2 ጴፂሮሳ ኪታ 1

1

2

3

¹ታኒ ሲሞኒ ጴፂሮሲ፥ ዬሱሲ ኪሪስቶሳ ፂሎቴꬃ ባጋና ኑዋ ማላ ኣማኑዋ ኣኬዳዋንቶ፥ ሃ ዳቢዳቢያ ፃፋይ።

²ፆሳኔ ኑ ጎዳ ዬሱሳ ሂንቴ ኤሪያዋን ኣꬎ ኬካቴꬃይኔ ሳሮቴꬃይ ሂንቴንቶ ፓላሂዴ ጊዶ።

³ኑኒ ፆሳ ቦንቹዋኔ ሎዖቴꬃ ላታና ማላ፥ ኑና ፄሴዳዋ ኑኒ ኤሪያዋን፥ ዴዑዋሲኔ ፆሳ ማላቱሳሲ ኑና ኮሺያዋ ኡባ ፆሳ ዎልቃይ ኑሲ ኢሜዳ።

⁴ሂንቴ ኣ ኢሙዋ ባጋና ሳዓን ዴዒያ ባዪዚያ ኣሙዋፔ ኬሲ ኣካናዳኒኔ ፆሳ ፆሳቴꬃ ላታናዳን፥ ኢ ባሬ ኢማና ጌዳ ዳሮ ዎልቃማኔ ኣልዖ ኢሙዋ ኑሲ ኢሜዳ።

⁵ሄዋ ዲራው፥ ሂንቴና ቤሲያዋ ኡባ ሚኒ ኦꬂዴ፥ ሂንቴ ኣማኑዋ ቦላ ሎዖቴꬃ፥ ሎዖቴꬃ ቦላ ኤራቴꬃ፥

⁶ኤራቴꬃ ቦላ ሂንቴና ናጊያዋ፥ ሂንቴና ናጊያዋ ቦላ ጌንጫ፥ ጌንጫ ቦላ ፆሳ ማላቲያዋ፥

⁷ፆሳ ማላቲያዋ ቦላ ኢሻቴꬃ ሲቁዋ፥ ኢሻቴꬃ ሲቁዋ ቦላ ሲቁዋ ጉጂቴ።

⁸ኣዪሲ ጎፔ፥ ሃዋንቱ ሂንቴንቶ ሎይꬂ ዳሪያዋ ጊዶፔ፥ ሂንቴና ጎዳ ዬሱሲ ኪሪስቶሳ ኤራቴꬃን ቲሻኔ ኣዪፊያና ዴዒያዋንታ ኦꬃና።

⁹ሺን ሄዋንቱ ባይና ኡራይ ባሬ ማታን ዴዒያዋ ፃላላ ዴሜ፤ ቃሲ ኢ ቆቃ፤ ኢ ካሴ ኦꬄዳ ናጋራይ ኣቶ ጌቴቴዳዋ ዶጌዳ።

¹⁰ሄዋ ዲራው፥ ታናዳን ፆሳ ካሊያዋንቶ፥ ሂንቴና ፆሳይ ፄሴዳዋኔ ዶሬዳዋ ሎይꬂ ኤሪሳናው፥ ካሴዋፔ ኣꬊ ሚኒቴ፤ ኣዪሲ ጎፔ፥ ሂንቴ ሄዋ ኦꬂያዋ ጊዶፔ፥ ꬉቤቲኪታ።

¹¹ሄዋዳን ቃሲ ኑ ጎዳኔ ኑና ኣሺያ ዬሱሲ ኪሪስቶሳ ሜꬊና ካዉቴꬃ ጌሊያ ኩሜንꬃ ማታይ ሂንቴንቶ ኢሜታና።

¹²ሄዋ ዲራው፥ ሂንቴ ሃ ዬዋቱዋ ኤሪያዋ ጊዶፔካ፥ ቃሲ ሂንቴ ኦይቄዳ ቱሙዋን ሚኔዳዋንታ ጊዶፔካ፥ ታኒ ሂንቴና ሃ ዬዋቱዋ ኡባ ዎዴ ሃሳዪሲያዋ ኣጊኬ።

¹³ታኒ ፓፃ ዴዔዳ ኬናን፥ ሂንቴና ሃሳዪሳዴ ቃሴꬃናው ኮሺያዋ ታው ማላቴ።

¹⁴ኑ ጎዳይ ዬሱሲ ኪሪስቶሲ ታው ቆንጪያን ኦዴዳዋዳን፥ ታኒ ሃ ሃዪቂያ ኣሳቴꬃ ጋሚዔናን ቃራ ኦላናዋ ኤራይ።

¹⁵ታኒ ሃይቄዳዋፔ ጉዪያን ጊዲናካ፥ ሂንቴ ሃ ዬዋቱዋ ኡባ ዎዴ ቆፓናው ዳንዳያና ማላ፥ ታው ዳንዳዬቴዳዋ ኡባ ኦꬃና።

¹⁶ኑኒ ኣ ዎልቃማ ቦንቹዋ ኑ ኣይፊያን ቤዒዴ ኦዴቶፔ ኣቲን፥ ሜꬊ ኣኬዳ ቶሳን ኑ ጎዳ ኪሪስቶሳ ዎልቃኔ ዩሳ ሂንቴንቶ ኦዲቤይኮ።

¹⁷ኣዪሲ ጎፔ፥ ዳሮ ዎልቃማ ቦንቹዋፔ፥ «ታኒ ኣኒ ዳሮ ናሼቲያ ታ ሲቆ ናዓይ ሃዋ» ያጊያ ኮሻይ ዬዳ ዎዴ፥ ፆሳ ኣዉዋፔ ቦንቹዋኔ ጋላታ ኢ ኣኬዳ።

¹⁸ቃሲ ኑኒካ ጌሻ ዴሪያ ቦላን ኣናና ዴዒዴ፥ ሄ ኮሻይ ሳሉዋፔ ዬዳዋ ሲሴዶ።

¹⁹ኣሳይ ሄዋፔ ሎይꬂ ኣꬊያ ቲምቢቲያ ኦዲያዋንቱ ሃሳዬዳ ኑና ሎይꬂ ኣማንꬂያ ቃላይ ኑሲ ዴዔ፤ ሂንቴ ሄ ቃላ ናጊያዋ ጊዶፔ ሎይꬄዲታ። ኣዪሲ ጎፔ፥ ሄዌ ሳዓይ ዎንታና ጋካናሲኔ ዎንታ ፆሊንቲያ ፖዑ ሂንቴ ዎዛናን ፖዓና ጋካናው፥ ꬉማኒ ፖዒያ ፖዑዋ ማላ።

²⁰ኡባፔ ካሴቲዴ፥ ሃዋ ኤሪቴ፤ ፆሳ ማፃፋን ፃፌቴዳ ቲምቢቲያ ኦዴዳዋ ኦኒኔ ባሬካ ቢላናው ዳንዳዬና።

²¹ኣዪሲ ጎፔ፥ ቲምቢቲያ ኦዴዳዌ ኡባይ ጌሻ ኣሳቱ ጌሻ ኣያናይ ካሌꬂና፥ ፆሳ ቃላ ሃሳዬዲኖፔ ኣቲን፥ ኣሳ ሼኒያን ሃሳዬቲቤና።