1 Hadì 3:14-22

¹⁴Ne emun edsunuzen nu is menge paaǥi ku wey edtumanen nu is ibpetuman ku he menge sulunuzen wey menge suǥù iring te mid-ulaula te amey nu he si David, ebeǥayan ku sikew te meluǥayad he untung.”

¹⁵Nepukew si Solomon, ne zutun neisip-isip din he nekidlalag kandin is Nengazen pinaaǥi te teǥeinep. Te kedlikù ni Solomon diyà te Jerusalem, midhitindeg sikandin diyà te etuvangan duen te Kavan te Kebpekid-uyun te Nengazen, ne nemuhat sikandin te menge pemuhat he edtutungen wey menge pemuhat he para te meupiya he kedepità. Ne midhimu sikandin te keemuran para te langun he menge upisyal zin.

¹⁶Ne zutun, duen dezuwa he vahi he terebahu zan is kebelegyà te zengeg dan he midhendiyà te ki Hadì Solomon.

¹⁷Migkaǥi is sevaha kandan te, “Mahal he Hadì, siak wey heini is bahi he zuma ku telaamur ziyà te sevaha zà he valey. Ne te zutun sikandin te valey mid-anak a.

¹⁸Ne kedlavey te tetelu he andew, iyan en maan sikandin mid-anak. Ne iyan key zà is dezuwa ed-ubpà dutun te valey ne wazè en duma.

¹⁹Sevaha he kezukileman, nehizeǥaan din is kandin he anak ne minatey heini.

²⁰Ne hein liwazè en te kezukileman mid-enew sikandin ne migkuwa zin is anak ku ziyà te avey ku dutun te nekelipezeng a. Midhulid din haazà is anak ku, ne iyan din impehulid kedì sikan is minatey he anak din.

²¹Ne hein meselem, mid-enew a su ibpesusu ku is anak ku, ne neehè ku he minatey en heini. Ne hein midsusi ku is batà diyà te merayag, nesusi ku he kenè bes iyan sikan is anak ku.”

²²Ne midtavak sikan is sevaha he vahi te, “Kenà heeyan tutuu! Kediey he anak kes uuyag, ne iyan minatey is kenikew.” Ne migkaǥi is nehuna he vahi te, “Kenà heeyan tutuu! Kenikew he anak is minatey, ne iyan uuyag is kediey.” Umbe mibpelelisà sikandan dutun te etuvangan te hadì.