1. Kraľengero 8:11-21

¹¹a o rašaja našťi dureder kerenas e služba prekal e chmara, bo le RAJESKERI slava pherarďa oda than.

¹²Akor phenďa o Šalamun: “O RAJ phenďa, hoj bešela andre kaľi chmara.

¹³Ale me akana prekal tu ačhaďom šukar Chramos, o than, kaj šaj aves pro furt.”

¹⁴Medik savore Izraeliti ode ačhenas, o kraľis pes visarďa ke lende a požehňinďa len.

¹⁵Phenďa lenge: “Mi el lašardo o RAJ, o Del le Izraeloskero, bo ov doľikerďa o lav a peskere vastenca kerďa oda, so phenďa mire dadeske le Davidoske:

¹⁶‘Ole dživesestar, sar iľom mire manušen le Izraeliten avri andral o Egipt, andre ňisavo Izraeliko kmeňos na kidňom mange avri foros, kaj mange te keren o Chramos, andre savo uľahas lašardo miro nav, ale kidňom mange avri le David, hoj te el upral mire Izraelike manuša.’

¹⁷Imar mire dadeske le Davidoske sas andro jilo, hoj te ačhavel o Chramos, hoj o manuša te lašaren le RAJES, le Izraeloskere Devles.

¹⁸Ale o RAJ mire dadeske le Davidoske phenďa: ‘Mištes, hoj tuke sas andro jilo te ačhavel o Chramos prekal miro nav,

¹⁹ča oda Chramos na ačhaveha tu, ale korkoro tiro čhavo, savo ela tutar. Ov mange ačhavela o Chramos prekal miro nav.’

²⁰O RAJ oda, so phenďa, the kerďa a ačhiľom kraľis pal miro dad o David a bešľom pro Izraeliko tronos, avke sar phenďa o RAJ. Ačhaďom the o Chramos prekal o nav le RAJESKERO – prekal le Izraeloskero Del.

²¹Pririchtinďom ode than prekal e Archa, andre savi hiňi le RAJESKERI zmluva, so phandľa amare dadenca akor, sar len iľa avri andral o Egipt.”