1Au, Simon Pita i, ayei urata ben kapraingi inbe aposol ke Yesu Kirisi. Au i awodo rau naii pang ang di tooltool yo katara lomim medana pang Yesu Kirisi dawa ben am nga. Ngan ya in Maro kiidi, inbe ya in tool tani yo ikau idi a ipamulidi ye so dook tiap yo be igarungidi i, inbe ya in itoo dada dook mata yo noonoonoo nga. Le ye dada dook mata ki tani, in ilonidi a nen ngan tatara lodo medana panga.
2Ngan ang ngan lomim galanga moolmool ye Maro inbe Tool Mai kiidi yo Yesu Kirisi i. Nen le apatarau pang Maro nen, be lo galanga kiang tani in ole iso dada pang a be nen ngan iyei dada dook mata pang, inbe ikaua lo silene ki pang mai le mai san.
3Ngan ye yo lod galanga ye moolmool nga, ngan le ikap so le imot yo tamaka ye ngan paidi, a be nen ngan tayepe dook, inbe tatoo dada dook mata le imot yo lono be tatoo nga. Nen le ikap so nen paidi ye gurana ki yo mai i. Ya in itoo dada yo dook mata in leu, inbe ene mai san ke be di tooltool tipayiti ye. Ngan nen le ipootidi panga ya taunu be tayei ben di tooltool ki.
4Moolmool, ya in itoo dada dook mata inbe gurana ki mai san. Ngan la le ipamede betanga be ole iyeie dada yo dook mata ki taunu i, in paidi, a be nen ngan dada dook tiap ke tana yo iyolidi be la tayei noonoo nga, ngan o ke be igarungidi tiap, bong ole tatoo dada dook mata dawa ben yo itoo i.
5Ngan so dook mata tina ngan Maro iyei paidi oo, nen le dook mata be katara lomim medana panga leu be, bong be nen ngan kayei urata le guramim be katoo dada yo dook mata nga lapau. Ngan kumata le be katoo dada dook mata tani nga, ngan dook mata, bong ole lomim kaua urata dook ye dada moolmool yo ke Maro nga lapau.
6Inbe kumata le be lomim kaua urata dook ye dada moolmool tani nga, ngan dook mata, bong ole kakap tutang ye yepongo kiang lapau. Inbe kumata le be kakaptutang ye yepongo kiang nga, ngan dook mata, bong ole kakodo le kamede inbe kasolo urata moonoo yo be pombe pang yang, ngan lapau. Inbe kumata le be kakodo le kamede nen nga, ngan dook mata, bong ole katoo dada dook mata le imot yo Maro lono be katoo ngan lapau.
7Inbe kumata le be katoo dada dook mata le imot yo Maro lono be katoo nga, ngan dook mata, bong ole lomim mai san pang di diemim yo titara lodi medana pang Kirisi ngan lapau. Inbe kumata le be lomim mai san pang di diemim nga, ngan dook mata, bong be nen ngan ole kayei dada dook mata yo be lomim mai san pang di tooltool nga le imot ngan lapau.
8Ngan kumata le be tasudungu toongoo dada dook mata tina ngan le ikenen leu nga, ngan ole ipaposidi ben idi nga lod galanga moolmool ye Tool Mai kiidi Yesu Kirisi, inbe lo galanga kiidi tani in ole ilonidi le tayepe ye yepongo yo dook mata i.
9Bong kumata be tool sa itoo dada tina ngan tiap nga, ngan ya in dawa ben tool mata kis yo ikamata ni tiap i. Inbe ya in lon kalli ye yo Maro ipamule a igiri dada dook tiap ki ke noonoo yo muku ngan iyei nga.
10Le ang di diek nga, ngan ole kakaua urata le guramim be katoo dada tina ngan dook le imot, a be nen ngan ipaposang ben moolmool ang ngan Maro ikiu ang, inbe ipootang panga ya taunu. Ngan ye yo awete nen nga, yesoo kumata le be kayei so tina nga, ngan o ke be kawala murimim pang Maro pitiap yege.
11Inbe Maro ole lon ponana pang a iso dada pang be lo kayepe so ye malala ki. Ngan malala ki tani, in Tool Mai kiidi Yesu Kirisi yo ipamulidi ye so dook tiap yo be igarungidi i, in iyepe ye. Inbe ya la be matan kala so ki nga le imot le taukan motingi i.
12Ang ngan o lomim galanga ye so yo awetewete ye, ngan oo. Inbe kaparama betanga moolmool ke Kirisi yo di tooltool tipatomonai ang ye, in oo. Bong au i lok be apamadit lomim ye so tina ngan le ikenen leu.
13Ngan au tinik i dawa ben para ke kaningi yo iken le mos tiap be dook tiap i. Inbe Tool Mai kiidi Yesu Kirisi ipagalanga lok nen, be ole palbe leu inbe ayege tana i a alo. Le nookoot nga ye kene yo ayepe matak rerene go nga, ngan dook mata nen be awetewete pang a apamadit lomim mulu ye so tina nga, a be nen ngan lomim kalli be.
15Ngan la le nookoot nga akaua urata le gurak be awete pang ye so tina nga, a ye kene yo be amata ye in nga, ngan ole lomim tut so tina mulu le iken so yang.
16Muku ngan amwete pang ye Tool Mai kiidi Yesu Kirisi yo be imulu a isi ngan ipa ye gurana ki maiyoko in oo. Ngan ye kene tani ngan amtoo gasagasanga sokorai sa kidi tooltool yo ipa ye di tapdi lodi la le amwete pang ye, ngan tiap. Bong ye am tapmam matamam, ngan amkamata ben ya in tool ene mai ki taunu, inbe gurana ki maiyoko, ngan la le awete pang ye nga.
17Le moolmool, yesoo ye kene yo Tamada Maro iyitmaka ene inbe iyeie ene le ilo ete ke be di tooltool tipayiti ye in nga, ngan amyepe lapau. Le ye kene tani in amye Kirisi amyepe ye kawal mison ke Maro, inbe Maro nunngana iduku, inbe kalngana si iwetewete ye i. Le tina am tapmam amlongo Maro kalngana ipa ye malala ki a si iwetewete ye nen, “Tool in au Natuk. Au i lok panga mai san, inbe lok ponana ye.”
19Ngan nen le am nga lomam galanga nen, betanga yo di Maro koonoo tikap a tiwodo ilo ye rau nga, ngan moolmool. Le kin katar talngamim a kalongo betanga kidi, yesoo betanga kidi tina ngan dawa ben sul yo nunngana ilangaraia ni todo lono i. Le kaparama betanga tina le ilo ye lal yo be Yesu imulu a isi pombe ye i. Ngan ye kene tani in ole pombe dawa ben malama yo perbe a boi ke muntu ise ngan le ilangaraia ni i.
20Bong so maiyoko yo be lomim galanga ye in nen: Di Maro koonoo ngan sa yo be iwodo betanga ilo ye Rau ke Maro ye ya taunu lono, ngan tiap.
21Ngan ye yo awete nen nga, yesoo betanga yo di Maro koonoo tiwete nga, ngan ipa ye di tapdi lodi tiap, bong Maro Amunu Silene la ipamadit lodi be tiwete betanga tina yo Maro lono be tiwete nga.
