1. Kraľengero 2:12-35

¹²Avke o Šalamun bešľa pro tronos peskere dadeskero a leskero tronos ačhiľa igen zoralo.

¹³Andre jekh džives geľa la Chaggitakero čhavo o Adonijah te dikhel le Šalamunoskera da la Batšeba. Oj lestar phučľa: “Aves andro smirom?” Ov odphenďa: “He, andro smirom.

¹⁴Kamav tutar vareso te phučel.” “Vaker,” phenďa leske e Batšeba.

¹⁵“Se tu džanes,” ov phenďa, “hoj o kraľišagos majinďa te el miro a hoj savore manuša andral calo Izrael peske man kidle avri vaš o kraľis. Ale o kraľišagos mandar sas odilo a sas dino mire phraleske, bo o RAJ leske diňa.

¹⁶Akana, hin man jekh mangipen. Ker mange ada!” “Vaker!” oj phenďa leske.

¹⁷Avke ov phenďa: “Privaker tut vaš ma ko Šalamun, hoj te del mange la Abišag andral o Šunem romňake. Ov čačes priačhela pre oda.”

¹⁸“Mištes,” odphenďa leske e Batšeba, “privakerava man vaš tu ko kraľis.”

¹⁹Paľis, sar avľa e Batšeba ko Šalamun te privakerel pes vaš o Adonijah, o Šalamun ušťiľa pal o tronos a banďiľa angle late. Avke bešľa pale pro tronos a thoďa the la te bešel pro tronos paš leskeri čači (pravo) sera.

²⁰Avke leske oj phenďa: “Kamav tutar jekh cikňi veca, hoj te keres prekal ma!” “Phen, so kames, a me oda kerava, daje miri,” phenďa lake o Šalamun.

²¹Oj phenďa: “Mi den la Abišag andral o Šunem vaš e romňi tire phraleske le Adonijoske.”

²²“Soske manges prekal o Adonijah la Abišag?” phučľa latar o Šalamun. “Se mang the o kraľišagos, bo ov hino miro phureder phral a leha hino o rašaj o Ebjatar the la Cerujakero čhavo o Joab!”

²³Androda o kraľis o Šalamun iľa vera anglo RAJ: “O Del man zorales mi marel, te o Adonijah na počinela peskere dživipnaha vaš kadi veca, so mandar mangelas.

²⁴Avke sar dživel o RAJ, savo man thoďa pro tronos mire dadeskero a savo mange kerďa sa avke, sar phenďa, o Adonijah mušinel mek adadžives te merel.”

²⁵Paľis o Šalamun bičhaďa le Jehojadoskere čhas le Benajah te murdarel le Adonijah. Ov geľa a murdarďa les.

²⁶Le Ebjataroske o Šalamun phenďa: “Dža pre peskere maľi andro Anatot, bo zasogaľines (zaslužines) tuke merel. Ale adadžives mek tut na murdarava, bo tu ľidžahas le RAJESKERI Archa angle miro dad David a zľidžahas leha leskere pharipena, so les sas.”

²⁷Avke le Ebjatar premukľa andral e rašajiko služba, so kerelas anglo RAJ. Avke pes ačhiľa oda, so o RAJ phenďa andro Šilo pre le Eliskeri famelija.

²⁸Sar o hiros pal oda avľa dži ko Joab, ov daranďiľa, bo pes ľikerelas le Adonijoha, choc angloda na sas le Absolonoha. Avke denašľa andre le RAJESKERO stanos a ode pes chudľa le oltariskere rohendar.

²⁹Le Šalamunoske phende, hoj o Joab denašľa andro RAJESKERO stanos a hoj ipen hino paš o oltaris. O Šalamun bičhaďa varekas ko Joab lestar te phučel: “Soske oda kerďal, hoj denašľal ko oltaris?” “Daravas tutar, vašoda denašľom ko RAJ,” ov odphenďa. O Šalamun phenďa le Jehojadoskere čhaske le Benajoske: “Dža a murdar les!”

³⁰Avke ov geľa paš o stanos le RAJESKERO a phenďa: “O kraľis phenel, av avri!” Ale o Joab odphenďa: “Na, me ade merava.” O Benajah geľa te phenel le kraľiske, so phenďa o Joab.

³¹“Ker avke, sar kamel!” phenďa leske o kraľis. “Murdar les ode a parun les! Avke khoseha pal ma the pal miri famelija o rat, so o Joab vaš ňisoste avri čhorďa.

³²Bo akana o RAJ leske visarel pale vaš o rat, so avri čhorďa akor, sar murdarďa la šabľaha duje muršen, save sas buter čačipnaskere the feder sar ov. Choc miro dad na džanelas pal oda, murdarďa le čhas le Neroskeres le Abner, savo sas veľiťeľis upral o slugaďa andro Izrael, the le čhas le Jeteroskeres le Amasah, savo sas veľiťeľis upral o slugaďa andre Judsko.

³³Lengero rat mi perel pro šero le Joaboske the pre leskero potomstvos pro furt. Ale le Davidoskere potomstvos, leskera famelija the leskere tronos mi el smirom le RAJESTAR pro furt.”

³⁴Avke o Benajah geľa, demaďa le Joab a murdarďa les. Paľis les parunde paš leskero kher pre pušťa.

³⁵Avke o Šalamun pre le Joaboskero than ačhaďa vaš o veľiťeľis upral o slugaďa le Jehojadoskere čhas le Benajah a le Cadok vaš o rašaj pre le Ebjataroskero than.