1Ang di diemam nga, nookoot nga be apagalanga lomim ye dada ke Maro yo lono dook mata a iyeii pang di tooltool yo tigaua ye bareme ke Yesu a tiyepe tana mai Masedonia nga.
2Di ngan, barau, tisolo moonoo alunu san le taukadi pat le so ki taunu i. Bong di ngan lo ponana irau di le moolmool ballingadi tiap, bong di tooltool ke maroro, nen le baedi moo ye winokanga pat a be tilon di diedi kapala yo taukadi so nga.
3Ngan au i akamata dada kidi ke raingi so, ngan la le awetewete ye nga. Le moolmool, so yo be tirai nga, ngan tirai le ipa ye so yo be tiyei urata kidi tapdi ye, ngan lapau, a tipaloko lo pono. Ngan tool sa la iwete pang di be tikap so yo nen nga tiap, bong ye di tapdi lodi.
4Ngan la tiwete pam le koodi mede ye betanga be ammalum pang di, a be nen ngan titar baedi, inbe tisu di tooltool ke Maro tina yo taukadi so nga.
5Inbe di ngan tiyei dawa ben yo am nga lomam tar be tiyei, ngan tiap bong tilon di diedi ye so kidi alunu le alunu san. Inbe ye dada kidi tani yo tiyeii nen i, ngan di ngan titoo Maro lono.
6Ngan urata ke winokanga pat le so yo be kayei maroro ye i, in Titi la ipamaditi kataunu yang i. Le amwete panga le koomam mede be mala ikamatang a ipamedang, inbe iyei poraii le imot.
7Kakamata, ang ngan urata kiang kapala yo kayei nga, ngan kayei dook mata le imot. Ngan urata tina yo awetewete ye ngan nen; ye lomim medana yo kataru i, inbe ye betebetanga le lo galanga kiang, inbe kagaua lomim le imot ye yeingi dada yo dook mata nga, inbe ye dada yo be lomim pam ye mai san i. Nen le kumata be kayei urata kiang san ngan dook mata nga, ngan dook mata nen, be kayei urata tani yo be kayei maroro ye so a be kalon di tooltool kapala ye nga, ngan lapau.
8Au i yo awete pang nen nga, ngan be awete a apakaikai ang be kayei nen tiap. Bong lok be atou ang a akamatang ye dada kiang yo be lomim pang di tooltool ye mai san i, in moolmool le ben ke di diemim kapala yo tilon di tooltool ye ngan lapau, too tiap.
9Ang ngan lomim galanga ye dada dook mata yo ke Tool Mai kiidi Yesu Kirisi, ngan oo. Ngan ya in muku ngan ballingana ye so nga le imot, bong ye ang nga, ngan la le iyege so dook mata yo ki ngan sila ikino, inbe isi tana le si iyei ben tool ballingana tiap nga, a be nen ngan ilonang a iyei ang le ballingamim ye so yo ke Maro nga le imot.
10Ngan au i be awete lok pang ye urata yo be kayeii i. Ye rai yo ila koot ni nga, ngan ang ngan kawete be lomim be le kalon di tooltool kapala ye so, ngan nen le ang ngan la kamuku pang di diemim a kamadit ye urata tani yo be kawinoko so be kalon di diemim ye nga.
11Le nookoot nga kayei poraia urata tani in le imot. Kakamata, muku ngan katara lomim be kayeie urata tani, le nookoot nga gaongo leu, ole katara lomim be kayeii le lo imot. Le so kiang yo be kawinoko nga, ngan kapas le kawinoko leu.
12Ngan nen le soo so yo idi nga lodo be talon di ye nga, ngan kumata be tatoo lodo moolmool nga, ngan Maro ole lon ponana ye. Bong kumata be taukada so nga, ngan Maro in ke be itoridi ye so yo nen nga, ngan tiap.
