1Ngayulu Tjaaman Piitalu piipa ngaatja wakara wantirriyaṉi kulintjakunyurra. Yiitju Kurayitjaluṉi irriṯi watjaṉu ngayulu palumpa waarrkana nyinanytjaku. Yiitjuku walytja tjuṯa nyurrangarri ngurra kutjupa kutjupangka nyinanyi. Nganaṉa tjungungku kuliṉi Katutjalu Yiitju Kurayitjaluṯarra tjukarurru kutu palyalpayi. Yiitjulu nganampa kuya waṉipayi.
2Ngayulu nyurrangarrimpa Katutjanya tjapilpayi, palyanyurra nyinanytjaku, yunypa. Yalatjiṯarra ngayulu nyurrangarrimpa tjapilpayi, nyurrangarri puntura nintirringkunytjaku Katutjaku wangkaku, Yiitjuku wangkakuṯarra. Paluru nganampa mayutju nyinanyi.
3Katutjalu ngangkari tiṉatjarrangku nganaṉanya yaṉṯayaṉṯara kanyilpayi. Paluru nganaṉanya nintiṉu palumpa wangka kulira walytjarrinytjaku. Nganaṉa palumpa walytjarrinytjala paluru nganaṉanya rapalpayi tjukarurru kutula nyinanytjaku.
4Yalatji nganaṉanya ngulytjura paluru watjaṉu rapalkitjangku palumpa wangkawana nganaṉa tjukarurru kutu nyinanytjaku. Yalatji nganaṉa palumpa wangkawana nyinarra wiya walytjangku kulira kuya kutu palyanmalpa, Katutjanya nguwanpala tjukarurru kutu nyinaku.
5Nyurrangarri Yiitjuku palya nyinanyi. Nganakuṯarranyurra palya nyinanytjaku?, yaṉangu kutjupa tjuṯaku. Nyaakuṯarranyurra nintirrinytjaku?, Yiitjuku wangkakunyurra puntura nintirrinytjaku.
6Kuya palyalkitjangku kulira yaalytjiyaalytjinyurra nyinaku?, yalatjinyurra nyinanytjaku. Kuya wantirra tjukarurrulpinyurra nyinanytjaku. Tjinguru yunytjuwiya tjuṯangku nyurrangarrinya tjana panypurangkula pungkunytjala kutunyurra Yiitjuku tjukarurru nyinanytjaku. Yaṉangu tjuṯakunyurra yunytju nyinarra Katutjaku tjukarurru kutu nyinanytjaku.
8Yalatjinyurra Yiitju Kurayitjakuṯarra tjukarurru kutu nyinanytjaku. Palunyatjanu yaṉangu kutjupa tjuṯangku nyurrangarrinya nyakula yalatji kulilku, “Pala tjuṯa Yiitjuku wangkaku puntura ninti nyinarra nganampa tjana tjukarurru palyalpayi.”
9Yaṉangu paanga tjuṯangku wiya watiya tjuṯa nyanganyi, yaṉangu tjuṯaṯarra tjana wiya yuti nyanganyi. Tjinguru Yiitjuku walytja tjaampalanyurra palumpa wangka yutitja kulilwiyalpi nyinaku, paanga tjuṯa nguwanpa, watiya tjuṯa tjana yuti nyakunytjawiya nguwanpa. Yalatjinyurra wiya kulilku, “Yiitjulu nganampa kuya waṉingu nganaṉa tjukarurru palumpa kutu nyinanytjaku.” Yalatjinyurra kulira wantiku.
10Walytja tjuṯa, wangka ngaatjaya kulila! Irriṯi Katutjalu kuliṉu nyurrangarri palumpa walytja tjuṯa nyinanytjaku. Yalatji kuliranyurra palumpa tjukarurru kutu nyinanytjaku. Yalatjinyurra tjukarurru nyinanytjala Katutjalu nyurrangarrinya kanyilku, yiwarra kutjupawananyurra yankupayingkamarra.
11Tjukarurru nyurrangarri mantangka nyinanytjala Katutjalu nyurrangarrinya palumpa ngurrangka nyinatjunku, kana kutunyurra nyinanytjaku. Ngurra palula mayutju Yiitju Kurayitjalu nyurrangarrinya nyakula yunyparringkula yaṉṯayaṉṯalku.
12Ngayulu nintingku kuliṉi, irriṯi nyurrangarri wangka Yiitjunyatjarra kulira kuwarrinyurra kutu tjukarurru nyinanyi palumpa. Ngayulu wangka palulawana piyuku nyurrangarrinya nintiṉi.
13Yalatji ngayulu nyurrangarrinya kutu nintinmalpa, wantinytjawiyangku. Ngula kutju ngayulu nyurrangarrinya nintintjawiyangkulpi wantiku, mirrirringkula.
14Irriṯi mayutju Yiitjulu ngayunya yalatji watjaṉu, “Nyuntu rawawiya nyinarra mirrirriku.”
15Palumpa wangka kulira ngayulu kuliṉi, “Kana nyinarraṉa ngayulu tjananya Yiitjuku walytja tjuṯa kutu nintinmalpa, ngayulu wiyarringanyingka ngaṉṯi tjana tjukarurru Yiitjukuṉu wangkawana kutu nyinanytjaku.” Yalatji kulira ngayulu nyurrangarrinya Yiitjukuṉu wangka kutu nintiṉi.
16Tjukurrpa kutjupawana wiya nganaṉatju nyurrangarrinya tjakultjunkupayi. Irriṯi Yiitju Kurayitjanya mantangka nyinanytjala nganaṉatju kurungku palunya nyangangi paluru tjananya ngangkari tiṉatjarrangku palyantjala. Paluru nganaṉanyatju watjaṉu mantakutu piyuku ngalyankukitjangku. Yalatji nganaṉatju nyurrangarrinya tjukarurru tjakultjunkupayi, nyangutjangku.
17Paapa Katutjaluṯarra palunya mayutju tiṉa kulira puḻi palula watjaṉu, “Ngaatjanya ngayuku katja, yunytjuṉara nyinanyi. Yunyparringanyiṉara palumpa.” Wiya Katutjalu yaṉangu kutjupa nyakula yalatji watjaṉu, palula kutju. Puḻi palula nganaṉatju nyinarra Katutjakuṉu wangka panyapa kuliṉu.
19Yirriṯi yalatji Katutjaku wangka watjalpayi tjuṯangku watjaṉu Kurayitjanya mantakutu ngalyankunytjaku. Wangka tjanampa yiltarringu. Yalatji nganaṉa nintingku kuliṉi. Wangka tjanampa nganaṉa kulira kutu tjukarurru nyinanytjaku Yiitju Kurayitjanya mantakutu ngalyananyingka.
20Palumpa tjanampa wangka Katutjaku kurrunpangku nyurrangarrinya nintilpayi, riitarrinytjala. Wangka palunya wiya nganaṉa walytjangku riitarringkula nintingku kulilpayi, Katutjaku kurrunpangku nganaṉanya nintilpayi.
21Yurrunpa paluru tjana piipangka wakalkitjangku kulintjala, palumpa kurrunpangku tjananya nintilpayi tjukarurru wakantjaku, wiya tjana walytjangku kulira wakalpayi, wiya.
