1Au i taukak lok mulu yo be awode lo ye rau a ayawari pang ye urata yo kayeii be kawinoko so ye lo ponana kiang yo be kalon di tooltool ke Maro ye nga.
2Yesoo, au i lok galanga ben ang ngan tinimim bese be le kayeie urata tani in. Ngan nen le apayitang la di tooltool yo tigaua ye bareme ke Yesu a tiyepe Masedonia ngan matadi. Inbe awete pang di nen, ye rai yo ila koot ni nga, ngan ang tooltool yo kayepe ye tana mai Akaia nga, ngan kamadit ye urata tani a kakarata so yo be kakap ye lo ponana kiang, ngan oo. Le dada kiang tani, in di tooltool ke Masedonia tikamata le lodi be tiyei nen lapau.
3Nen le nookoot nga au i be awanga di sotol tina a timala pang yang, a be mala tilonang a kapare so tina ngan le imot dawa ben yo awete pang be kayei nga. Ole nen ngan betanga yo muku ngan apayitang ye a akaua bingi yang be ang ngan ole kayei nga, ngan ole taukan kanono.
4Ngan kumata be aye di tooltool ke Masedonia yo titara lodi medana pang Yesu ngan sa be ammala le tikamatang ben kapare touo so siap nga, ngan ole moomoomam ye yo ampayitang sokorai ben amtara lomam le imede yang ye urata yo kayeii in nga. Bong ang ngan ole moomoomim le moomoomim dook tiap.
5Le au i lok tar be dada dook mata in nen, be awete pang di diede tina nga be timuku a timala matadi so ang, inbe tilonang a kaye di kayei porai urata ke lo ponana kiang yo kapamede betanga ye be kayawar nga. Ngan la ye kene yo be ammala ye in nga, ngan so kiang tina ngan kakarata a kapare dook be kayawar oo. Le kumata be nen nga, ngan di tooltool ole tikamatang ben ang ngan lomim dook tiap ye tiap, bong lomim ponana be kakap so tina ngan.
6Lomim tut betanga yo kidi maimai nga, “Sei tool yo ipe kaningi patunu kasin leu i, in ole ikap kasin leu pang kaningi. Inbe sei tool yo ipe kaningi patunu le alunu mata i, in ole ikap le alunu kaiye pang kaningi.”
7Le ang atu atu le imot ngan matamim too dook muku ngan, lo ngan be katar soo so yo lomim be kalong di diemim ye nga. Bong kin lomim modoko ye winokanga so kiang, too lomim tar be tool sa ipakaikai ang ye winokanga so, ngan be, yesoo di tooltool yo lodi ponana be tikap so pang di tooltool ye di tapdi lodi nga, ngan Maro ole lono pang di mai san.
8Inbe Maro yo lono paidi i, in ke be iyei dada dook mata pang ye so tina ngan le imot, a be nen ngan kanakana nga ang ngan ole kakap so dook mata le imot yo lomim be kakap pang ang tapmim nga, ngan le lo iye ang dook mata ke be iken a kayei urata yo dook mata nga le imot ye.
9Le ben betanga tani yo tiwode lo ye Rau ke Maro in iwete ye di nen, “Tool dook mata i, in imalimi so ki pang di tooltool yo ballingadi tiap nga. Inbe ye dada dook mata noonoonoo yo iyei nga, ngan Maro ole lon tutu a iken nen le taukan motingi.”
10Le Maro yo ikap kaningi puana pang di tooltool be tipe i, in ya la iyei a isup le itar kanono pang di be tikan i. Nen le ye dada gaongo leu, ya in ole ikap so matana matana alunu pang be kala kayei urata dook mata ye, inbe ole iyei ang le dada dook mata noonoonoo yo kayei nga, ngan ole itar kanono alunu le alunu san.
11Le Maro ole iyei ang le ballingamim ye so nga le imot, a be nen ngan kanakana ngan kalon di tooltool ye le mai. Inbe ye loningi kiang yo kagaua be amkap pang di nga, ngan ole tiwete lo ponana kidi pang Maro ye.
12Ngan nen le so yo kawinoko be kalon di diemim ye nga, ngan ke be kalon di tooltool ke Maro ye leu tiap, bong ole kayei di tooltool alunu a lodi dook mata le tiwete lo ponana kidi yo mai le mai san ngan pang Maro lapau.
13Yesoo, kumata be kayei urata ye so yo kawinoko le maiyoko ye lo ponana kiang ngan be kalon di tooltool ke Kirisi le tooltool kapala ye nga, ngan ole ang tapmim kapaposang ben ang ngan katara lomim medana moolmool ye bingi dook mata ke Kirisi inbe katoo. Le kumata be di tooltool tikamatang yo kayei nen nga, ngan ole tiyitmaka Maro ene ye dada dook mata tani yo kayeii i, inbe ye so alunu yo be kakap pang di nga.
14Inbe ole tikamatang ben Maro lono pang a iyei dada dook mata pang le illos dada yo kapala nga. Ngan nen le ole titara lodi le imot pang, inbe lodi tutang ye pataraungu yo kidi nga.
15Le tawete lo ponana kiidi pang Maro ye so dook mata san yo ikauu paidi ye lo ponana ki i. Ngan so dook mata tani, in idi nga taukada betanga dook mata yo be tawete nini ye i.