13Au i awete be ole kalon di tooltool kapala a yepongo kidi dook mata, inbe ang ngan taukamim so le kasolo urata moonoo, nga tiap. Bong au i lok nen, be ang le imot ngan so kiang gaongo leu, le ke be di tooltool kapala kidi mai, inbe ang kapala kiang kasin, ngan tiap.
14Le nookoot nga ang ngan so kiang alunu san, inbe di ngan taukadi, le ole kalon di ye so yo timaka ye nga, a be nen ngan ye kene yo ang ngan be taukamim, inbe di ngan kidi alunu nga, ngan ole tilonang ye so yo kamaka ye nga lapau. Ngan ye dada yo nen in nga, ngan yepongo le so kiang ngan ole gaongo leu.
15Ngan betanga yo tiwodo a iken ye Rau ke Maro ngan iwete be idi nga talon di diede kapala a nen ngan so kidi iye. Nen le Rau ke Maro iwete nen, “Tool yo iwinoko kaningi alunu i, in kaningi ki alunu mata le kapala iwi, nga tiap. Inbe tool yo iwinoko kaningi kasin i, in kaningi ki kasin leu le ikana pitolo, ngan tiap lapau.”
16Au i awete lo ponana kiau pang Maro ye yo ipamaditi Titi lono le ya i lono be ilonang dawa ben am nga.
17Ngan nen le ye kene yo amkap betanga pang Titi a amtoru be imala matan so ang ye in nga, ngan le ya lono dook mata be imala. Bong ye punu in leu la le be imala pang yang ye, in tiap, bong ya taunu i lono mai san be le imala matan so ang pa.
18Inbe am nga ole amyawara ede atu lapau la be iyei ene a yaru timala pang yang i. Ngan tool tani, in di tooltool le imot yo tigaua ye bareme ke Yesu nga, ngan tiyitmaka ene ye yo iyei urata ye betebetanga bingi dook mata pang di tooltool nga.
19Inbe yo ngan leu tiap, bong tool tani, in di tooltool yo tigaua ye bareme ke Yesu nga, ngan tipootoo be iyei emam a amye ampa be amkap pat le so yo be amlon di diede ye nga. Ngan ye urata tani yo amyeii i, in be nen a amyeie Tool Mai ene le ilo ete ke be di tooltool tipayiti, inbe ampaposam pang di tooltool ben am nga tinimam bese be amlon di tooltool yo timaka ye so nga.
20Ngan am nga lomam be tool sa ipasa mur yam ye dada yo matamam kala pat maiyoko yo di tooltool titaru ye lo ponana kidi, in tiap. Yo nen ngan la le amkaua ede tani in nga.
21Le am nga lomam kaua urata be amyei dada yo dook mata ngan ye Maro matana leu tiap, bong ye di tooltool le imot yo ke tana i nga, ngan matadi lapau.
22Inbe am nga ole amyawara emam san mulu a iyei di tooltool ru ngan edi inbe tiye timala. Ya in kanakana ngan atoua ye urata matana matana, ngan le akamata ben ya in tool dook mata ke be ilon di tooltool ye urata yo ke Maro nga. Le nookoot nga itara lono le imede yang be ole kayei urata yo ke winokanga so i, le ya in tinin bese be ilonang ye urata tani in.
23Inbe ye Titi, ngan ya in isu au le amru amparlon ye yeingi urata kataunu yang. Inbe ye di diede ru nga, ngan tikap di tooltool yo tigaua ye bareme ke Yesu ngan damodi, inbe kanakana ye urata yo tiyei nga, ngan tiyitmaka Kirisi ene ye.
24Ngan nen le ye kene yo be di tol timala pombe ye in nga, ngan kapaposo dada kiang yo be lomim pang di tooltool ye mai san i, in pang di, a be nen ngan di tooltool yo tigaua ye bareme ke Yesu nga, ngan ole lodi galanga nen, betanga yo muku ngan amwete a ampayitang ye nga, ngan moolmool.
