Te Israel me Juda Hani Sigo Tuni Bidigo Po Elalubo Buku Deli 3:14-22

¹⁴Tama te nage eno te sa muani te wiegi yai sunumidu peyu, tama nago te bomai po me eno po me wali peyu, te naga aya Devitgo te yali kolesaga tiwai ebaso da, teda eno nage te sesabi elama, te bobage sogo te tǫde bidimainu yaibao,” po wali.

¹⁵Genuai Bidigo po ola silibo si da, teda Solomon hodaluali, tama te tiwai te na yali da homu eyu, te tama koneani. Tialima, nosali te aga Jerusalemba ma pelama, tama te Genuai Bidigo Dąų Walali Bomai Po Munalubo Halobage elalubo madi pąba dologi pali. Tama agai te tigidali siago domainu ulubo ofa me, tama te God dali deli homu pedalumainu ebo ofa dabe dali yalio. Tama te tudi badu nosali, agai te ofisa dabego me, te aga sę bidi dabego dali, te genuai daa tubo nai ulama, tuai dao.

¹⁶Me sogo deli te penani we si te kingba asali, te agai augwali si po dodolumainogo asalio.

¹⁷Tama we me deligo te tiwai po wai, “Eno king, te odao. Te we da si te be delide bidali. Tama eno te wai ogwa me deli ame nani. Tama eno te wai ame nani sogo, te we te bede ena dali bidai.

¹⁸Te si sogo nosali, agai me te wai ogwa ame nani. Tama da si naga te bede bidai. Te sogo te gasa bidi ma we te da si dali me bidibeo.

¹⁹Tama te hulide, te agai wai te isali, magi baso meni, aga bomonama pigilu, tama begeligi soyu, tama aga wai dai badu pigulali. Tama tialigo te wai isali.

²⁰Ena pilamubadi, tama te huli tomode te aga hodaluama, tama eno wai sagaselama, tama aga pibo betba selasa pai yalio. Tama agai te isali wai sela aselama, tama ena pąba pilagasai yalio.

²¹Te kigamu ena hodalu, tama eno te ena wai ame mawainu yali, tiali goli eno suali, te aga isai yalio. Tama eno aga te wai bugagia tonalu osola sulama, tama eno koneani, te aga eno ame nani wai tiwai tonobo ąǫ me ebeo,” wali.

²²Te wego po ola silibo si da, tama gasa wego te po wai, “Menio. Te isali wai, te naga wai dao. Tama te bidibo wai da, te eno wai dao,” wali. Tiali goli, te polasa po wali wego po wei ponoyu, te po wai, “Mu menio. Te isali wai, te naga wai dao,” wai. “Tama te bidibo wai da, te eno wai dao.” Tama augwa si te konila po wabo sę te king gedude yalio.