met sa tama tar anun a minamar nama matmata met.
17O God o Tamano i ulabo pas a risano ma i pitar a minamar tano, ra i wasiso namin walngano tagisapat una nun a labino minamar. I watungi lenri, “Iri a Nutunglik, a nat na wakak, a gas doko nami.”
18Ma metul ut, metul sa longoro tar in nalngano ri, ra i wan tagisapat una langit una bung ra met kis tomo nami sapat una tangai anun o God.
19A kum utna ra met tama i, i ulingmulus pas a wasiso anun a kum poropet torom dat, ma i wakak sur mot in longoro i. Uni a wasiso anun a kum poropet i elar nama lam ra i kunabor una dumirum, tuk una lar, ra in borodo in utalapor anumot a nilaun.
20Ara labino utna ri mot in tasmani lena, katu wasiso na poropet una Buk Tabu i wanpat tagun a nuknukin tu poropet.
21Uni katu wasiso na poropet i wanpat kut tagun a nuknukin tu musano, awu. A Tokodos na Nion ut, i mugu a taro ra det wasiso nama wasiso tan o God.
