1Simona Petero, Iesu Keriso ena heaheari tauna eo ena aposotolo, aidobudi sunuma maisa lailaina ta se lobaiyao, doha ai, eo eda Eaubada eo Tauhemaurida Iesu Keriso laulau‐duduraina eai taulaulau, enadi ea uuri:
2Ainauia eo loni taba se helaiyawa, Eaubada emi italobaina eai, eo Iesu Keriso eda Guiau.
3Ia gigiborina Eaubada arinai i laoma, debana eai, ginauri gamagaridi se patulau mauri arinai, eo Eaubada nanabuena arinai, i leama arida eai, Tau‐eogaisinida ta nuatui arinai ta lage hedebasaena eo lolona boeana eai.
4Arinai ena ribahesunuma lolo‐dumadumadi, saesae‐ariridi, i leamao enada, abo tanoubu ta abiheposana wa buluma lelehidi debadi eai, au dagogabaedi eo Eaubada nuana i hemala omi nuamiu.
5Teina matapaana eai ta bena au aipate adidiri abo sunuma potana eai abilolo au tubei, abilolo potana eai nuasibasiba,
6abo sibasibamiu potana eai emi lau eai au abididiniuioimiu, abiabididiniuioimiu abotai toro‐tahitahi, torotahitahi abotai Eaubada nanabuena,
7Eaubada au nanabuei abotai eda tataoyao au nuanuaiedi, eda tataoyao nuanuaiedi abotai ede gadosisi.
8Paana ena taba ginauri ta au abidio enamiu, eo boeamiu eai se tadada, taba nige au miagaibu nige uauamiu, eda Guiau Iesu Keriso abina tauata omi.
9Eai ginauri ta ie deha, ia matana se gibu, ginauri hanahanau eai mo i itaitaidi, ena baaea beabeadi aridi eai se deuri‐heaa wa, nuana se huiedi.
10Arinai egu tataoyao e, nuamiu bena au tore‐esegaidi, au aipate dobila arinai se eogaimiu, se hinerimiu ta, au abi mamohoiei, laulau ta au laulauedi taba nige huia esau au alabesibesi;
11enamiu abo se leawa, abo au abihemonau, arinai abo au lusora eda Guiau eo Tauhemaurida Iesu Keriso ena basileia eai i lau e nige nosina.
12Arinai abo ea hesoarimiu, teina ginauri ta abidi au atao eo mamohoina boeana eai au torotahitahio, taiede huia gamagari abo ea henuhenuaisinidi.
13Ea ene i dudurai, eau taugu eai ta ma‐miagu, abo ea hesohesommiu ginauri ta bena au nuanuatuidi,
14paana ea nuatui taugu ta egu huia gabaena nige baeaona, doha eda Guiau Iesu Keriso i ribahesanapugu wa. (Io. 21.18-19.)
15Hedeona abo ea hesabaemiu, bena egu torohai murina eai huia gamagari abo nuamiu se sae, ginauri ta au nuatuidi.
16Paana huia ne eda Guiau ena gigibori eo ena laoma ai hemasarahawa arimiu eai, ai nige piripiridai ai lediwa, doha tatao isibom adi sanapu eai se hetubudi, na ena wasawasa tepona ai tau‐itana ede, matamai eai.
17Ia Eaubada, Tamana, arinai hedebasaena eo aihelahuina ie abi, huia ne arina esau ewa puripurina namanamarina eai i laoma, i ene, “Natueogoyogoigu ina, ia nuagu i helolo aririei,”
18arina ta ai tauataiena, galewa eai i laoma, huiana ne maemai aie sae oea‐tupina tabuna eai wa. (Mt. 17.1-8; Mk. 9.2-8; Lk. 9.28-36.)
19Hinage peroveta ribana ta abiyao, i masaraha ariri. I lolo taba au atailobai, doha lamepana, teha masigiri eai i alaala, i lau e mara i iuyari eo ubona i dalasaema nuamiu eai.
20Teina ta au nuatu‐bagunai, uriuri tabudi eai taba nige esa eo esa iabom ena nuanuatu eai aniona bena i nuatuwatai,
21paana nige peroveta ribana esau tau ena nuatu eai i laoma, na tatao Eaubada ena riba se ribaei, paana Earua Tabuna i duduidi.
